首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 公論事理
公論事理
卷期：第203張 本次： 日期：1902/2 刊名：台南府城教會報 頁數：13-16
篇名：公論事理 [ Kong-lūn Sū-lí ]
作者：
  顯示 : 漢羅 全羅 並列  

公論事理

1902.02   203卷  p.13-16

 

I. 論禮拜日倩車

論到倩車佇禮拜日來倩有合宜無？照阮咧想差不多有兩爿的情理佇咧；袂得一定講通，抑是毋通；著略仔分別事情，才通別是非。因為佇安歇日也有通也有毋通的所在。

1. 論通倩。論到愛知通倩的情理咱袂免得著略仔想耶穌當時佇世間佮猶太人所辯駁的話才會較知彼个意義，袂通隨便做得。親像耶穌捌引起Tāi-pi̍t枵佮跟綴伊的人入上帝的宮食排列的餅的故事。又閣講毋是因為安歇日來設立人，是因為人來設立安歇日(可。2：23-28)。照這號話意共伊想，是佇安歇日若有通利益人，救人的身軀佮靈魂-的，上帝也歡喜，又是上帝的意思；因為上帝設立安歇日是佇彼日予人得著真實的福氣；毋是空空設規模來把縛人nā-tiāⁿ。所以照阮咧想佇禮拜日猶原有通倩車的理氣。論通倩車的事，卻有蓋濟款不過大略來講明一兩項就好。親像：－

1)若有人拄著危險症，佇遐若無醫生，又著來較遠請醫生，毋過路遠，醫生若較慢到驚了過症救袂著，醫生若坐車敢有甚物毋著？

2)設使有人來聽道理，離拜堂5，6舖路，若搭火車來聽道理敢有甚物毋著？照阮想大略親像這號事佇安歇日來倩車是無甚物毋著，不過是著看事來倩nā-tiāⁿ。

2. 論毋通倩。論到毋通倩的理氣咱大家卻略仔知這个安歇日設立的意義，是欲予人身佮心受利益交陪上帝。今上帝是神拜伊的人著用神用誠實(翰。4：24)若欲用神佮誠實的確著較靜無甚物攪擾，親像人若欲激甚物事，永是頭殼向向，目睭瞌瞌，曉明用心神咧想。所以人佇安歇日掠彼日做交陪上帝的日，照法毋通予甚物外事來攪擾，也著放捒世間的事情。因為按呢人若是佇安歇日隨便來倩車算是較攪擾，所以講毋通倩。毋通倩的因端卻也蓋濟款，咱大略知；不過阮來講起一兩項，親像：－ 

1)若有人佇安歇日欲去守禮拜，也本身會行，又閣4，5你路 nā-tiāⁿ，若彼个人愛坐車較身爽，按呢敢會用得mah？照阮想毋好。

2)若有人佮朋友有生理的事著參詳，毋過路頭幾若舖，下晡時禮拜煞倩火車來去猶會到，若是這款來倩火車敢好mah？照想毋好；猶有別日。照想若親像頂面這號事較好毋通倩車，因為這算是會免得的代誌，所以較好毋通予伊攪擾著咱的心神。

今照阮所想佇安歇日倩車算是也有通，也有毋通的所在。兄弟姊妹若愛問通，抑是毋通，若欲問人驚了較無人敢決斷，也較無妥當，有時講了愛錯。阮想佇安歇日若欲倩車著用良心來問咱的好朋友耶穌，咱無論到佗位伊也佮咱佇咧，不止利便。伊若共咱講的咱去行就好，也毋免驚毋著。總是著要緊一兩項，就是若拍算毋通-的著省察，看咱的心有犯著猶太人的固執彼个錯抑無(看路加6：6-11。)若拍算通的，著省察看咱的心有患著親像早巴蘭的騙良心違逆上帝的命令去咒詛以色列百姓，彼號錯抑無？(看民。22：20-35)。In為人若愛拄好著，就是著憑良心趁聖神，毋通趁私慾(看羅馬8：6。)才免失誤來陷落罪啦！

                                      嘉義會友議論-的。

 

    照我的愚戇所觀看，的確毋通坐。按怎樣毋通坐咧？因為六日中間逐人著專務伊的工，到七日就是聖日。逐人著停世間的代誌，因為六日所著磨-的是為爸母，某囝，本身的欠缺。七日是上帝的安歇日欲專心守誡命；專務心服侍耶和華上帝，所以會友佇這日是著專務心為永遠活來著磨，就是聽聖經的教示，講究聖冊，問聖冊的道理，做養飼良心心神。咱知若無讀聖經無聽道理咱心神枵餓無平安。

所以會友著做世間人的光，因為世間人離開上帝遠遠攏無守安歇日，來感恩歸榮光上帝。所以in攏是為家己暫時活的代誌nā-tiāⁿ。咱的心著大體貼in，所以毋坐火車，火薰船。又這安歇日是上帝所設-的，袂移易得，吩咐人攏著守。救主降生，成做人，伊也是對重安歇日。伊常常照例入會堂，守安歇日，讀聖經講道理教示人。婦人人欲備辦芳芳的香料香油，照例安歇。保羅in一輩安歇日入會堂坐，讀律例先知的冊明白。因為對古早以來逐个城，逐个會堂，逐个安歇日讀摩西的聖經來傳伊的道理。對救主降生佇地面上，設立伊的教會，代代信靠伊的人歡喜守安歇日。安歇日是我的聖日；恁著用這日做通歡喜通尊重服侍我，無做工，無歡喜啉食，無照家己的意思，無講白賊話。

    今將有守安歇日佮無守安歇日來相比並。受安歇日的國興旺，毋守安歇日的國衰微，守安歇日的人咧興旺，毋守安歇日的人衰微，這毋是對人的gâu著磨，是著對上帝的祝福氣。在生前無守安歇日，死後就無通佇天裡安歇。用心用神拜上帝是佇這个日，讀聖經，傳道理教示人。教示的代誌通行，慈悲的工通行，就是醫病，賑濟sòng-hiong艱苦欠缺的人。有甚物艱苦著相照顧，相勉勵，軟弱-的著相扶持，相保護。安歇日的大道理，聖經四十外所在有記載，十誡的一誡就是第四條誡有記載。

安歇聖日著歡喜，

用心專務聽道理。

六日勤做主保庇，

安歇全守有福氣。

烏牛欄胡Tiāu-ki寫-的。

 

 

 

 

II. 論發傳道的薪金

論到發傳道的薪金這層事；也是袂通直直來決斷講交教士發較好，抑是對教會領較好；因為，兩面攏有較好，也攏有較毋好的所在佇咧。又所講交教會發有較好較毋好，也著看教會來講，也袂通講定著，因為教會的情形無攏相siāng。所以教會也是有分別，袂通講交教會就攏毋好。今阮愛將一等的教會佮教士來比彼个較好，較毋好的所在，就略仔知這層事有兩難的所在。

    1. 論對教士的好佮對教會的毋好。論到教士來發的好有：－

    1)教士所發的銀攏是73銀，毋免親像對教會領，有彼號教會當職的人毋捌世事，有時愛提68銀予傳道的人。又有時提彼號無夠重剾削-的是準一个。設使欲叫傳道的人來共伊討，伊是較毋愛，因為是做先生不比親像做kho͘-lo̍h的人就較敢佮頭家計較：若是做先生的人永是有較畏的性。親像啞口的食苦瓜無話講，因為若欲講驚人笑，佮看輕。

    2)對教士領，若到時欲領無刁難的面色，也若有發或是一月，或是兩月做一个發。若對教會有時提無延延，有時提這一箍，兩-箍，有時提錢拗錢頭，按呢甲若親像討數，佮親像領kho͘-lo̍h銀一般，無甚物親像先生領薪金的體統；按呢會予傳道的人餒志冷淡，無面熱，是對這號因端。又這號當職的人不諳事理。若傳道-的講欲領錢，假若親像kho͘-lo̍h對頭家的派頭，有時應著無甚物聲尾，親像不止有權，開kho的派頭，刁難的面色，無勤快提出，iⁿ-iⁿ n̍gh-n̍gh。你共想做傳道的人伊的心會按怎？想本身來比就知。照阮戇想若按呢會致到餒志冷心，無面熱佇教會。

    2. 論對教會的好佮教士的毋好。論對教會領的好，照阮想有一兩項：－

    1)咱台南府屬的堂會散散毋是近近快到，若是對教會領銀算是利便，毋免親像對教士領，有時袂得通照月尾的期限就寄薪水予傳道的人；有時拄著較偏僻的所在，無拄好機會，有時過到一兩月日，設使若是本身無，抑是教會無當先借，就會致到鼎內咧飼魚啦！照按呢想對教會領毋免親像按呢的重難。

    2)現時教士無親像前倩擔批的人，行到逐所在的教會。教會若欲寄銀交教士著寄郵便局，教士欲寄銀予傳道的人，也大半著對郵便局兩爿攏著了一款的所費。設使對教會領就直直，無這層的chhia-poâⁿ，又毋免予牧師管這層數項的費氣，算是兩爿攏利便，傳道-的也利便。

    今照按呢想起來，這層事，算是兩面，攏有好，佮毋好佇咧差不多袂得通直直講佗一面較好。雖然是按呢毋過著用這兩爿來揀較小可害的來用。照所議論銀交教士的害算是較小可關係，交教會的害算是較傷重。所講交教會的害，卻毋是講逐个攏按呢；有的教會若予伊本堂發卻真好勢，比交教士較好；不過是咧想檢采有教會親像阮頂面所論彼號的害，所以才咧想著交佗一爿較好。

    今照阮咧拍算有一項的法度通來料理這層事，檢采會得著兩爿的好，也會除去兩爿的毋好，就是所設的條款這層事著予教士發。也予教士發這項是眾款，因為咱台南屬所費猶未攏擔當，傳道的猶未屬大會管，是屬教士咧管轄，若按呢交in設法是較著。總是所講交教士管，毋是講教士定著著發這層薪金，不過交教士是做親像規模nā-tiāⁿ。也教士著准傳道-的家己主意看是愛佗位領。若對教士領，教會著將in所出的交教士。阮想教會若無親像頂面所排列彼號的弊病，傳道-的佗一个愛對教士領來擔當彼个寄了不接一的費氣，佮擔當予當職的人無歡喜的心咧？阮想敢無人欲，若會愛對教士領也敢是因為出對不得已啦才會按呢。設使若有所在交代教士，彼款往來的郵便費猶原著予教會擔當，略仔顯明in的無設法。設使in若欲講。彼是傳道的無合阮的意，抑是無盡職阮才款待伊按呢。總是若按呢就著寫批稟明教士予伊定奪查虛實；若踮佇本堂猶未去別位，照發照禮猶原著款待伊做先生，毋通款待做kho͘-lo̍h，來失落體統。

                               嘉義會友議論的
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461