Kam-lîm oa̍h-chuí
1968.06.01 1031 hō P.10
Pe̍h-chuí-khoe ū chuí lah! Kóng-khí Pe̍h chuí-khoe chiū siūⁿ tio̍h Eng-kok soan-kàu-su Kam uî-lîm Bo̍k-su tī 97 nî chêng tī chia thoân-tō hiám-hiám hō͘ thó͘-huí pàng-hé sio sí ê kò͘-sū.
Hiān-chāi chit-chng iáu ū 40 goā hō͘ ê chū-bîn, kàu kū-nî in ta̍k-ji̍t tio̍h kiâⁿ chin-hn̄g ê lō͘, lo̍h chin kiā ê soaⁿ, chiah taⁿ chi̍t tháng chuí lâi ēng. Taⁿ ke-ke hō͘-hō͘ thang tī ka-kī ê chàu-kha choān chi̍t ê chún-lêng-thâu chiū ū toā káng chuí chhiong-chiok thang ēng. In-uī in tit-tio̍h Ka Tiong siā-hoē ho̍k-bū-pō͘ ê chí-tō kap pang-chān, tit-tio̍h Hok-lī-hoē ê í kang tāi-chín ê pang-chān, tuì 5 kong-lí goā ê koân-soaⁿ, khioh oa̍h-choâⁿ chuí lâi tī kàu-hoē ê lāi-bīn ê thiok-chuí-tî.
Chit ê kang-sū í-keng lóng oân-sêng, tī 5 ge̍h 22 ji̍t kú-hêng thong-chuí tián-lé. Tong-ji̍t ū Hok-lī-hoē ê hù Chú-se̍k An Tek Bo̍k-su, í-ki̍p Ka-gī Tiong-hoē siā-hoē ho̍k-bū-pō͘ ê pō͘-oân téng 6 miâ khì hù chit ê ū ì-gī ê tián-lé. Hoē-tiong Pe̍h-chuí-khoe kàu-hoē sàng chi̍t ki kím-kî hō͘ Hok-lī-hoē, lāi-bīn ū siù 4 jī"Kam-lîm oa̍h-chuí" （甘霖活水）, ì-sù sī kì-liām Kam uî-lîm Bo̍k-su chá-sî lâi chia siū-khó͘ thoân-kàu; hiān-chāi Hok-lī-hoē pang-chān ū chhiong-chiok ê lim-chuí, koh thang piáu-sī Chú Iâ-so͘ sī oa̍h-miā ê chuí.
Pe̍h-chuí-khoe uī-tì tī Pe̍h-hô chuí-khò͘ ê tang-hoāⁿ, saⁿ bīn ū chuí-khò͘ ê chuí uî teh. Chóng-sī in beh tit-tio̍h chuí chin khùn-lân, te̍k-piat tī tang-thiⁿ. Tiong-hoē Siā-hoē hok-bū-pō͘ tiau-cha chit ê siau-sit, chiū phài lâng koan-sim hú-tō, kiat-kó kè-e̍k tuì 5 kong-lí hn̄g ê koân-soaⁿ khan choâⁿ-chuí lâi ēng.
Pe̍h-chuí-khoe chū-bīn tû 2,3 hō bī-sìn-chiá goā, lóng sī Chú-lāi ê hiaⁿ-chí, in iok muí hō͘ pêng-kun chhut 600 kho͘, kî-thaⁿ Siā-hoē ho̍k-bū-pō͘ hū-chek tiû-pī. Kang-sū khai-sí ū choē-choē khùn-lân, poâⁿ-soaⁿ kè-niá khan sok-ka ê chuí-kóng, si̍t-chāi bô iông-īⁿ. Chóng-sī uī-tio̍h ài tit-tio̍h chuí ê sim chhiat, tāi-ke ka-tī ê khang-khè pàng-teh, ló͘-le̍k kang-chok. Kiat-kó chiàu só͘ goān chi̍t Eng-chhùn ê chuí-kóng ū pá-pá ê choâⁿ-chuí goân-goân lâu lâi, hō͘ chit ê kè-khì ta-sò ê soaⁿ-téng tit-tio̍h lūn-te̍k. M̄-nā kan-ta lim-chuí ū kàu, koh iā ū chhun thang chèng ké-chí. Tit-tio̍h Ka-gī Phok-ài kàu-hoē Chhoà Tong-iāu Sian-siⁿ chèng-sàng ké-chí-chai, kuí-nî āu, kàu-hoē ǹg-bāng iā ū chi̍t pit ê siu-ji̍p. Goān Chú iā chiong oa̍h miā ê chuí lūn-te̍k chiah ê hiaⁿ-ti chí-bē.
