Hú-siâⁿ I-koán

1902.06   207 Koàn  p.43

Taⁿ ū Chó͘-ke ê pêng-iú bé pah-goā tiuⁿ thih ê bîn-chhn̂g beh sàng goán Hú-siâⁿ ê i-koán; í-keng tuì Chó͘-ke kià-lâi, ǹg-bāng bô loā-kú ē kàu chia. Só͘-í I-seng teh pī-pān beh chiong kū-ê bîn-chhn̂g oāⁿ chiah-ê sin-ê, iā beh sūn-soà piàⁿ-chheng hit lāi-bīn. Khiok m̄-sī chò chi̍t-ē oāⁿ, kiaⁿ-liáu ē toā-toā chó͘-tòng i-koán ê kang; beh tāi-seng oāⁿ chi̍t-keng khùn-pâng, kàu hit-keng chhòng-hó, chiàⁿ beh oāⁿ pa̍t-keng. Chóng-sī chit-tia̍p tī i-koán-lāi khah bô uī thang chiap-la̍p pīⁿ-lâng toà, chí-ū hit-hō khah siong-tiōng-ê thang toà tī lāi-bīn. Nā ū pa̍t-mi̍h ê pīⁿ, khah ē iân-chhiân-tit, chhiáⁿ lín chit-chūn bián lâi; thèng-hāu pa̍t-ji̍t chhòng-hó ê sî goán koh pò lín thang lâi ji̍p i-koán.

Tī io̍h-kî-ji̍t iû-goân thang lâi thó-io̍h, téng-bīn só͘ kóng bô kan-gāi-tio̍h hit-ê.