天才會
1902.08 209卷p.59
論天才會是親像咱台灣Hoa-hoē 的款。伊的規矩卻有閣樣，毋kú理氣是相像，算來也是眾筊中的一項。
這个原前是小呂宋做第一先。清國也有淡薄。總是小呂宋對歸美國了後。這號弊端有漸漸teh掃除，到這tia̍p差不多攏無lah。可惜清國m̄-nā無那減，反轉是那加；政府毋若無禁止，反轉teh設法勉強人iô。這號的所做。實在有大損害國政佮民心。
照西國的新聞紙teh講。佇某省某總督因為照政府的命令伊姑不將著買2000張的天才票。伊本身拍算，我若著承受chiah濟，我的下司也著佮我分-pheⁿ。所以就分幾百張予某府，某縣。後來某縣也照按呢拍算，紲分-pheⁿ予較會得過的百姓鬥擔當。從中也有分-pheⁿ予咱信主的人。現時佇彼爿教會當職的人有teh參詳看應該著買，抑是毋免。實在是去倒兩難的所在，因為若欲買，明明無合真理；若毋買，官府就嫌iu無體貼國家。照人講，設這个會是為著愛得著較濟錢通資助賠外國款項的事。
有人講日本國也欲設這个會，毋知有影抑無？阮向望千萬毋通有按呢。
願看報的朋友著替清國的兄弟佮本身來祈禱。求上帝予清國的兄弟的得脫離這號的試煉；也求上帝予咱台灣毋通拄著這號事：是心所願。 |
