陳皙宗博士就任台灣神學院院長
1968.06.01 1031號P.7
台灣神學院創設86年來，頭一擺由本地人做院長的陳皙宗牧師，5月9日下午兩點佇該院禮拜堂舉行就任典禮。典禮由北部大會議長吳清鎰牧師主持。來賓的中間來觀禮佮代表致詞的有：總會總幹事鍾茂成牧師，台南神學院院長宋泉盛牧師，佮衛理公會的代表等200外名。
陳皙宗牧師就任台灣神的學院的院長以後，伊有發表一篇就任演講，佇演講的中間伊講，「教會就是傳上帝佇耶穌基督內面，道成肉體的福音；人若踮佇耶穌基督的內面，才有向望佮活命。」陳院長閣講，「今日神學教育的危機就是只有注重學問，理性的研究，忽略信仰的造就。所以今後的神學教育著忠實佇聖經的 考察。Siāng時也著配合倫理道德，信上帝，傳上帝。以外也需要疼的教育佮實行疼的教示。按呢造就出來的工人才會通貢獻社會，榮光上帝，利益眾人。」
典禮煞，台灣神學院有開茶餅會招待來賓，向來賓說謝。對陳皙宗牧師做台灣神學院院長以後，該院董事長宋泉璋長老真向望此後該院會進一步佮台南神學院合作，相佮計畫神學教育的方針，努力充實神學教育的內容。 |
