Thiah-li̍h Pa-piat[sic.] ê Tâi
1902.05 206 Koàn p.33
Sèng-keng ū kóng kó͘-chá ê sî thiⁿ-ē peh-sìⁿ kóng-oē lóng saⁿ-tâng, chóng-sī in siⁿ-khí kiau-ngō͘ ê sim kè-bô͘ beh khí-chō chīn-koân ê tâi, tit-tio̍h toā miâ-siaⁿ; án-ni chiū poē-ge̍k Siōng-tè lâi jiá-tio̍h phah-loān khiuⁿ-kháu ê chai-ē, tì-kàu tāi-ke lóng sì-soàⁿ.
Kiù-chú Iâ-so͘ boē chiūⁿ-thiⁿ ê sî hoan-hù ha̍k-seng tio̍h thoân hok-im tī thong thiⁿ-kha-ē. iā tī Jû-oa̍t-cheh kî Sèng-sîn kám-tōng ha̍k-seng, hō͘ in ē kóng ta̍k-kok ê khiuⁿ-kháu; án-ni-siⁿ kiám m̄-sī thiah Pa-piat ê tâi, hō͘ thiⁿ-ē ê lâng ē-tit thang thiaⁿ Siōng-tè ê toā thiàⁿ-thàng, toā koân-lêng？
Taⁿ kin-á-ji̍t tī Sèng-hoē ê tiong-kan iáu ū hit-hō châi-tiāu á-bô？ Káⁿ ū. Khoàⁿ Siōng-tè ê tō-lí àn-cháiⁿ-iūⁿ heng-ōng kàu bān-kok, kiám m̄-sī tuì Sèng-sîn pang-chān lâng ha̍k-si̍p bān-kok ê khiuⁿ-kháu lâi thoân？
Kīn-lâi Tāi-Eng-kok ê Sèng-keng-hoē ū chhut chi̍t-pún chheh kóng in-ê lâi-le̍k, só͘-í ū ìn kuí-nā hāng tī ē-té.
Tī 1802, chiū-sī chha-put-to 100 nî chêng, tī Lûn-tun-siâⁿ ū la̍k uī kèng-khiân ê lâng, sio̍k tī kuí-nā hō ê kàu-hoē, saⁿ chū-chi̍p beh gī-lūn, ū sím-mi̍h lō͘ thang pun Siōng-tè ê Sèng-keng hō͘ thiⁿ-ē ê peh-sìⁿ ē hián-bêng i ê tō-lí. Hia ê lâng put-chí jia̍t-sim; ū-ê sī hó-gia̍h lâng, kam-goān ēng in só͘-ū-ê ê ke-gia̍p lâi tê gîn, thang chiâⁿ hit ê sū.
Hit-tia̍p ê sî, Sèng-keng kan-ta ū hoan-e̍k tī kuí-nā kok ê khiuⁿ-kháu nā-tiāⁿ; só͘-í tāi-seng chē-chē nî, lâng tio̍h o̍h kuí-nā kok ê oē, lâi ēng ta̍k kok ê jī hoan-e̍k Sèng-keng.
Tī chē-chē só͘-chāi chū-jiân tāi-seng tú-tio̍h chó͘-tòng, kiáu-jiáu. Phì-lūn tī 1807 Má-lé-sūn Sian-siⁿ lâi Tiong-kok, tiàm tī Kńg-tang séng-siâⁿ; hit-sî koaⁿ-hú kìm-chí tha̍k-chheh-lâng lóng m̄-thang pang-chān goā-kok-lâng o̍h Tiong-kok ê oē, nā pang-chān beh chām-thâu. Só͘-í Sian-siⁿ chīn tio̍h-boâ lâi tha̍k, āu-lâi ē àm-chīⁿ chhiáⁿ chi̍t-lâng lâi chān i.
Tuì án-ni thang khoàⁿ hoan-e̍k Sèng-keng tī chē-chē kok ê khiuⁿ-kháu m̄-sī kín-khoài, sī bān-bān ê tāi-chì. Sui-jiân án-ni iáu-kú thang kóng, kàu kin-á-ji̍t, Sèng-keng í-keng ū ìn tī 360 só͘-chāi ê khiuⁿ-kháu. Che chin-chiàⁿ sī Siōng-tè toā siúⁿ-sù i ê in-tián.
Lūn lâng tī ta̍k-kok teh tha̍k Sèng-keng, iā thang kóng muí-nî ū ke-thiⁿ chē-chē. Phì-lūn tī A-hui-lī-ka ê tang-pêng ū chi̍t kok miâ kiò Iú-kan-ta (Uganda), chêng cha̍p-kuí nî hit só͘-chāi ê lâng lóng m̄-bat jī. Thoân-tō ê sian-siⁿ khì hia thoân hok-im, iā ēng Lô-má-jī hoan-e̍k Sin-iok, hō͘ Sèng-keng-hoē lâi ìn. Sin-iok ìn-liáu chē-chē lâng ài o̍h jī-bó ia̍h bé chi̍t-pún Sèng-chheh lâi tha̍k, sǹg ta̍k nî in teh bé chha-put-to 7000 pún Sin-iok; tuì án-ni hit kok-lāi ê peh-sìⁿ chin-chiàⁿ ū tit-tio̍h Siōng-tè ê in, iā tō-lí ū toā-toā heng-ōng.
Khoàⁿ chiah ê tāi-chì lán chīn chāi thang o-ló Thiⁿ-pē, in-uī sui-jiân kó͘-chá ê lâng uî-ke̍h i ê bēng-lēng lâi siū phah-loān ê khiuⁿ-kháu, taⁿ i ū khui lō͘ hō͘ tō-lí liû-thoân piàn thiⁿ-ê. Ha̍p chò-hoé lâi kóng, ná chún chāi-chá boē phah-loān khiuⁿ-kháu ê sî chi̍t-iūⁿ.
Lán iā tio̍h kiû Siōng-tè kín-kín chiâⁿ i ê chí-ì lâi èng-giām Si-phian 19 phiⁿ 4 chat, "Bô kóng-oē ê oē, moá kàu ú-tiū; bô chhut-siaⁿ si̍t-chāi ū chhut-siaⁿ." iā goān tuì ji̍t-chhut kàu ji̍t-lo̍h ê só͘-chāi chèng-lâng oē-tit-thang kóng, "Lán ta̍k-lâng oē thiaⁿ lán só͘ chhut-sì ê khiuⁿ-kháu lâi kóng Siōng-tè ê toā koân-lêng".
