II. Siàu-liān[sic.] kò͘ Khó͘ Téng Tiúⁿ-ló
678 hō 1941.09 p.11-12
(Chhoà Tō͘-tēng)
Saⁿ-cha̍p nî chêng tō-lí thoân-ji̍p Pak-káng, chóng-sī Pak-káng Má-chó͘ ê iâⁿ-chē iáu sī bān-têng-uî phah bē ji̍p. Kàu-hoē ài beh kiàn-siat, kàu ta̍k só͘-chāi bô lâng beh chiong i ê chhù lâi soè chò lé-pài-tn̂g. Ti̍t-ti̍t chhoē, kàu choè-āu tit-tio̍h khó͘ Téng Tiúⁿ-ló ê bó-chhin, hoaⁿ-hí chiong i ê chhù lâi soè chò pài-tn̂g, sīm-chì koh soè khah sio̍k, si̍t-chāi chin kai-chài.
Goân-lâi Khó͘ Tiúⁿ-ló ê bó-chhin chia̍h-chhài, ài beh kiû pêng-an ê lō͘, tī teh chhoē oa̍h-miā ê pún-goân ê lâng. Tī chia̍h-chhài ê siu-hēng bē thang hō͘ i tit-tio̍h sím-mi̍h. Só͘-í chi̍t-sî chiong i ê chhù soè chò pài-tn̂g, iā pún-sin ta̍uh-ta̍uh lâi thiaⁿ, lâi gián-kiù.
Jiân-āu Sèng Sîn khui i ê sim-mn̂g, i pàng-sak chia̍h-chhài lâi sêng-siū Siōng Chú ê hok-im. iā khan-kà i ê kiáⁿ-jî soà-chiap tī tit-kiù ê lāi-bīn. Tng-sî Ô͘ Tiâu-ki peh tī chia teh bē chheh, soà kóng tō-lí, sui-bóng siū-tio̍h chē-chē ê khún-tio̍k, chóng-sī i bô lún-neh, chhut-la̍t uī Chú chò kang. Só͘-í kàu-hoē chiām-chiām chìn-tián!
án-ni Khó͘ Téng Tiúⁿ-ló in chi̍t ke sī Pak-káng kàu-hoē chho͘-tāi ê sìn-tô͘, tiúⁿ-ló pún-sin sī Pak-káng kàu-hoē ê tē-ki, iā hō͘ phí-jîn éng-oán thang siàu-liām. I chiong ka-tī ê chhù-the̍h sio̍k-sio̍k bē hō͘ kàu-hoē chò pài-tn̂g. I m̄-sī hó-gia̍h, khek-kí pún-sin uī-tio̍h kàu-hoē chhut-la̍t, bô hiâm ià-siān, bô hiâm kan-khó͘. Sî-sî ēng Chú ê khuì-la̍t lâi an-uì i ji̍t-ji̍t ê seng-oa̍h nā-tiāⁿ. Lé-pài-ji̍t nā ū pa̍t-uī ê sian-seⁿ, á-sī tióng-chip lâi chò chú-lí, i chiū chham sin-thiaⁿ ê hoē-iú lóng àn-nāi khì in tau. Sui-jiân sī bô hó koè, chin hoaⁿ-hí lâi hiàn tī Chú ê bīn-chêng.
Siūⁿ kàu i uī kàu-hoē chē-chē têng ê lô-le̍k, koh tī i siū Chú chín-tiàu ê sî, phí-jîn bē tit thang sàng i ê uî-hâi, si̍t-chāi tuì sim-té chin bē tit koè. I ê só͘ kiâⁿ, chi̍t-hāng chi̍t-hāng chhin-chhiūⁿ cháu-bé-teng, pháu-cháu tī goá ê ba̍k-chêng, só͘-í sui-bóng sī bē thang siá khah chheng-chhó, iā siá chit kuí kù lâi siàu-liām i.
Soà chhim-chhim khún-kiû oa̍h-oa̍h ê Thiⁿ Pē si-in tī i ê uî-cho̍k, an-uì in. iā goān i ê uî-cho̍k, í-ki̍p Pak-káng kàu-hoē it-tông thang toè i ê kha-pō͘, lâi chīn-tiong hiàn hō͘ Chú. À-bēng.
