首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 宗教Ê進化
宗教Ê進化 影像(4)
卷期：第 2 號 本次： 日期：1925/10 刊名：芥菜子 頁數：20-23
篇名：宗教Ê進化 [ CHONG-KÀU Ê CHÌN-HOÀ ]
作者：劉奇水 Lâu Kî-súi
  顯示 : 漢羅 全羅 並列  

宗教Ê進化

　　人若研究比較解剖學kap胚胎學，就不得不著承認進化ê你。所以研究比較宗教學，就不得不著承認宗教進化是事實。干但照美國來論，對1893年，世界宗教會議（聚集佇芝加哥市）漸漸已經有人承認各宗教to有sio-siāng ê點，也有重處ê所在。也同時赴會ê人，已經刺激--著著研究別宗教ê要緊，了後，就知基督教中濟濟要緊ê教義是對久久ê源頭來--ê。著者佇遮無ài詳細討論宗教進化ê增差，所講是簡單若定；因為這個-ba̍k有濟濟gâu ê學者已經研究不止清楚，續顯出宗教ê宗教，確實捌經過歷史進化ê順序，無khah輸社會ê組織kap人ê智識。

　　論到彼个進化ê順序，就是對佇野蠻部落（野蠻部落）ê信仰kap行為，直到基督教，最高尚ê教kap理想。這款進化ê理用舊約kap新約做上好ê例證。因為彼內面所記攏是猶太人ê宗教ê發達史。是對佇袂啥物開化，部落ê信仰kap習俗，來chhōa到世界絕無最高尚ê宗教理想kap道理。

　　柏克驢（Buckle）講智慧是歷史內ê活動力若是情感是固定--ê。這無錯，感情kap本能確實是比智慧khah固定。來比並身軀ê遺傳kap進化，是比社會ê遺傳kap進化koh-khah固定。試想前ê人所留teh予咱thang承受ê位置思想，或是野蠻ê宗教理想無毋顯出時代的ê誤謬，這毋限定佇普通開化時代若定，連佇智識kap文化已經發達ê高尚程度ê人也袂免得。對遮thang知情感宗教確實是固定--ê。柏氏ê話無錯

　　Koh越倒轉來想19世紀，已經承認信基督教ê人佔佇大部份，若是猶踮頑固、烏暗ê ê內面。伊ê歹無khah輸無信ê人。

　　若是今仔日所講號做信者常常有嫌耶穌ê教示，攏佇普通上，siuⁿ懸，過善（過善）毋thang si̍t-êng。想到遮姑不衷著想出這個問題就是，人類佇宗教中究竟有進步á無？

　　伊奈斯瑪士（Erasmas）ê預言講：「同時愚蠢ê感情宗教干但用50年ê壽命就會thang消滅。」福樂達爾（Yoltaive）講「舊ê宗教佇智識ê人ê中間已經早早就抹消lah！總是雖然，教育、普通智識，kap社會組織ê進步不止緊，毋過伊是反對理性，用感情做主體。毋若工業上（古代宗教）尚且干但猶原存在。

　　感情kap宗教是親像身軀ê組織，kap本能也會進化，不過時間是慢慢；毋過若用khah大ê眼光來看，就會thang看見伊ê進化kap進步。設使若智識kap社會to有進化，就人對佇宗教觀念也的確有進化。因為按呢逐宗教ê教義kap 介明，是對佇超自然界ê啟示。也彼个啟示著有kap人所達到ê進化階級相kap和合（互相適應）　保羅佇雅典演說中，大概thang明白是指宗教這款ê發達是關係對拜物、拜像，到佇（主活佇hit中間，動作佇hit中間，來得著家己ê本體ê這個）使徒17:23-31。

　　幼稚ê宗教專專是感情的，大概是對恐怖生出。顧德（德國ê詩翁）捌寫幼稚ê宗教講：「只有是恐怖kap敬畏。」佇khah低ê野蠻時代中愚蠢ê百姓所拜ê無出佇這款。家族的、部落的ê神是kap彼部落所有靈性á是無靈性ê物像sio-siāng。對這款物像來用禮儀來服事、來求福氣。到佇小可khah進步ê野蠻時代，就用物像來做神ê像。毋是神本身。這就是偶像。對遮thang知是用物來代表袂看見ê神。

　　野蠻人拜這種偶像，來獻祭祀、獻犧牲，是因為ài得著伊ê幫贊，或是戰爭、或是活命。連佇近代ê宗教中有這款物像主義ê份子也袂少。親像拜先聖ê遺骨（先聖遺骨）神聖遺品（神聖遺品）是在內。今日開化社會mah，智識上猶有算袂了ê野蠻人ê君子佇teh。伊ê宗教猶原是拜像主義。野蠻人家族的ê神、暴力的ê神，或是禽、或是哭，雖是無靈性猶久信伊做部落ê祖宗。常常用這款部落ê神ê名來號彼个部落ê名，ǹg望彼个部落會得著彼个神ê性格，也彼个神會thang替in交戰，求福續刣對敵。這連佇近代民族中也有這款ê喉叫，親像Au-chiàn中常常聽見喉叫ê聲講「咱日耳曼各老ê好神ah！」這是上好ê證據。Koh khah懸ê宗教是比信部落ê神koh-khah高尚，就是拜天頂ê日、月、星辰，kap自然界。這種宗教開化á半開化ê民族中初期ê一景。親像埃及、希臘、印度、中國kap墨西哥攏有一款部落的ê神ê思想會引chhōa到無數ê小神。若是拜自然界ê，（特別拜天ê宗教）是ná久ná減少神ê賬額，Koh懸一級ê宗教就是（anthropomorphism）用人ê像á是拜一神教（Homeiheism）這款ê敬拜ê對象，就是這個khah偉大koh完全像ê人。這種敬拜可見已經承認人ê心思，kap靈性是自然界中，上高尚、最第一貴氣。這就是佇幻想中，siāng類--ê，欲來綜合一个超越的、會thang敬拜得--ê，袂免得真為難。所以這款性質會生出濟濟神（多神）

　　因為埃及、希臘、羅馬就有無數ê人像神。像soah尾敬拜ê，外部對象lah、物像lah、偶像lah、自然勢力，á是人像神就攏總除去，也主觀上，思想ê宗教生出來。彼號物質ê對象，就得著高升變化。對自然勢力kap人ê志向，就綜合成做這个普遍的、永久的ê精神，這個叫做全智、全能、完善；毋過這款高尚ê神觀，有及初期幼稚宗教中siāng款份子合起--ê。

　　對按呢宗教ê系統kap科學、政治，siāng款。伊ê進化的確有散、有合，有siah，有kap初期ê意思、形式和合。

　　Taⁿ thang知，佇所有宗教中上幼稚ê，也有倫理、道德ê份子佇teh。總是siāng事先ê宗教，這款ê份子是綱領要道若定。

　　有人講：佇幼稚宗教中無倫理道德佇teh。這毋是確實ê理論。因為佇家族的ê神、部落的ê神，對佇別個部落kiám-chhái是罪惡；若是佇本族是teh保護，賞賜福氣ê神不過這个時代ê倫理是khah he̍-te̍h若定，若是佇長久ê kap進化，就長成到佇別ê部落、別種族，kap國家若保護。猶太人ê先祖，亞伯拉罕、以撒、雅各ê上帝，經過長久歷史ê發達，到今仔日chiah成做普天下主宰，kap人類ê天父，這koh-khah合佇頂面所講宗教進化ê理。

　　有人拍算，宗教ê進化就是破害宗教ê價值kap意義，kiám果然有影？若有也個人ê發達是破害人格ê價值，á是人類ê進化是敗壞人類ê贏過萬物，獨一無二ê，ê品格。按呢kiám袂講得？

　　其實關係人類，人格宗教所要緊ê事實，不在佇原始；是在佇進化所達到ê境地，kap結局若定，所有ê發達是種種算袂了，攏是奇妙oh得講：thang直直講奇蹟，總是究竟是事實。對佇極細、簡單ê細胞到佇極複雜ê身體kap本能以及心思。對佇幼稚ê原性物到佇無數ê生物遍滿全地球，續講生物ê進化，soah尾是人類。對初期ê社會（家族kap部落）發達到佇近代文化複雜ê款式，kap對佇幼稚ê囡仔á是野蠻人ê信仰發達到佇最高級ê宗教kap文理，是世界所無，也前未捌所看見ê。這个理確實是予咱袂thang否認得，若是咱承認彼个進化ê跡kap階級，總是無thang詳細知彼个所以然。試想對佇細胞、原生動物，或是野蠻ê社會，或是幼稚ê宗教，發達到奇妙oh得講：這kiám毋是其中ê奇mah？
 
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461