李勤岸

    只要知影台羅拼音只有子音1个、母音2个所在修改， 就會當完全閱讀傳統白話字：傳統的ch，chh 台羅拼音是ts，tsh （這佮國際音標IPA相像，符合一符一音一意原則）；母音傳統的oa，oe 台羅拼音是ua，ue(依照台羅拼音ê音素原則，介音使用u)，母音傳統是eng，ek 台羅拼音是 ing，ik（顧全韻母系統對應ê一致性：in>im>ing；it> ip>ik）。會曉台羅拼音ê人應該同時會曉讀傳統白話字，按呢才好。

        已經學會曉台羅拼音ê人攏會當運用傳統台語白話字ê豐富資料。學台羅拼音ê好處就是會當轉去接咱台灣人豐富ê文化、文學、語言ê資產。台羅拼音佮傳統白話字有100% ê共容度。

         咱書寫盡量使用新白話字--台羅拼音， 按呢咱台語文標準化ê日子才有法度早一日來到，標準化ê語文才有法度予社會大眾接受，才會當進入教育體制。但是對傳統白話字咱嘛愛會曉閱讀，毋通有排斥ê心理。

       白話字文學是咱台灣人寶貴ê資產。

 2009/11/28 寫佇國立台灣師範大學台灣文化及語言文學研究所