Tâi-lâm Sîn-ha̍k-īⁿ khui hāu-iú tāi-hoē

1968.06.15  1032 hō  P.15

Tâi-lâm Sîn-ha̍k-īⁿ Hāu-iú Tāi-hoē pún ge̍h 13 ji̍t tī kai-īⁿ lé-pài-tn̂g chiau-khai, hoē tiong Sòng ĪN-tiúⁿ ū te̍k-pia̍t hiòng hāu-iú seh to-siā, tī kin-nî ê kì-liām-ji̍t, tit-tio̍h hāu-iú ê chi-chhî chàn-chō͘, bô-lūn kháu-sò͘ ê hiàn-kim á-sī Chú-ji̍t ê hiàn-kim, lóng ū ke-thiⁿ chin-choē.

  Khui-hoē ê tiong-kan, iā ū hāu-iú teh hiòng īⁿ-hong chit-būn goā-kài teh phoe-phêng Tâi-lâm Sîn-ha̍k-īⁿ sī"Sin Sîn-ha̍k"ê Sîn-ha̍k-īⁿ ê tāi-chì.  Sòng ĪN-tiúⁿ tuì chit hāng ê soat-bêng sī kóng, i pún-sim m̄ chai-iáⁿ tàu-tí goā-kài ê lâng só͘ teh kóng ê"Sin Sîn-ha̍k"sī teh chí sím-mi̍h?  I kóng, ū lâng teh kóng,"Sin Sîn-ha̍k"chiū-sī teh chí bô sìn"chhù-lú kàng-tàn"á-sī"Tō chiâⁿ jio̍k-thé"ê Sîn-ha̍k.  Sòng ĪN-tiúⁿ kóng, koan-hē chit nn̄g hāng sū, i tī kàu-gī-ha̍k ê káng-gī, lóng sī ēng choè tn̂g ê sî-kan, lài tuì ha̍k-seng kiông-tiau in tī sìn-gióng siōng ê tiōng-iàu, I pēng bô ho͘N2-jīn chit nn̄g hāng tī Sèng-keng lāi choè ki-pún ê sìn-gióng ki-chhó͘.

  Tī kin-nî hāu-iú-hoē, bú-hāu ū te̍k-pia̍t chhiáⁿ kū-nî hoê-kok ê Siau Chheng-hun Phok-sū káng-ián Tang-hong chong-kàu ê sū, iā ū chhiáⁿ Lo̍h Î-tō Sian-siⁿ káng-ián Sèng-si kap hiān-tāi im-ga̍k ê koan-hē, hō͘ tāi-ke ke-thiⁿ choē-choē siông-sek.