Sûn Kàu-hoē
1902.06 207 Koàn p.43
Liâm Bo̍k-su.
Gō͘ goe̍h chhe jī (3:25) goá tuì Hú-siâⁿ tah hoé-chhia kàu Ka-gī, hit-mê hioh tī Pó-táu. Tī Siā-thâu-lūn-á koè lé-pài; hit ji̍t hoē-iú kéng chip-sū nn̄g lâng, Khó͘ Teng-chhân kap Tân Káu-bó. Tuì hia khì Ka-tang-kheⁿ-kháu, mn̄g tō-lí soà siat boán-chhan; ū 21 lâng kiû ji̍p-kàu, chiông-tiong chiap-la̍p gō͘-ê, iā ū kiâⁿ sé-lé hō͘ peh-ê gín-ná.
Tī 5 goe̍h 12 hō chiūⁿ-khì Chiang-hoà; tuì hia khì Ka-tâu. Che sī sin siat ê kàu-hoē, nā-sī hiān-sî khah-siông ū 50, 60 lâng lâi lé-pài. Ū 15 lâng hō͘ goá mn̄g tō-lí, chóng-sī in tiong-kan chiap-la̍p nn̄g-lâng nā-tiāⁿ.
Tò-tńg-khì Chiong-hoà chiū tiàm hia kuí-nā ji̍t, in-uī ū chi̍t nn̄g hāng ê sè-sū eng-kai tio̍h hoat-lo̍h. Goá iā sī ài kā Lân I-seng chò phoāⁿ, in-uī chiah-kú teh hoāⁿ i-koán i-ê kang chīn kiap, ū-sî sì-pah-goā lâng tī io̍h-kî-ji̍t lâi thó-io̍h; i-koán-lāi khah siông oá pah-gō͘ lâng. Sui-sī án-ni, goá tī pài-jī, 5 goe̍h 27 koè-khì Sin-kiat-chng ê sî, I-seng iáu-kú hó-hó, bô pan[sic.]-phoe i teh-beh khí phoà-pēⁿ. Tī Sin-kiat-chng tiāⁿ-tiāⁿ lo̍h-hō͘; chí-ū chi̍t-ji̍t ē-tit chhut-mn̂g khì Hoan-oah khoàⁿ-khoàⁿ; tī lé-pài-ji̍t hó-thiⁿ, chha-put-to pah-jī-lâng lâi lé-pài. Goá kiâⁿ sé-lé hō͘ peh-ê toā-lâng, káu-ê gín-ná. Kàu pài-it beh tò-tńg-khì Chiang-hoà, tī lō͘-ni̍h tú-tio̍h chi̍t-lâng the̍h phoe kiò tio̍h koáⁿ-kín lâi, in-uī I-seng phoà-pīⁿ í-keng kuí-nā ji̍t. Kàu Chiang-hoà goá chiū chai I-seng ū khí chò-lī ê chèng; kiaⁿ-liáu i nā bô kín soá-uī i ê pīⁿ ē ná siong-tiōng, só͘-í liâm-piⁿ siat-hoat hō͘ i chē kiō kàu Ka-gī. Tī lō͘-ni̍h tú-tio̍h Má I-seng beh khí-lâi chih-chiap i, in-uī goán í-keng ū kòng tiān-pò thang-ti; goán tāi-ke chiū chò-hoé tńg-khì; tuì Chiang-hoà khí-sin tē-jī ji̍t lóng pêng-an kàu Tâi-lâm-hú. Tī-hia hō͘ Má I-seng chiàu-kò͘, Lân I-seng ê sin-thé chiām-chiām khah ióng; chóng-sī pīⁿ nā-sī hó, i iáu-kú m̄-thang siuⁿ-chá koh chò-kang, tio̍h tāi-seng tiâu-ióng sin-miā. Só͘-í tī 6 goe̍h 18 ji̍t i í-keng lo̍h chûn koè--khì Soàⁿ-thâu. án-ni-siⁿ Chiang-hoà I-koán put-tek-í tio̍h chiām thêng; āu-ji̍t nā beh koh khui chiah beh pò lâng chai.
Goán iáu ū chi̍t chân hó ê siau-sit thang pò, chiū-sī Muî Bo̍k-su teh-beh koh-chài tńg-lâi Tâi-oân; pún-jiân chó͘-ke ê táng-sū ū gī-lūn beh hō͘ i oāⁿ-uī tiàm-tī Sit-la̍t-pho; liōng-pi̍t[sic.] in ū koh-chài kap Muî Sian-siⁿ chham-siông, taⁿ beh chhiáⁿ i chiàu-goân lâi Tâi-oân thoân-pò hok-im; káⁿ bô kuí-goe̍h-ji̍t i beh tah-chûn koè-lâi.
Lâu Bo̍k-su.
La̍k-goe̍h 22 hō (5:17) Lâu Bo̍k-su tī Poa̍h-bé Boán-chhan, chiap-la̍p sì-lâng ji̍p-kàu.
Tī 29 hō tī Hú-siâⁿ siú Boán-chhan; chit-pang khiok bô mn̄g tō-lí. Ū siat-li̍p chi̍t-lâng chò tiúⁿ-ló, nn̄g-lâng chò chip-sū, lóng sī sio̍k Po͘-kiuⁿ-thâu ê kàu-hoē.
Tī pài-jī ē-po͘ kap tng-chit ê lâng chū-chi̍p Tióng-chip-hoē, tī sin pài-tn̂g-lāi chū-chi̍p. Chit-tia̍p sin pài-tn̂g chhòng beh hó, sī chin hó-khoàⁿ, iā chin ha̍p-iōng. Gī-tiāⁿ tī 9 goe̍h 13 hō (8:12) tio̍h tī hit lāi-bīn chū-chi̍p; tī pài-la̍k mê tāi-ke chò-hoé chū-chi̍p hoaⁿ-hí kám-siā; tī An-hioh-ji̍t chū-chi̍p lé-pài. Hit-tia̍p Lâu Bo̍k-su beh koh chhut-lâi saⁿ-kap chū-chi̍p.
