巡教會
1902.02 203卷p.11
舊年11月11號(舊曆10月初一) 廉牧師出外巡彰化屬的教會。禮拜日，11月24號，佇彰化行洗禮予3个大人佮4个囡仔；也有揀人當職任，就是許進傳做長老，王金池做執事，閣後禮拜chiàⁿ有設立。十二月8號佇鹿港行洗禮予4个囡仔；也有設立游天和做執事。現時傳道先生陳有成蹛佇遐。閣停一禮拜佇Ka-tâu行洗禮，守晚餐；彼日有一人入教。佇這所在已經有傳道理三年久，總是前袂捌佇彼間福音堂行聖會的禮數。
後來廉先生入去埔里社經過三禮拜。舊年日本官開一條新路，所以現時比早年較快出入。遐的教會卻照舊平常，無啥物進步。佇烏牛欄有一個姊妹自細漢受洗禮，taⁿ有准伊就近晚餐。也佇牛困山牧師行洗禮予兩个兄弟大湳的兄弟姊妹過去牛困山守晚餐。彼日會友揀當職的人；潘Kai-tan猶原做牛困山的執事，總是舊時做大湳的執事潘āu-nâ退任，潘A-uî就接伊的缺。
對埔社出來牧師歇兩暝佇草鞋墩，然後就溪湖守禮拜。佇遐有一人領洗禮入教。這也是新設的教會。後來對東大墩佮大社去內社，佇遐守晚餐。彼日行洗禮予一个姊妹。對遐轉來落南，佇社頭崙仔踮幾日也有過去溪口看看。卻有濟濟人來求入教，攏共有26人，中間有7个領受洗禮。可惜有三人予長老會禁晚餐。
佇新曆正月28號(舊曆12月19) 廉先生閣再到府城，出外兩月日較加；一路攏平安無事。 |
