[1937-12 台灣教會公報 文類-散文 作者--/-]
特告 [ Te̍k-kò ]
特告 1937年12月633期 4 I. 公報佮課本。 舊年度得著列位的愛顧，深深感謝。Taⁿ愛拜託一項，看恁貴會明年度愛注文偌濟份台灣教會的公報佮主日學教員的課本。請至急通知公報社知。致意致意拜託。 II. 1938年，年頭的祈禱會。 每年頭一禮拜，是世界同心的祈禱會。明年是對正月2─8號。正月的公報才欲印詳細。因為1月2號是禮拜日，驚了袂赴通準備說教。所以將禮拜日的說教題以及每日的祈禱題先印佇遮：─ 正月初2 (禮拜日)：主理通自由揀以下的題目說教： 1) 「In攏聚集佇一所在」(行傳2：1)。 2) 「替恁祈禱，決斷無煞，致到得罪耶和華」...

[1937-12 台灣教會公報 文類-散文 作者--/-]
以馬內利的福音 [ Í-má-loē-lī ê Hok-im ]
以馬內利的福音 T. R. S. 1937年12月633期 8-10 「人欲叫伊的名做以馬內利；翻譯就是上帝佮咱佇咧」(馬太1：23)。 「以馬內利」=上帝佮咱佇咧，這是歷史上，前後無比的事實。佇伯利恆的馬槽，用布包做記號的嬰仔，就是「道成肉體，徛起佇咱中間」(約翰1；14)。無歡喜，無平和，踮佇罪惡佮悲哀滿滿的世界，這是真「大歡喜的好消息」(路加2：10)。 原來以馬內利的福音，是佇肉體顯現，化身的結果。上帝欲予人知，伊愛佮人相佮佇咧，所以上帝的囝，出世成做人。化身是上帝的自己啟示=(將本身顯明佇人的中間=)的極頭。除去上帝取人的性質，趁人的條件以外，上帝袂...

[1939-1 台灣教會公報 文類-散文 作者--/-]
迎接新年 [ Ngiâ-chih Sin-nî ]
迎接新年 1939.01 646 期 1-2頁 昭和13年taⁿ已經過去啦！永遠過去啦！！若親像眠夢做伊過去啦！！！哲學家Se-nî-ka按呢講：「咱攏是咧吐氣時間真短；總是咱有真濟的時間，也咱攏袂曉用--伊。佇咱的生涯中全然無利益；抑是攏無意無思；又閣應該做--的毋去做；按呢咧經過。雖然沓沓咧吐氣時間真短，猶久逐日咧做代誌，是親像時間無限量一樣。」 遮的話，敢毋是予咱真通深想--伊嗎？佇新年，咱若親像peh上懸山咧看頭前的路途；有媠媠希望的光咧照，也有滿滿的歡喜佮進取的精神咧衝起來；總是一旦越頭一下看，才知哲學者Se-nî-ka所講--的是事實，未免得生出一種悲傷佇咧。 一年久...

[1939-1 台灣教會公報 文類-散文 作者--/-]
我的聲明 [ Goá ê Seng-bêng ]
我的聲明 彰化醫館院長事務取扱：蘇振輝 1939.01 646期 8-9頁 佇10月13號，接著南部大會的公文書佮議長劉振芳牧師的來訪，交涉講陳宗惠先生為著家事上的都合，限到10月20日，愛辭彰化醫館院長的職，所以愛我著暫時來擔當這个工，到新任院長的出世。總是我知家己的不才，毋是會做這个工的器具，也家己有一間病院都合上也是袂拄好，又閣佇病床的家父聽著這个消息，數次寫批來表示反對，所以就對大會議長告辭。 毋過後來閣得著議長以外數名牧師，宣教師的激勵講，「舊年你佇死線的中間得著上主的恩惠來復生，佇這時上主欲用你，敢通推辭？」然後閣想著： (1) 來年南部大會的平和； (2) 彰化教會佮醫館...

[1939-1 台灣教會公報 文類-散文 作者--/-]
宣道會通訊 [ Soan-tō-hoē Thong-sìn ]
宣道會通訊 宣道會澎湖教區的政治管見 1939.01 646期 20-21頁 論遮的代誌敢別人毋捌，抑是別人無想著？毋是按呢，捌的人濟濟，想著的人無少。若是按呢別人thài會無講？毋愛得失人，按算無大利害關係。若按呢賴某你thài著講？你毋驚得失是抑毋是？毋是按呢，我猶原毋愛得失人。若大家無歡喜--我，我也是艱苦，所以我猶原愛講好聽話，毋過可惜有兩个因端。(1)在其位必謀其政。我踮澎湖的確著想澎湖的興起才好。我有想著毋講，對澎湖無盡忠。(2)若干焦驚人，無驚上帝，按呢較好我著辭職。我受上帝疼，我也著疼伊的教會，姑不將我著講。若講毋著，我便便欲領教，願負荊請罪。若講著，請恁毋通看做無要緊。...

[1939-2 台灣教會公報 文類-散文 作者--/-]
教會的權柄 [ Kàu-hoē ê Koân-pèng ]
教會的權柄 1939.02 647期 01-02頁 本月，各中會攏欲開會來辦理教務。也佇3月，南部大會愛招集來議決通南部所著進行--的。記者猶未寫，本社說的代先，致意愛敬請屬主的列位兄姊，逐日撥時間，迫切替大中會來祈禱。古早人講，國家的興衰，匹夫有責。換話來講，教會的進步佮倒退；眾信徒攏著擔當彼个責任。 試想，初代耶路撒冷的教會，敢毋是真理想的教會嗎？(1)有好的牧師：親像主的兄弟雅各，是一个內外有名望的人格者，做真好的大會議長，gâu辦代誌。(2)閣有好的傳道師：就是遐的12使徒(馬提亞補猶大的缺)好膽熱心傳教。雖然較濟，是干焦記彼得的事，猶久咱通對伊來推測其他的使徒，in定著有得著非...

[1939-2 台灣教會公報 文類-散文 作者--/-]
用母心的教育 [ ēng Bó-sim ê Kàu-io̍k ]
用母心的教育 (接舊年12月12面) 1939.02 647期 　21-21頁 3. 赦免的老母，才是好的老母 1. 對囡仔的期待。 老母對囡仔的期待有真濟款，其中第一下等的期待，就是為著伊本身的名譽，叫囡仔著比別人較gâu，通予別人呵咾，講伊真gâu教育囡仔。對按呢，囡仔就姑不將，不得已著提比別人較好的成績，才會用得。 設使若提比別人較bái的成績，伊就真失望，為著失落伊的名譽，所以真毋願，致到大大責備囡仔。 也閣若老爸有比別人佇較好的地位的時，伊就想講，也著為著老爸的名譽......所以就閣那加添囡仔的負擔。親像按呢，囡仔著為著爸母的名譽來犧牲，受艱苦。 這个是用囡仔...

[1940-1 台灣教會公報 文類-傳記 作者--/-]
信仰美談 [ Sìn-gióng Bí-tâm ]
信仰美談 赤馬叔 (An-pîn-seng 記) 194001 658號 p.5-6 (接11月號8面) 7. 入神學校。救主1887年，赤馬叔拄30歲，吳文彬傳道師，看見一熱心敬上帝，迫切祈禱，關心佇教會，一切的工作，咧想伊將來是非常人。就極力推薦伊，入台南神學校。伊佇神學校，歷任的校長就是巴克禮，甘為霖，涂為霖；漢文的教師，就是林湘雲，許廷芳。 彼時神學校的生活，每月領金3箍，伙食外猶過賰3角銀。禮拜日就出外佈道，抑是輪流去鄉村教會主理禮拜，到拜2就報告消息。 8. 販賣聖冊。讀到3年生的時，教士會議論，著派一名學生去販賣聖書。結局赤馬叔中選，每月薪金4箍。赤馬叔就出發...

[1940-1 台灣教會公報 文類-散文 作者--/-]
母性愛的教育 [ Bó-sèng-ài ê Kàu-io̍k ]
母性愛的教育 著拍死家己予囝兒活 (Liû-n̂g Seng譯) 194001 658號 p.8-9 我有一日對水道橋坐電車欲到指谷町。車內兩爿的長椅人客攏坐到實實，總是佇頂面咧予人釣手的(釣革)攏無人釣，所以中央的路攏是空位。拄拄彼時有一個7，8歲的查埔囡仔對中門入來，也同時對後面的門有一個媠媠的婦人人入來。 彼個查埔囡仔入來坐車的時，隨時去後面，彼個夫人人的邊仔，用比手佮出奇怪的聲咧佮婦人人講話，所以連鞭知影伊是啞口。 總是真奇怪這個啞口的查埔囡仔咧佮伊講話，猶過這個婦人人干焦小可看伊一下若定，就閣看窗仔外，佯毋知攏無欲chhap伊。 伊遐冷淡的態度，這個查埔囡仔...

[1940-1 台灣教會公報 文類-詩 作者--/-]
祝聖輝長老榮任助役 [ Chiok Sèng-hui Tiúⁿ-ló êng-jīm Chō͘-ia̍h ]
III. 祝聖輝長老榮任助役 (詹--氏親) (潘文德) 1940.01 658號 p.16-16 1. 聖輝長老升助役，上帝恩賜真夠額，檢采有人欲目赤，若是阮攏真感 謝。 2. 同族聽著心歡喜，對心底講真恭喜，干焦欠欲喝Bān-jāi，穩當長老 你也知。 3. 聖輝長老的做人，言行舉動心相同，會內會外好名聲，榮光上帝聖尊 名。 4. 阮taⁿ一齊來祝賀，呵咾長老的升高，懇求聖神大幫贊，予你益發gâu做人。 5. 此去益發堅固信，聖道真理做準繩，世間誘惑若吼獅，望你擒牢主徛在。 6. 所做事事真興通...

[1940-1 台灣教會公報 文類-散文 作者--/-]
咱的神學校 [ Lán ê Sîn-ha̍k-hāu ]
咱的神學校 1940.01 658號 p.16-17 這霎若來回想舊年(1939)所經過的事，實在著感謝上帝。伊有賞賜保護佮指導的恩典，所以濟濟人猶原通佇遮準備，通奉事咱的教會。佇3月有4个學生卒業：教育課的同局有好意來赴式；閣有濟濟人客。向望in 4个只有倚靠上帝做工，猶原會接續in佇學校所趁好的習慣。阮替in祈禱，向望in欲盡跑走的路站，來守所信的道理；因為咱知了後有義的冕旒共in備辦hē-teh。就是主欲予in，毋但予in，也欲予見若欣慕主顯現的人。 卒業式了後，校長佮滿牧師娘有倒轉去英國歇睏。滿牧師佇teh 的時，學校有漸漸進步，大家teh向望伊無偌久會閣來。四月有4个學生入學：...

[1940-2 台灣教會公報 文類-散文 作者--/-]
基督徒的生活 [ Ki-tok-tô͘ ê Seng-oa̍h ]
基督徒的生活 194002 659號p.1-2 基督徒是甚物？亦基督徒的生活是甚物？佇新約聖冊的中間有濟濟款的講法。就中彼得前書的批所講的不止有特色佇咧。照彼得先生所講，基督徒是「四散徛起的出外人」，是「寄跤佇世間的」，是「做寄跤出外佇外邦中的人」。原來咱咧講人踮世間是親像做出外。「我若出外人客。」-彼个意思咧指明日子的緊過，人生的無常，宛然親像箭，親像梭走真緊，連鞭過去。所坐的椅，所徛的厝，抑是講台，以及所做的事業著讓別人。總是彼得先生所講做出外的意思較毋是為著按呢。伊講咱做基督徒是「寄跤出外的人」，彼个意思是講咱做基督徒，雖然徛起佇眾人的中間，猶過咱著親像出外的人家己分別毋通佮周圍的人...

[1940-2 台灣教會公報 文類-傳記 作者--/-]
信仰美談 [ Sìn-gióng Bí-tâm ]
信仰美談 赤馬叔 (An-pîn-seng記) 194002 659號 p.6-7 (接正月第5面) 9.卒業傳道。救主1892年，春季對台南神學校卒業，受教士會派來蹛岩前的教會。這是伊前捌蹛遮教小學，大家熟似，兼管關仔嶺，白河的教會，按呢是一人管3个教會。佇彼年就佮吳--氏Boé結婚，來成圓滿的家庭。佇遮在勤4年久。 教士會就命令伊，著轉勤去澎湖馬公的教會。 彼時日清戰爭，清朝大敗，將台灣割讓予日本。皇軍已經佔領澎湖馬公，清朝的司令官劉永福，將台灣改做民主國，也發行紙票，欲佮皇抗戰。台灣的港口攏有劉永福的兵把守。 赤馬叔欲對東石港坐船過澎湖。到位日欲落海啦！劉永福的兵問...

[1940-2 台灣教會公報 文類-散文 作者--/-]
母性愛的教育 [ Bó-sèng-ài ê Kàu-io̍k ]
母性愛的教育 來學動物 (Liû-n̂g-seng譯) 194002 659號 p.7-8 對我的幼稚園保育室的塗跤下聽見狗仔囝咧吼的聲已經過一禮拜去啦。共掀起來看覓，才知真正有狗母(散--的)生四隻囝佇遐。遐的狗仔囝卻是袂通講佮普通的平(pêⁿ)肥，總是毛色也是媠媠古錐古錐。總是這隻狗母是這近附的人所厭賤的，目睭狠kài-kài，真狠惡的面相，所以老實講，伊做岫蹛遮，我也是真gê。 又閣一項，狗母的特性，若咧飼囝的時，伊的性真烈，是真愛咬人，所以我想講有幼稚園的囡仔佇遮，真危險，毋知著怎樣處置伊。拄好閣無偌久，當局者有欲thāu散狗，就想講共伊活掠來去交當局。 我想講...

[1940-2 台灣教會公報 文類-散文 作者--/-]
佇主的跤頭趺下 [ Tī Chú ê kha-thâu-u-ē ]
佇主的跤頭趺下 (周吳氏瓊英) 194002 659號 p.19-20 列位親愛的兄弟姊妹平安。我愛紹介一本真寶貝的冊予大家知。我攏毋知有這本遮爾好。有一日，彭Chheng-iok先生有提我所尊敬的孫大先生所著的 「佇主的跤頭趺下」的冊來送我。我就隨時共伊讀，感覺袂捌讀著親像這本冊遮爾好，遮爾寶貝。是孫大先生本身坐佇主的跤頭趺下來問，主耶穌親身咧應的。寫了真明，真合佇現代的時勢佮思想。我掠伊做我的性命的性命，真疼伊，的確欲讀伊到我的一世人才欲煞！若有人猶袂捌讀著，請恁趕緊對公報社注文，一本是4角，郵費3 chiam。若有兄弟姊妹真愛讀，也做袂到的，阮歡喜買送伊，抑是會堪得出一半錢(兩角...

[1940-3 台灣教會公報 文類-散文 作者--/-]
客西馬尼的苦痛 [ Khek-se-má-nî ê khó͘-thàng ]
客西馬尼苦痛 194003 660號p.1-2 咱的主佮11个學生相佮吟最後的晚餐的詩了後，大家靜靜行對耶路撒冷城外出去，也行過汲倫溪到佇橄欖山的一所在，叫做客西馬尼(檢采是馬可的園)，就是前沓沓佮學生相佮去佇遐交陪上帝的所在。彼暗，是盤過節暝，應該月著圓，著媠，著光，猶過咱通想像天然界有為著伊的主顯出悲哀的現象；親像主受釘佇十字架的時遍地烏暗，也地大振動，這揲檢采有忽然起濟濟烏雲來遮閘媠媠的月，閣有大風哀傷的款咻咻吼，來益發加添客西馬尼的慘境。 咱的主有留8个學生佇較口面，也親像佇黑門山等的款式，有另外chhoā 3个學生較近佇身邊，向望通對in得著同情佮安慰，也家己入去較後面來爭...

[1940-6 台灣教會公報 文類-傳記 作者--/-]
南中通訊 洪--氏真的小傳 [ Lâm Tiong Thong-sìn Âng--sī Chin ê Sió-toān ]
南中通訊II.洪--氏真的小傳1940.06 第663號 p.16洪--氏真較常叫做Ho͘姆，是戴返牧師的令先母。主後1854年出世，到今年（＝1940年），拄享壽86歲。46歲的時信主，共40年久經過信的生活。會來就近主的動機，是對佇拄著病痛，感覺平時所崇拜的神佛，袂通予伊的心平安，就受苦勸決心尊趁道理入信仰敬拜上帝。伊真照本份服事上帝，上帝施恩賜福予伊，予伊子孫真興旺，子兒新婦，內外孫總算成百人。論到伊的生平真可取，有濟濟美點。這霎記幾若項予咱做數念：-- 1、信仰堅固：信主了，隨受人攻擊，鄙薄，厭賤，譏刺，以及拄著患難困苦，也是有進無退。 2、致意家庭：真奇妙！！！子孫大多數佮伊同心敬拜...

[1940-7 台灣教會公報 文類-傳記 作者--/-]
故梅監務牧師的略歷 [ Kò͘ Muî Kam-bū Bo̍k-su ê Lio̍k-le̍k ]
故梅監霧牧師的略歷1940.07 第664號 p.12A.D. 1866年。出世佇蘇格蘭敬虔的家庭。A.D. 1890年。卒業格拉斯高（Glasgow）的大學，得著M.A.的學位，也特別研究古典學佮哲學有得著這兩科的名譽學位。A.D. 1889--90年。是伊佇格拉斯高神學校（Glasgow Free Church College）讀冊的路尾年，在校中有受揀做學生會的會長。A.D. 1890--95年。有佇格拉斯高城一個說教所（Gallowgate Mission） 來為著一般的平民階級傳道理。A.D. 1895年12月18日。有佮蘭大衛醫生，連德烈牧師來到台灣，踮台南學台灣話。A.D. 18...

[1941-1 台灣教會公報 文類-散文 作者--/-]
約拿單的囡仔 [ Iok-ná-tan ê Gín-ná ]
約拿單的囡仔 1941年1月 670期 1-2 總是囡仔毋知這是甚麼意思，只有約拿單佮大衛知這个代誌(I撒母耳 20：39)。 掃羅真怨恨大衛，愛陷害伊，m̄-kú伊的囝約拿單疼大衛親像疼家己的性命。對按呢約拿單真致意報大衛知甚物時老父生氣--伊。約拿單就佮大衛約束，伊欲出去田裡射箭，也欲chhoā一个囡仔去拾箭，閣講，我若共彼个囡仔講，「看ah，箭佇你這爿」，就是teh指這款意思，也若共囡仔講，「看ah，箭佇你彼爿，」就是teh指閣一款意思。親像按呢，佇一早起約拿單果然chhoā一个囡仔出去田裡，伊就射箭，也彼个囡仔有去拾箭。聖冊記講，「總是囡仔毋知這是甚物意思。」 ...

[1941-2 台灣教會公報 文類-散文 作者--/-]
福音的使命 [ Hok-im ê Sù-bēng ]
福音的使命 1941年2月671期 1-3 金銀我攏無，獨獨我所有--ê予你。佇Ná-sak-le̍k耶穌基督的名，你起來行(行傳3：6) 佇行傳的頭站有講使徒行濟濟奇事佮神跡(2：4)。甚物神跡，咱毋知。這霎咱才起頭讀著使徒有醫好一个軟腳--ê，kiám-chhái是為著這層有顯出大的結果-就是一面教會興旺，人額加添；閣一面，教會亦受著陷害-對按呢著者路加才特別記明這个。 事件的發生，是耶路撒冷，tú是聖殿祈禱會的時間。下晡3點，晚loán 的光線有照佇媠媠的聖城，佇彼時彼得，約翰兩人同心相佮行，欲去赴祈禱會。In行到佇殿門，就是叫做「媠門」的所在，佇遐...