首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 聖神就是保惠師
聖神就是保惠師
卷期：第1031期 本次： 日期：1968/6 刊名：台灣教會公報 頁數：3-5
篇名：聖神就是保惠師 [ Sèng sîn chiū-sī Pó-huī-su ]
作者：許德謙 Khó͘ Tek-khiam
  顯示 : 漢羅 全羅 並列  

聖神就是保惠師

許德謙  約翰14：15-16

1968.06.01  1031號P.3~P.5

 

主耶穌講，「恁若疼我，就欲守我的命令，我亦欲對爸求，就伊欲用閣一個保惠師予恁，予伊永遠佮恁蹛；就是真理的神」

聖神降臨節就是教會的生日。主耶穌有應允學生講，伊若去，欲差聖神就是保惠師，真理的神來佮恁蹛。果然耶穌上天了後五旬節聖神降臨佇in的身上。當學生佮信主的人約略120人聚集同心專務祈禱的時，聖神降臨，予in有能力通見證主的閣活，也會行濟濟的神蹟；信的人加添，教會成立。

  Taⁿ聖神是甚物？五旬節聖神降臨的以前，舊約的時代kiám無聖神？舊約的聖神新約的聖神有像款仔無？聖神佮現代的教會，特別佮咱台灣教會有甚物關係？得著聖神的條件佮結果是甚物？得著聖神的條件佮結果是甚物？以下咱相佮想。

I. 聖神是甚是甚物？

聖神就是上帝的神，耶穌的神。聖神就是保惠師（保惠師），是保守恩惠的先生。日本的聖經翻譯做「幫贊的主」（助主），就是幫贊咱的信仰生活行佇上帝的道。聖神是信徒的辯護人，予in免受災難，佮魔鬼的陷害。原來保惠師是法庭的用語，是辯護人替被告代言，一爿檢察官咧(teh)告訴罪人的罪狀，總是辯護人咧(teh)替被告講話辯護幫贊。世間人是罪人，咱應該受審判，總是耶穌做咱的辯護，差聖神來幫贊咱，甚至替咱贖罪。所以基督徒有兩位的辯護人，一位就是天頂上帝的大爿的主耶穌；閣一位是佇地上踮佇咱內面的聖神。每一個基督徒應該著為體驗聖神就是保惠師的保護佮引chhoā。有時破病的時會得著聖神的安慰；有時犯罪會受聖神責備：聖神親像風，佇逐所在；有時親像去佇人的心內，予人有活氣。佇舊約聖神的話是喘氣（ruach），是指予咱活命的上帝的喘氣。人若無得著活命上帝的活氣的人的心內予人有活氣。聖神的活氣通過咱的智識，意志，理性以及感情來活動，所以聖神是踮佇咱內面咧(teh)安慰咱，教示咱，捌真理，予咱知濟，通顯明基督的榮光。

  Taⁿ舊約的聖神佮新約的聖神有甚物koh樣？舊約也有聖神，常常咧(teh)感動人為上帝工作，講上帝的話。先知以賽亞，Iâ lī-bí；士師，參孫，基甸等攏是受聖神的感動來做真濟好的工作。總是舊約的聖神袂有做一個5人格親身降落佇地上，踮佇咱的心內。只有新約的五旬節的聖神開始做第一擺佇人心內，成做以馬內利的事實。舊約的聖神是有特別的人得著特別的靈來活動。總是新約，原來踮佇上帝的所在的聖神對耶穌基督的上天了後，kàm-lîm佇地上佮咱每一人同徛，這是新約的聖神的特色。特別聖神佇耶穌基督的教會做中心來活動，證明耶穌基督現在活活佇咧做到會的活命。

II. 若是按呢，接受聖神的條件是甚物？

1著疼主，守主的誡命。

耶穌講，「恁若疼我，就欲守我的命令，我亦欲對爸求，就伊欲用閣一個保惠師予恁。」聖神是耶穌基督的神，所以離開耶穌就無聖神。人若心充滿了罪惡，自私行家己的路，上帝決斷無賜聖神予伊。總是人若疼主守主的命令，就欲得著聖神，就是保惠師；就欲得著新的活命。各位讀者！請你反省你家己，是毋是你有疼主守主的命令仔無？為甚麼無疼主？因為無聖神的同在。若有聖神就有豐富的活命佮能力，親像活水泉直直衝起來。

  美國一個山嶺A-lī-kek-nî有兩個城，in家己無水，攏是倚靠這個細山嶺的水泉來得著水。頭一個城鎮離開水泉較遠，水代先積囥佇湖裡，然後才對水溝流到城內予百姓用。有一年的夏天久久無落雨，湖內的水那來那少，差不多欲焦，彼的城的頭人吩咐百姓愛節儉水；一日的中間限時放水。第二的城鎮佇山頂，總是城內的水泉不時咧(teh)來得著水。彼年雖然無落雨，別所在無水，猶過這個城的水泉有不斷的水，予全城的人用有夠。

以上這兩的城平平有水，總是兩款的水無像款。一款是窟仔水，閣一款是直直衝起來的水泉。第2個城的水泉夠額予城內的人通用閣通分予別地方的人。

以上的故事通比並人有得著聖神仔無的分別，若有得著聖神是親像直直衝起來通利益別人的水泉。有人無得著活水泉。願讀者每人會得著聖神親像活水；就是對疼主守伊的命令。

2著悔改罪，信主耶穌基督

行傳2：38，「彼得共in講，恁著反悔，逐人佇耶穌基督的名受洗禮到予恁的罪赦免，閣欲受聖神的賞賜」有悔改罪，才會得著赦免，才會通得著聖神。若無悔改罪，聖神無佮咱蹛。

III. 接受聖神的結果是甚物？

1聖神就是保惠師，會安慰咱，引chhoā咱，保護咱。

  聖神毋是獨裁者，是一位保惠師，伊有堅定的心，gâu安慰人，勉勵人。伊無強制你，只有感動你會曉自由選擇行主的路。聖神的指示是確實，伊忠告你佮我，賞賜你豐富的活命。

2保惠師欲佮你永遠同在。

  這是何等的應允，是何等的福份。世間的律師，辯護攏是有路用的，何況聖神為你辯護。世間的顧問，律師，佮幫贊的人，常常愛無佇咧。咱若去拜候伊，伊的厝裡的人常常回答講，「伊無佇咧。」抑是講，「伊咧(teh)歇睏。」總是聖神毋是按呢，是永遠佮你佇咧。詩人講，「看ah！保守你的耶和華也無盹眠，也無睏去。」保惠師毋是一日辦公8點鐘，抑是常常請假，歇jia̍h，歇寒，是永遠不時佮你佇咧。伊無用武力，強迫你拜上帝。總是人若硬心也會阻擋聖神的感動。因為人若趁私慾，聖神就無法度通做工佇你的心內，總是伊替你憂悶。毋通拍化(hoa)聖神，阻擋聖神的工作。（I帖5：19）

3保惠師會予你捌真理。

  聖神是真理的神。今日的世界需要真理的神。世界現實充滿白賊，鬥爭通驚的事。佇人類歷史是驚惶的時代。千萬人親像坐佇失落的碇(tiāⁿ)的船中佇海面teh漂(piau)流，因為人無真理，袂明白(be̍k)是非。只有聖神會引chhoā咱佇現世到佇來世。沿海某一間教會有兩位的青年佮未信者8位的青年坐發動機的船去討海。這兩個信主的對駛船無甚物經驗。不幸拄著風颱，無法度通駛船，出在船去漂(phiau)流佇海中。總是這兩位的青年有信心，拄著危險祈禱倚靠主，真奇妙，這兩位的信主的青年無放棄船予伊漂流，那祈禱那駛船，平安到厝。致到予8個未信者的青年受感動欣慕拜上帝。轉來才知教會全體切切替in祈禱。

  聖神就是保惠師，是咱的先生。咱若疼主遵守主耶穌的命令，就欲賞賜保惠師予咱，就是真理的神。2000年久的教會歷史上果然證明聖神咧(teh)扶持教會，做先生咧(teh)引chhoā教會。今日咱台灣教會猶原屬佇世界的教會，同時屬佇無看見天頂的教會，得著聖神的引chhoā保守到佇今仔日。咱的教會著復原倒轉來初代教會的精神，疼主守主的誡命，得著聖神的充滿。咱的教會已經進入第2世紀，真需要聖神保惠師的引chhoā。咱也愛檢討咱的疼主守主的誡命無夠額。咱愛悔改佇主的面前。才會通得著聖神保惠師永遠佮咱徛起。

主講，「因為我活，恁也活。」佇這個緊迫的時代，咱需要追求聖神佇咱中間，予咱有豐盛的活命，來實現以馬內利的事實。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461