[1916-4 台灣教會報 文類-傳記 作者-葉金木/Ia̍p Kim-bo̍k]
葉俊ê小傳 [ Ia̍p tsùn ê Sió-toān ]
葉俊ê小傳1916.04 373卷 p.6葉俊出世tī主後1867年，tī細漢ê時父母sàn-hiong人，有讀淡薄漢學nā-tiāⁿ，就hō͘人chhiàⁿ做辛勞。伊ê第四兄代先得著道理，伊就盡力阻擋，總是無久伊ê第四兄有去淡水入神學校，後來in 老母有破病去淡水chhoē醫生，葉俊就去照顧，對án-ni就得著道理。對十六歲起，就去跟隨麗牧師，十七歲年尾就入神學，二十一歲就出來水轉腳做傳道，hit時伊有盡力鼓舞教會合鼓舞起新拜堂，對án-ni教會就漸漸興起。對帝國領台ê時，伊有備辦搬去淡水拜堂，後來有beh kā 伊轉任，因為有幾nā項ê阻擋，就辭職歇工，猶原koh tiàm 水轉腳做生理合...

[1916-4 台灣教會報 文類-散文 作者--/-]
棄邪歸道 [ Khì-siâ Kui-tō ]
棄邪歸道。 1916. 4，no. 373，pp. 7 佇枋橋有一个聽道者舊年3月來聽道理，聽5月日久就會曉祈禱，祈禱的話贏過眾會友。伊是卜卦看命的先生。今實在反悔。舊曆正月初3日有提龜卦佮籤筒，籤仔來送我。我講，「甚物人叫你提來？」伊講無人叫伊，是伊家己提來。伊有講對這霎了後攏毋閣創這款的邪。我講，「今你無頭路欲怎樣？」伊講伊的頭路欲予上帝推排。現在無頭路不止艱苦。南湖的教會呂興良先生聽見伊的款，心不止受感激；伊有每月欲幫贊伊一箍銀，幫贊伊到有頭路。反悔的人是四五十歲的人，伊的名是詹Sióng-kî。現時不止熱心四界咧講道理予人聽。請看報的兄弟替伊祈禱。閣若有人欲倩伊，才寫批來枋橋。這个...

[1916-4 台灣教會報 文類-散文 作者--/-]
交戰的消息 [ Kau-chiàn ê Siau-sit ]
交戰的消息。 1916. 4，no. 373，pp. 7 現時土耳其國已經召50歲內的人來當兵。原本是干焦到39歲為止。俄羅咧拍in有直直贏，土耳其兵大倒退。佇土耳其京城，君士但丁，食物真貴，親像糖一磅 ( =台灣12兩)的價是倚兩箍半，咖啡一磅是Y3.00，一lok火漆是角二，雞卵一粒8 chiam；臭油佮牛肉無通買。 德國也大欠食物，致到百姓佇濟濟所在咧反叛。紲嫌官府講，阮丈夫今死啦，阮無通食。In那久那明知實在予政府大連累。 德國有對一个小國，葡萄牙宣戰。電報講，德國的戰船遐爾久攏走去覕佇in的港內，今有備辦較大的銃，也咧欲出來佮英國戰船交戰。 英國宰相發表遐的英國非戰鬥員受害...

[1916-4 台灣教會報 文類-散文 作者-巴克禮/Pa-khek-lé]
新約頭序 [ Sin-iok Thâu-su ]
新約頭序。 (巴克禮記)。 1916. 4，no. 373，pp. 8-9 四十外年前有將新約翻譯白話字。彼霎到今有賣幾若千本，予真濟人讀，來得著大利益；是因為逐人通家己講究上帝的聖冊。 二三十年以來有偌濟人咧拍算前所翻譯的著閣再斟酌，予伊較準，通拄拄照本文的意思。因為本所翻譯的卻是聖經大概的意思攏齊佇咧：總是彼本的白話，以及彼擺所用來解說的漢文，無通予讀的人常常知著冊的人的意思到準準。 所以近來有請四个先生對希利尼的本文重再翻譯，閣有將新翻譯的漢文六七本來相參看。到翻譯了，就分予幾若位的先生參校；才閣再斟酌巡一兩遍。頭到尾用工兩年較加。今發行做教會的路用。 紲排列幾若項佇...

[1916-4 台灣教會報 文類-散文 作者--/-]
冊房的告白 [ Chheh-pâng ê Kò-pe̍h ]
冊房的告白。 1916. 4，no. 373，pp. 12 今有閣辦養心神詩，白話字細本-的，2000本來；若有人愛，著寄批來冊房買。總是這陣有人欠冊房的數；請恁若有欠5箍以上的數著代先寄銀來還，阮才欲將新的詩冊寄去予恁。因為阮也有欠廈門的冊房三四百箍，無錢通予伊，實在真毋好。設使列位若將所欠的寄來予阮，卻有夠額通還in。另外也有欠上海的聖冊會，合額著緊緊寄去予in。這毋是勸人著好心來題，不過是勸人著盡本份來還債。 閣一項。有兩款的報，就是商務局所出的東方雜誌，佮進步雜誌，出報的人有通知阮講欲買攏著前金。總是欲予阮逐擺替恁寄，實在真費氣；請恁欲買的人本身設法，對郵便寄銀去買。其餘的報...

[1916-5 台灣教會報 文類-散文 作者--/-]
俄羅斯 [ Ngô͘-lô-su ]
俄羅斯。 1916. 5，no. 374，pp. 5-6 俄羅斯算是世界真大的國。地球的地大概六份的一份是佇俄羅斯的界限內。俄羅斯的百姓大概有倚兩萬萬。逐年伊的百姓有加添五六百萬。 俄羅斯較早較無文明，百姓較無開化，國家漸漸那興起。兩百年前有一个真出名的皇帝坐位。伊的名號做彼得。伊gâu治理國家，設真濟款的法度予俄羅斯會較興起。伊有拍贏國家的對敵，亦有改正舊的風俗，設真濟款新的法度。現時俄羅斯雖罔百姓無拄拄親像英國，法蘭西，德國遐文明，毋過近來不止有進步。 十外年前俄羅斯有佮日本相刣。俄羅斯的力較大，毋過著載伊的兵幾若千舖路的遠。對按呢伊的兵猶未齊來，日本有出戰刣贏。俄羅斯就甘願講...

[1916-5 台灣教會報 文類-散文 作者--/-]
廈門女學 [ Ē-mn̂g Lú-o̍h ]
廈門女學。 1916.5，no.374，pp.6-8 阮接著廈門一位姑娘的批講，阮愛將這冬所得著的好消息報予你知，就是舊年11月9號有一个女青年會的安姑娘到廈門，愛勉勵青年的女學生歸主，成做基督徒。這个姑娘專專料理女青年會的事。中國濟濟所在行來，行去，到濟濟學堂攏是咧做這號工。是真熱心祈禱，有受聖神大充滿。不論甚物所在攏有得著上帝的恩賜。 今伊佇11月9號就是拜二到鼓浪嶼，就代先佮懷仁女學的學生聚集。有三日久，逐日有兩擺，有得著上帝的恩賜，阮聽見不止歡喜，向望咱的學也會得著。 佇未來的代先一日，本學學生有做祈禱會，專專求上帝備辦安姑娘佮學生的心，予人除去攏總不法的事，到過日通便便聽好...

[1916-5 台灣教會報 文類-散文 作者--/-]
焦吧年近況 [ Ta-pa-nî Kīn-hóng ]
焦吧哖近況。 1916.5，no.374，pp.9 焦吧哖的會友現時真艱苦。舊年擾亂彼霎in的厝佮家私攏燒了了。後來in搭草寮仔佇in所共人贌的園地。今遐的園主看是干焦婦人人佮囡仔就毋准in作，草寮仔著紲拆去別位。按呢艱苦。 閣舊年地方擾亂彼時拄仔咧種作。有會友為著衙門公事無通作，有的種了就拄著擾亂。民家的精牲幾若月日久無人通約束，放據在伊去食五穀，致到所有種作的物件攏予in食到無半項通收成。對按呢欠缺米糧。 照看毋是干焦一半人拄著這號淒慘，較濟攏有。頭社的會友已經贊淡薄，總是無夠額氣力。阮咧想佇教會內若有甚物朋友愛贊成淡薄，通寄交頭社的傳道先生賴林，抑是交代宋牧師替列位轉寄也會做得。...

[1916-5 台灣教會報 文類-散文 作者--/-]
建築部 [ Kiàn-tio̍k-pō͘ ]
建築部。 1916.5，no.374，pp.10-11 兄弟--啊！這幫中會佇烏牛欄有議論一層要緊的事，就是欲設一个建築部。因為現時教會那久那闊大；逐年常常有起禮拜堂，傳道先生佮兄弟沓沓出門題捐。現時卻無甚物錯誤的代誌，不過驚了後來那混雜，紲生出弊病。 又閣咱教會現時咧起禮拜堂，攏是彼所在的兄弟佮傳道先生常常設法，無別人通鬥拍算，致到常常有起了無衛生，厝tat拍了毋好看；抑是有時兄弟意見無相合，對按呢有時生起毋好的感情。抑是有時無斟酌拍算，無量教會的氣力，譬論教會有1000銀的力nā-tiāⁿ，大家就譀譀起3000，致到起了真荏，開兄弟的錢真濟，毋免一兩年的中間攏歹了了。 頂面所講遮的...

[1916-5 台灣教會報 文類-選擇文類 作者--/-]
台島消息 [ Tâi-tó Siau-sit ]
台島消息。 1916.5，no.374，pp.11-12 郵便規則。郵便的規矩卻濟濟人已經知；驚了猶真濟人毋知，致到發信的人受罰，抑是受信的人受罰，按呢就真毋拄好。況兼這幫有改正幾若條，所以無嫌複雜寫幾句來報未知的人。一概的規矩真濟僫寫，不過將人快患著--的幾若項記佇下底：- (1)小包。人若用物包規包來寄，叫做小包。著知毋通用批來包佇小包的內面。若用批包佇小包內做伙寄，舊底是罰金10箍，今改較嚴，欲罰200箍以下。 (2)切手。(就是郵票，又名尪仔頭)。若用了的郵票，閣再拆起來用；舊底是罰關監5年，今改較嚴，欲罰關監10年以下。若變造郵票--的，雖然所變造未用，若掠著就欲罰...

[1916-6 台灣教會報 文類-散文 作者--/-]
捾鐵鍊 [ Koāⁿ Thih-liān ]
捾鐵鏈。 1916.6，no.375，pp.5 早年有一个印度和尚，伊所捾的鐵鏈差不多一百斤重，鐵鏈一條有大塊鐵，因為遐重才著不時跔跔。頷頸，跤手有遐重，遐墜的鐵鏈到袂會行，三頓著人捀予伊食。二十外年久攏是捾遐的重鍊。想到伊的形狀實在通可憐。怎樣欲按呢？伊講，少年的時無論甚物歹伊真愛做；後來就想，若捾遐的重鍊也鍊伊的跤手，看會予伊罪罫無--去袂。那久捾那濟條，到路尾捾無法得。這个人的頷頸，跤手有遐重的鐵鏈鍊咧，是向望會脫離罪，會得著救。伊按呢刑罰家己到真艱苦，實實是歸空空無路用。 要緊是伊的心著換做新，毋是著鍊伊的跤手。親像佇詩篇有講，「上帝啊！求你共我創造清氣的心；予我的心志換新堅...

[1916-6 台灣教會報 文類-散文 作者--/-]
婦人人的佈道所 [ Hū-jîn-lâng ê Pò͘-tō-só͘ ]
共進會佈道。 婦人人的佈道所。 1916.6，no.375，pp.6-7 佇婦人人的佈道所逐日亦有演說，頂晡，下晡佮ê昏。逐日有幾若百人來聽。三十三日的中間來聽的婦人人總共敢有萬外人。逐日有姑娘，牧師娘，醫生娘，女傳道以及教會的姊妹幾若人佇咧來鬥招呼人，鬥教示，鬥演說。台南有派兩个姑娘佮三个女傳道來鬥幫贊。北部的教會姊妹有不止濟甘願盡in的力來鬥相仝。南部的姊妹亦有幾若-的歡喜來獻in的工。大家真出力。這陣順機會共列位說謝。 本地的教會姊妹亦有的題捐寄附來幫贊所費。南部的姊妹有幫贊Y78.03，北部的姊妹有幫贊Y73.21。北部有16間拜堂的姊妹寄附：大稻埕，艋舺，三角埔，三角湧，新莊...

[1916-6 台灣教會報 文類-散文 作者--/-]
台南女士會 [ Tâi-lâm Lú-sū-hoē ]
台南女士會。 1916.6，no.375，pp.7-8 新曆4月10號的昏設歡迎會，宋牧師娘主理。隔日11號女士會聚集佇台南女學校。赴會的人：西國姑娘5个，牧師娘3个，醫生娘一个，北部的Lê姑娘也來；本島牧師娘，傳道先生娘佮姊妹攏總倚70人。 頂晡9點開會，Lô͘姑娘主理，讀以賽亞52：11；提摩太後書2：21；詩篇51；用認罪祈禱做題目，勸勉會眾。人欲做主的工著清氣相，合主的路用；若有毋著著認罪祈禱，予上帝赦免才會替主做工教示別人。後來議論守安息日，李Tong-kia̍t先生娘讀論。 下晡2點半接紲議論安息日的工，聽讀Siau-lâng林先生娘寄來的論，講起禮拜的時要緊著肅靜。然後論...

[1916-6 台灣教會報 文類-散文 作者--/-]
共進會佈道 [ Kiōng-chìn-hoē Pò͘-tō ]
共進會佈道。 查埔人的佈道所。 1916.6，no.375，pp.6 這幫順共進會的機會，咱教會有設佈道所佇第2會場的正面，大家卻已經知影了。今愛將所經過的狀況大略來寫幾句予大家知影。 這个佈道所對開-予到閉會有33日的久。逐日較常是對頂晡10點起，到暝時11點止。每日平均演說10點鐘久。來聽的人額總共有三萬外人，就是每日平均千外人。婦人人無算在內。可惜遐的團體的人無機會通來聽，設使若會來聽，就會加不止濟。這款的機會，對台灣設教以來敢猶未捌有。今向望有好的結果。佇遮的來聽的人的中間，有的來聽真濟擺。到欲閉會彼日有一个講伊有來聽29擺，今約伊欲來禮拜。閣有一个對頂晡10點鐘來聽，到下晡6...

[1916-6 台灣教會報 文類-散文 作者--/-]
北港的消息 [ Pak-kángêSiau-sit ]
北港的消息。 (洪Tek-sin記)。 1916.6，no.375，p.10 北港教會的事由拍算列位敢真愛知。今講淡薄予恁通明白。 北港通講通台灣迷信地的浮華市，陷害神靈界的魔鬼國。因為遮的人攏是倚靠這間朝天宮，來製造銀紙香燭店，趁錢不少。(行傳19：24)。有銀紙店佇每年二三月間，趁銀成萬，做一世人免趁有通食，穿，用，夠額。對按呢利權那久那大，銀紙香燭店，愈久愈坐坎，實在是趁錢的時勢。又閣1-3月將有幾若十萬人迷信，無嫌艱苦來到北港 燒金的時，銀紙攏是用規綑，人離金爐真遠才敢用按呢抌落去燒，是為著真燒的緣故，有當時燒到金爐迸開。香teng客來到北港買無銀紙通燒，就用銀票歸把抌...

[1916-7 台灣教會報 文類-散文 作者--/-]
台北基督教會的歷史 [ Tâi-pak Ki-tok Kàu-hoē ê Le̍k-sú ]
台北基督教會的歷史。 (吳威廉寫)。 1916.7，no.376，pp.6-9 主了後1871年6月14日加拿大長老教會的總會順主耶穌的命令，有擬定著派教師偕睿理去外邦傳耶穌的道理佇毋捌聽道理的人的中間。有定規派伊去中國；不過毋敢講佗一省。 彼年10月19日偕牧師有離開祖家，毋知欲去中國的甚物所在；獨獨有求聖神著替伊設法，日日共伊chhoā路。 同年12月尾伊有到台南的打狗欲揣李牧師。佇台南英吉利長老教會的宣教師有較早來設教，就是主了後1865年馬醫生有到台南報揚基督的道理。閣無偌久李牧師有來鬥幫贊。偕牧師到台南彼年Tek醫生，甘牧師猶原已經佇咧。遮的宣教師真歡喜接納偕牧師。 ...

[1916-7 台灣教會報 文類-散文 作者--/-]
歐洲戰事 [ Au-chiu Chiàn-sū ]
歐洲戰事。 1916.7，no.376，pp.10-11 佇6月第5號英國陸軍Kiat元帥搭戰船欲去俄國參詳交戰的代誌。到蘇格蘭北爿磕著水雷紲沉落去。元帥果然有死去。論英國對交戰所拄著的陷害這算是差不多第一傷重。 在6月11號佇德國的眾議院有報告講佇5月間in的陸軍的兵戰死2,2431，受掠7961，著傷6,3391。又閣報告對起交戰到5月尾戰死73,4412，著傷172,2961。海軍死傷-的無在內。 久久德國戰船走去覕佇港內毋敢出來佮英國戰船相刣。所以英國戰船常常駛倚德國咧聽候看in欲出來抑無。到5月31號號下晡in果然出來相刣。起頭德國船嶄然較濟也較大隻，致到咱這爿予in拍沉幾若...

[1916-8 台灣教會報 文類-散文 作者--/-]
拜上帝的國相交戰 [ Pài Siōng-tè ê kok saⁿ Kau-chiàn ]
拜上帝的國相交戰 1916.8，no.377，pp.1-2 兩年久佇歐羅巴洲，有真濟大小國咧相刣。除日本佮土耳其國以外，其餘遐的交戰的國攏算是拜上帝的國。通講日本是屬佛教，也土耳其是回回教。總是其餘-的親像俄羅斯，法蘭西，奧國，以大利，德國，白耳義，Sek-hui-a，He̍k-san，Po-tô-gâ，英國，人講遐的攏是拜上帝的國。有的屬希臘教，有的天主教，也有的屬基督教。論遐的國從中有的所用的方法來交戰是狠惡到極。有的犯著萬國公法佮人道的規矩。In所做的歹代比拜佛的國通講是閣較見笑。猶過人講in是拜上帝的國。 對按呢生旁邊的人講，拜上帝有甚物路用？拜上帝的國若遐爾惡，不如毋免拜上...

[1916-8 台灣教會報 文類-散文 作者--/-]
論奧國 [ Lūn Ò-kok ]
論奧國 1916.8，no.377，pp.5 佇歐羅巴洲遮的有勢力的國奧國對真早算不止要緊的國。較早奧國比德國較有力。佇主後1866年德國有佮奧國相刣。德國代先備辦相刣逐項真工夫。相刣六禮拜的久就德國較贏，奧國著降服。對彼霎到今德國比奧國較有力。 奧國的百姓有幾若个種類。有的德國種，有的俄羅斯種，有的以大利種，有的Sek-hui-a種，亦有別的種類。對按呢奧國常常拄著擾亂的事，因為有遐濟的種類；有的常常相怨妒。德國種類怨妒俄羅種類--的，以大利種類怨妒德國種類--的等等，致到予官府真僫得辦國家的事。奧國現今的皇帝已經有坐位68年的久。伊坐位遐久，伊的百姓真尊敬伊，較甘願降服。驚了別日皇帝...

[1916-8 台灣教會報 文類-散文 作者--/-]
嫁娶的事 [ Kè-chhoā ê Sū ]
嫁娶的事。 1916.8，no.377，pp.5 台灣北部中會有決定教會毋通佮教會外的人相嫁娶。毋過教會逐所在無偌濟，袂得拄好，欲嫁的人毋知欲娶的佇佗位？對按呢眾傳道師有不止咧掛慮著怎樣來設法，才會完滿通予教會對教會相配婚。所以台北傳道會有稟中會准台北傳道會揀一人來擔當彼層事。 今有得著中會的允准紲台北的傳道會有揀我來做通知者。向望眾傳教師以及眾兄姊若有欲娶，欲嫁的，就緊報我知，我就會替恁通知相當的人。順筆請安。 陳春生， 桃園禮拜堂。...