Kong-lūn Sū-lí
1902.06 207 koàn p.47
1. Lé-pài-ji̍t chē hoé-chhia hoé-chûn sī tio̍h á m̄-tio̍h?
Taⁿ chiong hiaⁿ-tī koh chi̍t-lâng só͘ siá--ê kì tī ē-té hō͘ lín khoàⁿ.
Taⁿ lâi ìn Pò-lāi só͘ mn̄g An-hioh-ji̍t tah hoé-chûn hoé-chhia ū hoān-tio̍h á-bô?
I. Bô hoān-tio̍h An-hioh. Lán chai An-hioh-ji̍t m̄-sī beh hāi-lâng, sī chò kiù-lâng iú-ek lâng ê ji̍t. Lán í-keng chai An-hioh-ji̍t tio̍h giâm-siú; chóng-m̄-sī kìm-lâng it-chīn m̄-thang chia̍h-pn̄g, lim-ám, liân kiù-lâng, i-pēⁿ, iā soà m̄-thang. Nā án-ni kóng chū-jiân kò͘-chip put-thong. Chhiáⁿ lín chhì khoàⁿ Siōng-tè ū chiong lī-ek bān-lâng ê sū, bô An-hioh, ta̍k-ji̍t lóng teh kiâⁿ. Chiū-sī I ēng ke̍k-kî-toā ê koân-lêng hû tē-kiû, hō͘ tē-kiû, hong-khì, hûn, luî, tiān, hō͘, ji̍t, hái-chuí, ta̍k-hāng kok chiàu in ê chhù-sū tiân-tō͘ ūn-choán liû-hêng. Siat-sú Siōng-tè nā hō͘ tē-kiû tī An-hioh-ji̍t chiām-thêng lâi An-hioh chi̍t-ji̍t, thiⁿ-ē kiám-bē it-chīn bô oa̍h lâng? M̄-kú I tī lé-pài bô thêng, teh hō͘ lâng khò I lâi oa̍h. Khó-kiàn An-hioh-ji̍t chò lóng-chóng ê hó-sū, kiù-lâng, lī-ek lâng, bô hoān-tio̍h An-hioh-ji̍t ê si̍t-gī sī bêng. Phì-jū An-hioh-ji̍t tī Kî-āu ū put-hēng ê chhia-hu, hō͘ hoé-chhia kauh-chi̍h nn̄g-ki kha-kut. I tī-hia chhoē bô I-seng, khà tiān-pò lâi Tâi-lâm chhiáⁿ i-seng koáⁿ-kín chē hoé-chhia khì táⁿ-tia̍p. I-seng nā chē chhia khì, iā bô hoān-tio̍h An-hioh-ji̍t. Á-sī phì-jū chûn-nî tī Chheng-kok Gī-hô-thoân-huí hoán, oàn-tò͘ Se-kok ê kàu-sū kuí-nā-lâng, tâng-àm-iok lé-pài-ji̍t 9 tiám beh kú-sū; pài-la̍k ū kàu-iú tit chai, thàn in tio̍h chiām-pī, thiⁿ-phú-kng sī lé-pài-ji̍t, tú-gū ū hoé-chûn beh khì Hiong-káng, in chham ke-koàn tah hoé-chûn chek-sî khì Hiong-káng, iáu-kú bô hoān-tio̍h An-hioh (Má 10: 23). An-hioh-ji̍t nā ū kín-kip sū, m̄-thang chhiân-oān kàu pài-it chiah chò-ê, Siōng-tè í-keng hoaⁿ-hí thé-thiap. Lán chiū m̄-thang hiah chim-chiok chhui-mô͘ kiû-chhû.
II. Ū-hoān-tio̍h An-hioh. Tú-á kóng An-hioh-ji̍t tah hoé-chhia, hoé-chûn, bô hoān-tio̍h An-hioh-ji̍t. Taⁿ siáⁿ-sū kóng ū hoān-tio̍h? In-uī tāi-chì kiàn-sio̍k-tī thang khoan-oān, khó-khoaⁿ, khó-bān, sū-iú, sū-bû, m̄-bián tek-khak tī An-hioh ji̍t lâi chò, koh saⁿ gō͘ ji̍t, chi̍t-nî, poàⁿ-chài, chiah chò ē-sái-tit, tī lé-pài-ji̍t beh chò bêng-bêng chai kò͘-ì hoān. thang kóng sī m̄-tio̍h.
Phì-lūn goá ài kàu Kî-āu khoàⁿ-khoàⁿ, tān-gāi la̍k-ji̍t seng-lí bē tit lī, bô êng, tú-tn̄g An-hio̍h[sic.]-ji̍t sūn ki-hoē ū hoé-chhia beh khì, chiū tah khì Kî-āu hù lé-pài ē-po͘ phah tò-tńg Tâi-lâm, chiū bô chó͘-tòng pêng ji̍t ê kang-kò͘; á-sī lé-pài-ji̍t chá-khí 8 tiám ū hoé-chûn beh khui, chi̍t-ji̍t ē koáⁿ-kàu Tang-káng, goá ài khì hia bé hî-chhì, in-uī tī Tâi-lâm chám-jiân ū siau, chit-pang nā tah bô koh 10 ji̍t chiah ū ki-hoē, kiaⁿ-liáu siuⁿ bān, só͘-í khì tah ǹg-bāng āu lé-pài ē koáⁿ tò-tńg; á-sī ū hoé-chûn beh khì āu-soaⁿ, goá ài khì bé lo̍k-jiông kap chò hoàn-sau, chûn tī An-hioh-ji̍t 9 tiám beh khui, goá chiū khì tahh[sic.] oé[sic.]-chûn khì āu-soaⁿ ǹg-bāng hó thàn, koh poàⁿ goe̍h-ji̍t ē koáⁿ tò-tńg, nā bô khì kiaⁿ-liáu tio̍h koh poàⁿ goe̍h-ji̍t. Chiah-ê sū bô tek-khak iàu-kín kàu bē iân-chhiân pài-it, koh poàⁿ goe̍h-ji̍t iā bô tek-khak bô hó thàn, kiám-chhái chûn tú-tio̍h hoān-hong liân-sìⁿ-miā iā lân-pó; bô kóng seng-lí! "Koán-kiàn" m̄-sī ho͘N3-piān, sī ài lán tio̍h siūⁿ chhut kui êng-kng Siōng-tè, lī-ek lâng ê sū lâi chò.
(1) Lán pún-sin tio̍h chò sìn Chú ê lâng ê bô͘-iūⁿ; jia̍t-sim ho̍k-sāi Siōng-tè, tuì-tiōng An-hioh, tha̍k Sèng-keng kî-tó káng-kiù tō-lí, pò͘-tō ín-chhoā boē sìn ê lâng koh khah hó seng-lí ê hó-thàn.
(2) Tio̍h thé-thiap pa̍t-lâng. Lán tio̍h o̍h Pó-lô, sui-jiân thang chò, chò ia̍h bô kan-gāi tio̍h tō-lí, i iáu-kú m̄ chò, kan-ta ài thé-thiap chhián-sìn ê pa̍t-lâng, ín-chhoā in kiâⁿ chhim-sìn ê lō͘, bián-tit gāi-tio̍h in sìn boē chhim-ê, hō͘ in poa̍h-tó tī giâu-gî, kóng lán teh hoān An-hioh-ji̍t, lán tio̍h khek-kí khì lī-ek in. (Chhiáⁿ lín khoàⁿ Lô 14: 16, 19, 21-23, I Lîm. 8: 9, 10:23, 24, 31-33). Lán tng-chit ê Tiúⁿ-ló, Chip-sū, ji̍p-kàu ê hiaⁿ-tī, chí-moē, tāi-ke tio̍h o̍h Pó-lô sian-siⁿ it-bī kèng Siōng-tè khoàⁿ-phoà sè-kan, lâi thé-thiap hû-chhî chhián-sìn loán-jio̍k ê hiaⁿ-tī, bô-ài hoān-tio̍h An-hioh tì-kàu saⁿ-thàn saⁿ-hán, saⁿ-chhoā poa̍h-lo̍h kau-khut. Tâi-lâm ta̍k só͘-chāi ê hoē-iú bô lia̍h hoān An-hioh-ji̍t chò tāng-choē soà koàn-sì. Goān lán tāi-ke saⁿ bián-lē ké-khì hoān An-hioh-ji̍t ê tāng-choē; ǹg-bāng ta̍k kàu-hoē ê hoē-iú choân-sim pàng-sak sè-kan it-chhè ê sū-bū, tī An-hioh-ji̍t chhut-la̍t lâi siú, khoàⁿ Sèng-hoē ta̍k só͘-chāi ê lâng-gia̍h khah-chiâu-kàu lé-pài tn̂g siú an-hioh kèng-pài Siōng-tè, bián-tit hoān-tio̍h tī kó͘-chá-lâng ê kū chhia-lō͘ (Hi. 3: 7-14). Chiah thang ū hūn lâi hióng-siū éng-oán ê An-hioh tī thiⁿ-nih, pêng-an bān nî kú. À-bēng.
Chhiáⁿ lín tāi-ke koh siá-phoe lâi g-ī[sic.] lūn, he̍k-sī teng[sic.]-bīn hit-hāng á-sī ē-bīn chit 3 hāng ê tō-lí.
2. Chhut Thoân-tō ê sin-kim tio̍h chiàu sím-mi̍h hoat-tō͘ khah-hó?
3. Lán Tâi-lâm ê kàu-hoē tio̍h kap Ji̍t-pún kok ê Kàu-hoē sio-ha̍p á-sī kap Tiong-kok ê kàu-hoē sio-ha̍p?
4. Hiān-kim koh siat pún-tē Bo̍k-su ū sím-mi̍h lī-ek, iā ū sím-mi̍h chó͘-tòng?
