首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 傳道會　
傳道會　
卷期：第207張 本次： 日期：1902/6 刊名：台南府城教會報 頁數：45-47
篇名：傳道會　 [ Thoân-tō-hoē ]
作者：
  顯示 : 漢羅 全羅 並列  

傳道會。

安平縣。

1902.06 207卷 p.45-47

 

1902，4月20號，舊曆3月11日，安平縣傳道會聚集佇木柵禮拜堂。所來赴會的人劉Bō͘-khun，高長，卓老生，林Chhau，Ki Thian-uî，戴Chìn-chhun遮的。

頂晡8點鐘做伙聚集參詳代誌，請林Chhau做主理，讀I 提。4：1-16節。用16節做題目苦勸大家，後來祈禱開會。

頂晡做伙攏是議論傳道-的日日著按怎樣做才袂空空過日。所以議論拜一拜五著出門巡視會友，拜二拜四著家己講究冊；甚物冊著講究是出在人，要緊著合佇道理的冊；從中此兩日的確著讀聖會史記兩章對卷一讀起。拜三著出門佈道，也著教訓家內的人。

對本月20日算起，每早起著讀舊約一章；對創世記讀起。Ê昏讀新約一章，對使徒行傳讀起。後來議論逐日著同心相替祈禱。拜二替台南眾傳道-的。拜二替眾當職-的，以及做爸母的人。拜三替日本以及清國官府佮百姓。拜四為著內山的嫁娶。拜五替學堂佮醫館。拜六替宣道會佮佈道。禮拜日為著兄弟守安歇日，以及in的品行。十一點祈禱就四散。

下晡分做3班去揣兄弟；就是照本所在的傳道--的共阮講，某會友有甚物失錯，照按呢去苦勸勉勵in。

  Ê昏8點聚集請高長做主理，讀馬太4：17-22節，大概苦勸做傳道--的，頂面著歡喜服侍主，下面著歡喜服侍人，才會合上帝的意思。後來紲請林Chhau讀伊所做的論，大家歡喜受伊勉勵。題目就是哥。4：1，2節。

十二日頂晡8點聚集，請卓道生做主理，讀馬太14：14-24節；閣13：51-52節；將52節做題目，苦勸咱傳道的人著講究聖冊逐項的道理，才有通予兄弟每樣的欠缺；大家受利益。後來請幾若人跪落同心為著這幫聚集，以及別縣的傳道會來祈禱。明白就閣議論。大概攏是為著內山的事。

一項是為著親成的事。人連鞭合婚快快煞去，傳道的人著不止要緊這个代誌。安歇日著常常講明做翁某的關係佮本份這號的道理；若拄著無合宜的嫁娶，著毋通佇禮拜堂共伊唱，本身毋通共in合婚；也著阻擋別的當職的。予in知人按呢做，教會無歡喜，所以毋愛佮in干涉。

閣一項就是論兄弟姊妹守安歇日的事。內山會友對早以來守安歇濟濟人無對重；較濟守一晡；逐間拜堂頂晡濟人，下晡真少人。這个代誌真通煩惱，人冷心守安歇，致到in的所行濟濟毋拄好。傳道一人僫得齊知甚物人無來，所以著佇兄弟的本庄揀幾若人來鬥料理；每安歇日報明傳道的知某人無來，六日較好巡視，紲講予眾人知，向望in較會致意。

也議論設法予囡仔讀白話字；若是in甘願來拜堂予傳道的教示真好，要緊是勉勵做爸母的人著設法家己教，傳道的每月著去共in巡看，紲教in，勉勵in。中間參詳每年安平縣著兩擺傳道會。就是定春秋兩季。本傳道會後幫欲聚集佇跋馬禮拜堂。聚集的日期是8月24日。請洪Io̍k用I林。9：19節做一篇論來讀予眾人聽。

下晡攏去Kiáu寮仔街佈道，機會平常。Ê昏8點劉Bō͘-khun做主理禮拜，讀哥。1：9；將路尾節做題目苦勸勉勵。大家祈禱就散會。

十三安歇日攏佇木柵佮兄弟姊妹做伙禮拜，逐人閣將一項來苦勸兄弟姊妹。拜一14日就攏四散。

阮請大家替阮祈禱，予阮這幫做伙聚集無歸佇空空，予阮傳道--的家己較會盡忠佇所欲做的工會成，通利益教會信主的人。

嘉義縣。

佇4月18號(3：10)嘉義縣傳道會佇嘉義拜堂齊集。赴會--的就是周步霞，黃白，黃茂盛，林chhip-hi，林Io̍k-kî。頭日頂晡9點鐘聚集。

  1. 請周步霞做主理chhoā眾人禮拜，讀約翰17：大家引聖經來講論，得著真大利益，到12點主理祈禱就停。

  2. 下晡2點鐘閣聚集，請林Chhip-hi做主理紲讀論；就chhoā眾人禮拜祈禱。所讀--的就是論傳道的本份。所議論--的毋是講起傳道--的若欲盡本份著做甚麼工，是講起傳道--的若欲盡本份，代先著有甚物款？分兩項就是：－

  1)關防家己：－

   (1)心(看加拉太1：10)。

   (2) 身 (看哥林多前書1：13)

  2)關防別人：－

   (1)著代先揣拄好的路。(I 林。9：20-22。)

   (2)著代先備辦拄好的米糧(哥林多前書2：6，3：1-3。)

大家閣再相佮議論到4點鐘主理祈禱就停。後來出去佈道。

  3. 第二日頂晡9點鐘閣聚集，請黃白做主理chhoā眾人禮拜。讀馬可4：1-29，就將這站相佮講究。對10點鐘到11點鐘做祈禱會就停。後來去探兄弟。

  4. 第三日禮拜日頂晡10點鐘佮兄弟姊妹聚集，林Chhip-hi做主理chhoā眾人禮拜祈禱。後來閣傳道--的用幾句話苦勸勉勵；到11點鐘主理請黃Se-keng長老祝福就停。

  5. Ê晡2點鐘閣聚集做祈禱會，請黃茂盛做主理，chhoā眾人禮拜，讀馬太26：41，講論明白就請兄弟相紲祈禱，到3點鐘停，就出去探兄弟。

  6. Ê昏9點閣聚集，請林Io̍k-kî做主理，chhoa眾人禮拜，讀馬可2：1-12。

  7. 有接著麻豆許Tiâu-iông的批，講伊袂得來赴。

  8. 議論後會舊曆10月初7日著到牛擔灣拜堂，初8日欲聚集。

  9. 議定後會請林Io̍k-kî做論，題目馬太13：51，52。

  10. 議定後會所欲講究--的就是恩典的道理。

  11. 議論後會所欲做的工程：(1)讀論。(2)講究聖經。(3)議論干涉教會的外事。(4)禮拜日頂晡勉勵兄弟姊妹，下晡佮兄弟姊妹聚集做祈禱會。(5)聚集以外的時著揣冷心的兄弟姊妹佮佈道。(6)若傳道--的無來赴，無寫批來講是甚物因端，記事著寫批去問--伊。

  12. 聽讀所記--的，准記上冊，主理祈禱就散。

阮這幫來嘉義傳道會的伙食是嘉義的教會請阮的。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461