Soaⁿ-tang kīn-lâi ê sū

(N̂g Huī-ngó͘ hoan-e̍k Ji̍t-pún pò.)

190206 207 koàn p.44

    Chêng tī 1899 nî Soaⁿ-tang-séng ū bó͘ koaⁿ-hú bat kap siâⁿ-lāi ê tha̍k-chheh-lâng gī-lūn Tiong-Se ha̍k-būn ê koh-iūⁿ. Chiàu in kóng, Tiong-kok ê ha̍k-būn iā sī chiâu-pī, Se-kok ta̍k-khoán ê kek-bu̍t lóng sī tuì Tiong-kok ê ha̍k-būn chhut-lâi. Tiong-kok-lâng nā o̍h Se-ha̍k sī koh-chài chhoē hit-ê kin-goân. Só͘-í in teh phah-sǹg siú-kí ka-tī ê chiū-hó.

    Tuì chit nn̄g-saⁿ-nî lāi tha̍k-chheh-lâng ê tiong-kan iā ū kài-chē lâng khì káng-kiù Se-ha̍k. Tī kīn-ji̍t koān-chhì (chiū-sī koān-khó) chú-khó ū chiong "Iâ-so͘ kap Khóng-chú sím-mi̍h lâng khah chhut-tioh" chò tê-ba̍k bēng-lēng biah-ê tông-seng chò bûn-chiuⁿ.

    Chêng kuí-nî tha̍k-chheh-lâng lóng m̄-goān kiâⁿ kàu lé-pài-tn̂g; taⁿ ū chin-chē Chheng-kok-lâng kam-goān lâi cha-mn̄g Se-ha̍k ê lí-khì--lah.