首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督教主義學校的本質
基督教主義學校的本質
卷期：第873期 本次： 日期：1961/9 刊名：台灣教會公報 頁數：3
篇名：基督教主義學校的本質 [ Ki-tok-kàu chú-gī ha̍k-hāu ê pún-chit ]
作者：陳明清 Tân Bêng-chheng
  顯示 : 漢羅 全羅 並列  

社論

基督教主義學校的本質。

陳明清

1961年9月873期          3-5

 

耶穌佇地上最後有命令兩項事，就是「宣教」（太28:19）佮「教育」（太28:20）。今仔日的教會佮文明攏是對這兩項來發展的。教會應該愛看重這兩項事，毋通偏重一項。咱若愛忠實守耶穌的命令，應該著掠這个宣教佮教育做咱受託的重大任務。咱的教會遵守這个命令已經設幾nā間的教會學校。佇戰後閣加幾nā間大學程度的教會學校，遮濟的教會學校，設使若會通復興親像較早彼款的傳道精神，今仔日應該會通產生指導現代咱國的文化的人物。

台灣佇日本統治下是受軍國主義佮極端的國家主義富國強兵本位的教育。光復後已經改變民主主義做教育的理念。總是教育佮經濟是無siāng，佮現實teh實行教育的「人」有合宜無合宜有真大關係。教育若欲予伊達到適當有效，毋是kan-ta靠教育制度的改革，閣較要緊的，就是愛靠教育者的人格，識見，能力。特別這个影響道德教育真大，換來講：就是人比制度較要緊。戰前的日本教育有2點的錯誤，第1點是錯誤佇國家的目的，第2點是錯誤將已經錯誤的國家目的來作教育的目的。所以伊的教育是重佇「國民」的教育，毋是重佇「人」的教育，有教示in做「國民」，無教示in做人。所以in就將小學校改換做國民學校（戰後已經閣改倒轉去小學校。）今仔日咱的教育是採用民主主義，總是咱知民主主義的基礎就是人格的完成。若無事先改作個人的道德，就無改革政治的向望。政治教育雖然要緊，總是這是教育的一小部份nā-tiāⁿ。

戰後的道德教育實在通憂慮。青少年的犯罪日日加添，性的道德日日廢頽。特別講是道德的搖籃的家庭關係，爸，（母）囝、翁某、兄弟間的傳統tek的儒教道德ná荒廢，父母對囝兒的教育ná失落權威，這撿彩是對家族制度廢止所致，這點是外國所無的。佇台灣的宗教á是教會對社會佮家庭所影響的力真薄弱，百姓一般雖然袂通講有反對宗教，總是對宗教是冷淡，無關心。所以欲實行道德教育拄著真大的困難。總講，咱的社會現在的精神環境對道德教育真不利，空白的所在猶真濟。宗教佮教育的目的以及世界觀攏有關連性。特別宗教是道德教育的基礎，同時會予教育閣較發揮伊的效果，通講教育有真大貢獻佇教育。因為按呢，日本佇戰後已經認識戰前所採用的教育目的有錯誤，taⁿ毋敢閣看輕宗教教育，佇教育基本法第9條，關係宗教教育的事，特別有規定講：「教育上應該愛尊重宗教寬容的態度佮宗教的社會生活。」毋nā按呢，對教會學校的宗教科目（教聖經）公認做正科，正式會用得教聖經。聖經科的教員政府正式承認做宗教科目的教員，予伊有免許證。毋nā按呢，文部省（教育部）出告示命令公立的學校講：「公立學校雖然袂得施行宗教教育，總是公立學校的教授，á是學生自動愛開宗教講演會，á是宗教研究會的時，無teh用的教室盡量愛撥予in使用。」

私立的教會學校會通保留實施宗教教育的自由，彼个理由有2點。(1)宗教學校佮公立學校無siāng，對國家無領公費來經營。(2)欲入、毋入是對家長自由選擇來決定，國民無受強制入私立學校。總是私立若欲實施宗教教育，彼个主旨愛明記佇學籍的內面，通予欲入學的人選擇，這是in所關心的。私立學校有宗教教育的自由是憲法上所保障的信教自由的一項，所以咱著來活用這个自由權，來完成耶穌所付託咱的使命。

教會學校雖然對學生有教一般的學識佮技術，也有施行道德教育，來啟發靈性佮陶冶人格。總是這款的教育毋是教會學校的本質上應該做的全部，毋是宗教學校也是teh做。教會學校的本質是在佇傳道來改變人格的主體做目的。所以教會學校全體就是將傳道救人做最高方針來建置。對本質來講彼个設立的就是教會，教會的頭就是基督，換話來講，教會學校就是基督本身所設立的。總講：為著傳福音的目的來創設的學校，就是基督教主義的學校（教會學校）。彼个最高的目的á是根本方針，攏是貫徹佇宣教這條線。所以總會愛常常知影彼間學校的運營狀況，愛檢討有合佇傳道目的的基本線á無。閣較要緊的，愛共伊推進指導，予伊會符合佇本來的目的。實在的教會學校伊的教職員的任命，指導，監督，教案的作成實施、學生的指導，其他校內攏總的行事攏愛用傳道救靈最高目標做in的目標來進行。

對頂面所講予咱知，宗教教育怎樣要緊。Taⁿ來寫基督教的宗教教育的本質是甚物。教會學校設立的目的是在佇宣教，主旨是傳福音救人，只有間接經過教育的手段來教in學識佮技術。為著傳道救靈，來耕作引導到佇教會，予in對基督經過「人的革命」，同時形成一个「基督tek的人」（加拉太4:19），換話來講：就是將有2款性這个囡仔（會變做魔鬼囝的危險性佮會變做上帝的囝的可能性）猶未予伊變做魔鬼囝的以前，就予伊來變做上帝的囝。這个就是基督教教育。若是一般的學校in是對教育圖謀啟發人性的完滿，同時到受學識佮 技術，對按呢陶冶in的人格。這个就是「非基督教主義學校」的目的。所以教會學校毋是kan-ta掠教修身道德來陶冶人格做夠額，閣較要緊的，就是將人格的主體根本共伊改變做新的人，這个就是教會學校的本質，也是創辦的目的。所以總會愛認識學校對傳道的實際情形，不時用真適當的方法來推進，佮指導予伊來達到彼个目的。若按呢，彼个效果益發會閣較發揮。

現時咱教會學校有幾點的困難。

  (1)自戰前所施行的「私立學校規程」第8條（規定：私立學校袂用得將宗教科目做必修科目。現在若有宗教儀式袂用得強迫學生參加）到taⁿ猶未修改，所以宗教學校常常拄著濟濟的困難。

  (2)欲得著熱心的基督徒的教師猶是困難。禮拜後佇教室對一个無信仰的教師的一句話會影響予所講的攏變做空空。有信仰的教師，伊佇教學上傳道感化的力量實在大。

  (3)所以盡力來找信徒的教師，同時對在職未信的教師傳道也是要緊。所以有時愛開講演會來栽培in的信仰，予in較有使命感（親像舊年佇瑞穗所開5校聯合的靈修會）。

  (4)學生對學生的傳道也是真要緊。熱心的學生做中心來組織學生團契，研究聖經、神學等等。

  (5)基督徒學生的入學猶是過頭少，向望會ná加添。

 (6) 學費有較貴，向望後日有改善的機會。

最後希望總會對人、財、力，莫得分散，集中來關心教會學校的傳道，無予時代影響，來達創設的目的。

大教師耶穌講：「你（天爸）所賞賜我出世間的人。In本是你的，你用in賞賜我，in也已經守祢的道理。（翰17:6）」In本是上帝的，上帝將in賞賜予咱的。教育的要緊佮使命是在佇遮。

求上帝祝福台灣所有的教會學校，會通切實來盡爸上帝佮耶穌基督所付託的任務是所向望。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461