1969 nî 2 goe̍h p.22
BOÁN HIÔNG-CHÂI BO̍K-SU TÂN HO̍K-SENG BO̍K-SU
TUI-SU LÉ-PÀI

Jī ge̍h 4 ji̍t siōng-ngó͘ kài-siāu kok kàu-phài kok ki-koan tāi-piáu í-ki̍p sin-jīm ê soan-kàu-su liáu-āu, ū kú-hêng Boán Hiông-châi Bo̍k-su í-ki̍p Tân Ho̍k-seng Bo̍k-su ê tui-su lé-pài. Boán Bo̍k-su tī lán Tâi-oân kàu-hoē choè Soānkàu-su 40 nî kú, tng Tiong-o̍h ê hāu-tiúⁿ, Kong-pò-siā ê chú-pit kap keng-lí, í-ki̍p Tâi-lâm Sîn-ha̍k-īⁿ ê īⁿ-tiúⁿ. Tī kū-nî 12 ge̍h 27 ji̍t siū Chú só͘ tiàu lī-khui sè-kan. (Boán Bo̍k-su ê seng-pêng siông-sè í-keng kài-siāu tī 1 ge̍h hō Kong-pò). Chóng-hoē ū chhiáⁿ Iûⁿ Sū-ióng Bo̍k-su lâi kóng Boán Bo̍k-su ê lio̍k-le̍k. iā ū chhiáⁿ Chiong Khé-an Bo̍k-su kài-siāu Tân Ho̍k-seng Bo̍k-su ê seng-pêng, liáu-āu choân-thé khí-li̍p 2 hun-cheng ê be̍k-liām.
Tân Ho̍k-seng Bo̍k-su sī phài tī Má-lâi-se-a ê hái-goā soan-kàu-su, hiān-chāi tī So͘-kek-lân teh kong-tho̍k phok-sū ê ha̍k-uī. Lūn-bûn í-keng oân-sêng ū-tēng 4 ge̍h kiat-sok, bô phah-sǹg, hut-jiân náu-ek-hiat pia̍t-sè. Chiong Khé-an Bo̍k-su tī kài-siāu tiong kóng, Tân Bo̍k-su kin-nî chiah 43 hè, siàu-liân sî tha̍k Su-hoān Tāi-ha̍k. Liáu-au ho̍k-bū tī Ki-tok-kàu san-tē I-liâu-thoân kuí-nā nî, jiân-āu khí Eng-kok Gô͘-seng Tāi-ha̍k, tit-tio̍h Bûn-ha̍k-sū. Koh chìn Pho-lûn-su-tun Sîn-ha̍k-īⁿ tit-tio̍h Sîn-ha̍k-sū (B. D.) kap Sîn-ha̍k-se̍k-sū (M. Th.). Tuì Kū-io̍k ê gián-kiù put-chí ū sêng-chiū. Chiū tò-lâi Tâi-oân Sîn-ha̍k-īⁿ jīm-kàu. Hit-sî ū kap Lí Tiâu-hui Tiúⁿ-ló ê toā chhian-kim kiat-hun. Bô kú siū Hái Soan ê phèng-chhiáⁿ choè hái-goā soan-kàu-su khì Má-lâi-se-a thoân-tō. I ū 2 ê chhian-kim hiān-chāi 7 hè kap 5 hê.
Tân Bo̍k-su bo̍k-hoē chin sêng-kong, choè jio̍k-chiá ê pêng-iú; bat ū chi̍t ê siū phoàⁿ sí-hêng ê lâng, tit-tio̍h i muí-ji̍t khì kā i an-uì kap kàu-hùn, sui-jiân kàu-hoē bô hoaⁿ-hí i án-ni choè, chóng-sī āu-lâi chit ê lâng ū tit-tio̍h tháu-pàng, tī Ki-liông-pho khui chhâi-hông-tiàm. iā bat chi̍t-pái, hoē-iú ê cha-bó͘ gín-ná hoān-tio̍h gâm-chèng, i ēng chhia tuì Kū-lâm chài i kàu Sin-ka-pho tī-liâu, thoè i siat-hoat ta̍k-hāng ê chhiú-sio̍k.
I iā-sī ióng-kám ê lâng. I bat tng Seng Má Tāi-hoē ê iàu-chí, ū hoat-giân choē-choē ióng-kám ê oē. I kóng, bô kóng boē ēng tit, ná-chún ū Sèng Sîn kám-tōng i tio̍h kóng. āu-lâi ū siū soán choè Sam It Sîn-ha̍k-īⁿ ê táng-sū-tiúⁿ, soà-chiap siū phèng choè kàu-siū. I tī hia ê tiong-kan sī chi̍t-ê choè siū ko-chhim ê kàu-io̍k ê.
Khó-sioh tī 1 ge̍h 29 ji̍t pia̍t-sè, che-sī Tâi-oân kàu-hoē ê sún-sit, iā-sī Seng Má Tāi-hoē ê sún-sit.
Tân Bo̍k-su ê kò-pia̍t lé-pài tī 2 ge̍h 1 ji̍t siōng-ngó͘ 10 tiám 45 hun tī Ai-teng-pó chhī-lāi Bō͘-teng Pin-gî-koán kú-hêng, soà hé-hoà. Kò-pia̍t lé-pài sī chêng-jīm Tang Lâm A Sîn-ha̍k hia̍p-hoē kap Ki-kim-hoē ê Chip-hêng kàn-sū Pò͘-lo̍k-bîn Phok-sū Chú-chhî; koh ū kò͘-jîm ê lūn-bûn chí-tō Kàu-siū Pau Thian-sù Phok-sū, An Tek-sùn Phok-sū saⁿ-kap lâi chú-chî. Hiān-jīm Eng-kok Tiúⁿ-ló-hoē Hái-goā Soan-tō-hoē Kàn-sū An Bō͘-lí Bo̍k-su kap Bo̍k-su-niû ū tuì Lûn-tan choan-thêng lâi hù-hoē. Kò-pia̍t-sek tû chhin-cho̍k í-goā ū 100 goā miâ chham-ka. (Phian-chiá)
Koan-hē Tân Hok-seng Bo̍k-su khah siông-sè ê sū, chhiáⁿ Pún-siā hoat-hêng ê "Eng-kong-pò 3 ge̍h hō.