今日公報社
蘇天明
1968.08.15 1036號P.3~p.4
公報社這個名佇台灣教會史已經有84年的歷史。過去做台灣教會屬靈刊物的供應中心。現時佇大都市有各教派的文字中心，所以公報社佮所有的文字中心成做同工來供應教會佮信徒的欠用。現時做重視的工作有幾項。
1. 鼓勵讀聖經：以前聖經公會佇台灣的工作，攏是交代公報社一手包辦；現時聖經公會佇台灣有辦事厝，家己直接辨理業務，所以公報社毋但是推銷聖經，應該著出版較濟種鼓勵信徒讀聖經的小冊。
2. 宗教音樂的冊：現時教會的音樂水準亦不止進步，濟濟青年人唱聖詩以外，猶過愛唱別款的詩歌。對佇聖歌隊的合唱曲，學生的聚會愛唱的，T.K.C.的同樂佮教會足節日的歌輯，抑是基督化家庭的詩歌等，應該加強出版。
3. 加強出版物：倍加運動的年間，對P.K.U.有出版淡薄冊，總是這幾年攏真少新的出版物。現時計畫新的出版就是：(1)信仰叢書，(2)生活叢書。對這兩方面加強鼓勵寫作的人，佮鼓勵讀者來推行文字工作。
4. 公報佮榮光。現時過度期，所以公報照常用白話字來寫，做總會佮各中會的公報通訊做中心。以外有聖經講解，信息等。予教會佮教會有連絡，來發揮有機體的活動。榮光是用中文，做造就信徒的路用，無有消息，現代的青年人會曉讀中文，所以注重這方面的需要來發行。
5. 少年刊物：現時台灣兒童的就學率，目前達到100分的97.2，是佇東南亞的國家中排頭位。現時全省的國民學校有2143間，在學的大專，中學，國民學校的學生總共有325萬人，佔總人口的4分1，每4個國民中，1個是學生，其中第一濟的學生是國民學校；所以著用中文來寫合佇少年的刊物，通佇少年的時代造就in。
6. 基督化家庭的用品：申命記6：4－9，有講起基督化家庭教育的重要，戰後的東南亞教會強調-基督化家庭的運動，對這個運動所需要的圖畫佮用品，應該對遮供應到各家庭。
7. 佮教會連絡：對8月起有專任的經理許德謙牧師，佮編輯主任陳添登牧師來負責，現時有3名傳教者佇遮做工，所以佇禮拜日in受派到各中會的教會來請安佮介紹公報社的消息，予公報社佮教會佮信徒有連絡，才會知影大家的需要，通供應逐項的物件。
這個是目前暫時新的方面的計畫，猶過佇不時改進中的路站。除去遮的以外，猶過較大的問題咧研究，就是佮外教派的合作，新的工場，新的事工的研究。 |
