[1937-10 台灣教會公報 文類-散文 作者-吳清鎰/Gô͘ Chheng-ek]
樂山院 [ Lo̍k-seng-īⁿ ]
樂生院 吳清鎰 1937年10月631期 30 列位兄姊！樂山園的消息，咱佇本報常常捌讀著。總是樂生院咱較毋熟似。樂生院就是官設的癩病院。遮所收容的患者男女總數，現時四百四十名。對5，6年前khai-設以來，陳溪圳牧師有常常去遐傳道理，總是對今年4月以來，有黃六點傳道師專務佇遐做主的工，來聽的人有時七八十，總是相接紲來聽的人亦有三四十人。佇9月5日，雙連的小會聚集佇樂生院，有13个癩患者來問道理，逐个道理不止明，閣in佇院內的生活亦不止好模樣，實在會堪得做主的學生，所以有攏總共in接納，行洗禮，紲守聖餐。患者的中間，有的對以前已經信道理，閣醫生職員，看護婦亦有的是信者。...

[1937-10 台灣教會公報 文類-散文 作者-駱先春/Lo̍k Sian-chhun]
耶穌干證本身(1) [ Iâ-so͘ kan-chèng pún-sin(1) ]
耶穌干證本身(1) (對約翰) 駱先春 1937年10月631期 25-26 佇約翰福音傳，耶穌干證本身的記事真濟，若是佇別的福音傳是人干證耶穌的記事較濟。 欲想耶穌干證本身的事，佇遮愛想兩項，就是耶穌的人格佮伊的事業。關係人格的事，也欲想兩項，就是人子佮上帝的囝。 I. 人子。 這个名稱，別的福音書比約翰寫較濟擺，是上帝的囝成做人謙卑的名稱。這人子，若看但以理7：13以下，就予咱通知人子的思想，佇遐就有發芽，這是彌賽亞的 稱號。先知有讖語彌賽亞著對人的形狀來出現。耶穌講起伊是人子的時，毋是咧講起伊來形式成做人，抑是講起取人的形狀nā-tiāⁿ，伊是事實的人。約翰...

[1937-10 台灣教會公報 文類-散文 作者-吳天命/Gô͘ Thian-bēng]
苦難的意義 [ Khó͘-lān ê ì-gī ]
苦難的意義 吳天命 1937年10月631期 22-24 「因為萬物所為著伊，萬物所對伊的，咧chhoā濟濟囝到佇榮光，就予救in的首領對苦難來成完全，本是合宜」(希伯來2：10)。 希伯來人書的記者，佇這節有發表論苦難的一个偉大的定義。伊的意思共伊簡約來講，就是講苦難是欲予人成做完全的，又閣人對苦難來得著完全，這是上帝的意思。這款的定義，對人的理解，人的立場來看，是僫得理解的事，佮人的所拍算是對反。人會得著完全；這是重罪無完全的世間人所想的範疇外的事。這个完全是對苦難來成--的；坐也是孜孜咧想看活，快樂平和的世間人所袂曉得的。對苦難的路，人得著完全的事是上帝的意思...

[1937-10 台灣教會公報 文類-散文 作者-吳清鎰/Gô͘ Chheng-ek]
平和 [ Pêng-hô ]
平和 吳清鎰 1937年10月631期 22 人愛平和。總是平和的意義在佇安全(安全)。生命財產無安全的所在，袂通算做是平和的所在。德譯語的平和佮安全是siāng一字(Fricde)。平和佮安全實在袂通相分離。 平和有兩款；就是人的平和佮上帝的平和。(1)人的平和是現狀維持的平和，是妥協tek，是一時的，是表面tek；內中有疑心暗鬼佇咧，有一日會爆發，毋是徹底tek永久tek的平和。這款平和無安全性佇咧，毋是真實的平和。這款平和是用現狀維持佮妥協做in的信條，無用正義做基礎，結局是咧做欲來的鬥爭的準備nā-tiāⁿ。(2)上帝的平和是用上帝做中心，用正義做基礎。無合正義的現...

[1937-11 台灣教會公報 文類-散文 作者--/-]
非常時的奉仕 [ Hui-siông-sî ê Hōng-sū ]
非常時教會的奉仕 1937年11月632期 1-2 當佇這个國家非常時，國民通國一致盡奉公的實在。標榜至誠，正義，犧牲愛的教會啊！眾基督徒啊！咱敢通恬恬，來無為著國難phoe命mah？對皇軍的慰問，以及遺家族的扶助慰藉，或是獻金抑是種種的計畫，實行，咱的確毋通徛佇人的後面。 總是咱毋通掠佇物質上的援助，抑是人情tek的慰問做滿足；因為這是一般人人所做會到的奉仕。著會記得，佇咱的教會，有獨特的奉仕(獨特奉仕)佇咧；只有教會會通做。Taⁿ彼个教會獨特的奉仕是甚物？ 頭一項：祈禱 這世間的歷史，攏是全能的上帝咧掌理。一切的運命，攏是在佇上帝的聖手。祈禱，就是欲振動上帝的聖...

[1937-11 台灣教會公報 文類-散文 作者--/-]
時局佮信徒 [ Sî-kio̍k kap Sìn-tô͘ ]
時局佮信徒 1937年11月632期 4-5 「咱毋通親像其餘的人咧睏；著警醒節制」(I 帖撒羅尼迦5：6) (M. C. H) 今仔日是通世界眾宗教墮落極點的時代。也是全人類離開上帝的旨意真遠的時代。信基督宗教的基督徒啊！咱著深深家己反省。現代的基督教啊！著閣倒轉佇聖冊；紲斟酌想咱基督宗教的本義(宗教之本義)是甚物？就是：「罪人得著赦罪，稱做一个義的人，來徛佇上帝的面前」。換話來講，就是佮上帝相佮佇咧，順趁上帝旨意來經過世間，無驚甚物困苦，病疼，窘迫，死失；逐日是歡喜呵咾感謝主的大恩。你是這款的基督徒抑毋是？若...

[1937-11 台灣教會公報 文類-散文 作者-賴仁聲/Loā Jîn-seng]
歐美宗教現勢 [ Au Bí Chong-kàu Hiān-sè ]
歐美宗教現勢 賴仁聲 1937年11月632期 5-6 講歐、美的宗教現勢，自然是指拜上帝的事來講。(卻毋是講歐、美的人攏有拜上帝，也毋是講除拜上帝以外攏無別款的宗教。雖然是有別款宗教，是極毋成物。雖然有人無拜上帝，總是in大概也無拜偶像)。我所講的拜上帝，是包涵天主公教會，佮新教的眾教派來講。 論欲講遮的事，佇我的頂面有宣教師，in是對遐來--的，穩當比我較知。閣佇我的同輩佮後輩的先生，比我較通光世界的大勢的人，穩當真濟。何物苦著我這个西瀛珊瑚岩石，洘燥不毛的小島的這个無學的浪人來寫咧。 無別項啦。是因為我的教會總數不出20連戶。傳道地不出直兩舖連，橫毋知有7、8...

[1937-11 台灣教會公報 文類-散文 作者--/-]
世界一週 [ Sè-kài It-chiu ]
世界一周 1937年11月632期 7 1. 照最近國際聯盟統計局的調查：世界總人口有20億；年年加添有1800萬。 2. 世間的天國。佇美國テキサス州，叫做キーン的鄉社，只有6百外人徛起。佇遐毋捌有一个犯人，自然無刑務所，也無裁判官。無大好額人，也無散凶人。無資本家佮勞動者的鬥爭。無好額佮散凶的忌剋，in無食肉，無食薰佮酒。一切咖啡紅茶的刺激的食物攏無用。無有跋筊，抑是屬跋筊鬥輸贏彼號。也無運動會。In的娛樂，是讀高尚的冊，佮聽好的音樂。In規社攏是相和，相疼信主熱心的基督徒。 3. 最近發表佇美國的衛生公報講：人一生第一安全的時期，是11歲。因為是過了幼年...

[1937-11 台灣教會公報 文類-散文 作者-吳天命/Gô͘ Thian-bēng]
相尊重使命 [ Saⁿ chun-tiōng Sù-bēng ]
相尊重使命 吳天命 1937年11月632期 22-23 人出世佇世間，伊的才調，工作無相siāng；對上帝所領受的使命也是無siāng款。咱受揀選來做基督徒的人，所受的使命也是無siāng。平平是著為著傳福音，榮光上帝來生活佇世間，毋過所活動的方面佮工作是無siāng款；通講逐人有逐人所著盡的使命佇咧。對這款逐人無相siāng的使命，咱著會曉謙卑來相讓，相尊重。有人常常墮落佇固執。過頭高調家己的使命，紲旁若無人來看輕別人的工作。愛達成家己的所愛，強調家己是對上帝受著使命，來壓止別人的拍算佮所做。按呢紲致到惹起相鬥爭，相怨恨，相排斥。若按呢，我想毋是真實有咧做伊的使命。因...

[1937-11 台灣教會公報 文類-散文 作者-駱先春/Lo̍k Sian-chhun]
Gâu人的聖冊觀 [ Gâu-lâng ê Sèng-chheh-koan ]
Gâu人的聖冊觀 駱先春譯 1937年11月632期 29-30 1. アブラハム，リンカーン。「我信聖冊是上帝所予人第一好的恩賜，對救世主所出一切的好，攏是對這本冊來予咱。」 2. ジヨーヂ，ワシントン。「若無上帝佮聖冊，欲來四正治理世間，這是不可能的事。」 3. ナボレオン。「聖冊毋是普通的冊nā-tiāⁿ；是有活命的物，有氣力通贏攏總抵敵伊的。」 4. ヂヨン、ラスキン。「我所寫的冊若有甚物通可取的，實在只有是對我做囡仔的時，我的老母逐日讀聖經的一站予我聽，閣逐日學一站記牢佇心裡的結果。」 5. アンドルー，ヂヤックソン。「彼本是咱共和國所根據...

[1937-11 台灣教會公報 文類-散文 作者-蕭樂善/Siau Lo̍k-siān]
三年運動特記 [ Saⁿ nî ūn-tōng te̍k-kì ]
三年運動特記 蕭樂善 1937年11月632期 26-28 1. 新出發的教會。 (1)信仰的食料問題。近來關係人的身體的營養有真濟款的研究；因為到taⁿ猶未得著真合，真-理想的食料。咱的信仰的食料是咱不時的問題；總是咱看做是路尾的問題，致到食物濟濟樣，所養飼的人五花十色。信仰的畸形，營養不良，無方針，無主旨的人濟濟。 耶穌講，「我是活命的餅，就近我--的決斷袂枵。」咱的食料佇主的內面以外無好的食料。伊的人格，伊的十字架的精神，伊的大量，廣大的心，伊對真理，正義的勇敢，伊的清氣的心，咱對遮的有甚物勞碌抑無？咱放拺咱第一理想的食料，也逐日咧食人情米，配假好的菜，食名...

[1937-11 台灣教會公報 文類-散文 作者--/-]
歇熱中蹛教會的感想 [ Hioh-joa̍h tiong toà Kàu-hoē ê kám-sióng ]
歇熱中蹛教會的感想 神學校：楊信得 1937年11月632期 15-16 逐位到歇熱的時，算是阮神學生的好機會；上帝有差阮到逐所在做伊聖的工。真可惜，毋捌聽見阮這个小團體的中間，捌有人對讀者諸位報告歇熱中阮所做的工作，佮講明阮的感想。我想按呢是無有盡阮的本份，所以我就愛額筆小可來盡我的本份，講明淡薄。卻我感覺家己無有投稿的資格，總是若親像我無寫袂煞得，所以我就不得不來寫淡薄佇列位兄姊的面前。 這个歇熱，本我是受拜佇彰化病院，總是後來變更，我就定著欲去畚箕湖。 佇遮我大概有得著3項新的體驗－ (A)佇遮我真感謝上帝，因為伊有chhoā我看伊的手所做偉大的自然界...

[1937-11 台灣教會公報 文類-散文 作者-許水露/Khó͘ Chuí-lō͘]
六十六卷的聖冊 [ La̍k-cha̍p-la̍k koàn ê Sèng-chheh ]
六十六卷的聖冊 許水露 (接10月第13面) 1937年11月632期 16-18 第2段：掃羅的治世(8：─15)。 [百姓愛要求設立一个王，上帝就賞賜掃羅予in]。 I. 掃羅受揀做王(8：─10)。 1) 撒母耳年老(8：) 撒母耳年老，囝兒不肖，可見老母的感化力比老爸較大。百姓愛要求設立一个王來管理，上帝孤不將允准。總是王的確著聽上帝的話，完全順服敬畏主，主才欲用伊。 2)謙卑的掃羅(9：) 伊講「我是便雅憫支派中做第一小--的」。◎舊約的掃羅，是保羅變做掃羅。◎新約的掃羅，是變做保羅。起初掃羅真謙卑。伊的品性：(1)孝順爸母；...

[1937-11 台灣教會公報 文類-散文 作者-雪峰逸嵐/Soat-hong Iat-lâm]
路得記的研究 [ Lō͘-tek-kì ê Gián-kiù ]
路得記的研究 雪峰逸嵐 (接10月第10面) 1937年11月632期 19-21 2節：「波阿斯敢毋是咱的該親mah？伊今暝簸大麥佇五穀場。」咱欲chhoā人歸主，著認識大權能的真神。Ná-o-bí講，「伊是咱的該親」。照猶太風俗，若欲贖回產業--的，著至親才會做--得(利未記25：25)。咱的主耶穌出世佇律法下(加拉太4：4)，來成做咱的兄弟(希伯來2：11)，咱有肉體，耶穌也成做肉體(希伯來2：14)，閣成做有罪的肉體的形狀(羅馬8：3)，按呢就成做咱至近的親戚。所以才有權利通做咱的救贖者，「伊今暝簸大麥佇五穀場」。咱看波阿斯雖是大好額人，猶過真勤緊，本身...

[1937-11 台灣教會公報 文類-散文 作者-駱先春/Lo̍k Sian-chhun]
耶穌干證本身(2) [ Iâ-so͘ kan-chèng pún-sin(2) ]
耶穌干證本身(2) (對約翰) 駱先春 1937年11月632期 24-26 頂月日所寫，論耶穌的人格的內面有講伊就是人子。佇這个條目的內面有講起：(a)伊就是完全的人；(b)伊就是代表tek的人。 也這月日愛來相佮看耶穌的人格的第二項就是：─ II. 上帝的囝。 共觀福音書的內面，耶穌毋捌直接將這个名稱來稱呼家己，只有佇幾若位伊叫家己做「囝」。閣親像馬太26：63，有上帝的囝的稱呼佇咧；這是祭司長所稱呼伊的。 佇約翰，耶穌用「上帝的囝」，有幾若擺，請看5：25，9：35，10：36，11：4。以外有真濟擺用「囝」，「伊的囝」，「你的囝」，抑是「獨生的囝...

[1937-11 台灣教會公報 文類-散文 作者-陳添旺/Tân Thiam-ōng]
言語的修養 [ Giân-gú ê siu-ióng ]
言語的修養 陳添旺 1937年11月632期 29 咱基督教是宗教上高尚的宗教，所以對佇修養的問題，閣較要緊毋通親像別款無修養。 言語的修養。雅各講，佇講話若無跋倒，是最逐項齊備的人(3：2)。這是真要緊，時常聽著會友講話彎彎曲曲無正直。口是心非，有的歹喙，爸頭母骨咧罵，有的做長老執事嘛是按呢，致到受氣的時罵罵出來。挵破大事比會外猶較害，所以對這項真愛注意。 婦人人用詈，用咒詛；對別人，對囝兒嘛是按呢詈。有時對會內會外，若受氣粗喙iá-táu，予人真艱苦；也時常害大事，無收山的日。所以喙舌親像火，會致到燒厝，燒山，毋通無警戒。 對家庭的模範，好歹攏有in模範，是大人若細膩...

[1937-12 台灣教會公報 文類-散文 作者--/-]
讀聖經的運動週 [ Tha̍k Sèng-keng ê ūn tōng Chiu ]
讀聖經的運動週 1937年12月633期 2-3 每年12月第一主日，就是世界公訂的聖經記念禮拜日。佇這日，大會有決議著舉行聖冊記念禮拜，佮獻金做寄付聖冊公會的路用。世界的腔口有5千款；聖經有用991款的腔口譯--伊。鄙人咧想，佇本週著做眾信徒讀聖經的運動週。至少著立志欲一年讀聖經一遍。抑是特別鼓舞會友閣出力來研究聖經的總大意。對主日學學生，送in聖經來獎勵in讀聖經。試想一本聖冊有甚物價值通予咱不時讀--伊，永遠記念--伊？ 1. 聖經攏是上帝所啟示。 聖經全部有66本：舊約39，新約27。著作的先生3、4十人：歷過的時間有千外年。寫的人，出身佮背景攏無相同。總是精...

[1937-12 台灣教會公報 文類-散文 作者-孫雅各/Sun Ngá-kok]
疼的王 [ Thiàⁿ ê Ông ]
疼的王 孫雅各 1937年12月633期 24-25 兩千年前，有幾若个顧羊的人佇馬牢內敬拜服侍一个細漢囡仔。 今年，大概500,000,000人，佇60外國，欲敬拜祝賀伊的生日。今仔日通講，對耶穌的出世，世間人的生活有得著新的意思佮新的方針。耶穌有予咱通知上帝的疼是甚物款。伊有證明，上帝的疼就是： (1)個人tek的疼。 有時人拍算上帝是天頂的神，宇宙的主宰，總是較無干涉咱逐日的生活。耶穌予咱通知上帝是咱的爸，亦疼咱個人，「贏過爸母的疼」。「恁的頭毛亦攏計算」。牧者若是失落一隻羊，伊有去山路四界揣到得著彼隻。這个攏是證明個人tek的疼。耶穌落來世間佮人...

[1937-12 台灣教會公報 文類-散文 作者-駱先春/Lo̍k Sian-chhun]
聖誕俗化的防止 [ Sèng-tàn Sio̍k-hoà ê Hông-chí ]
聖誕俗化的防止 駱先春 1937年12月633期 22-24 全世界的人用歡心咧期待的祝救主聖誕的期日，閣一擺直直逼近佇咱的眼前啦！ 佇這時大家著異口同音佮2000年前救主耶穌出世彼暝的天使佮天軍相佮齊聲呵咾上帝，講，「佇極懸的位榮光歸佇上帝，地上和平佇伊所歡喜的人的中間。」 「榮光歸佇上帝」這句，就是欲主張「聖誕俗化的防止」的積極tek的方面。咱祝聖誕的目的，是欲歸榮光予上帝，抑是有欲予咱的五官快樂，大家喊hoā，交陪，心適過日而已？「榮光歸佇上帝」，這句通予欲迎接，抑是慶祝聖誕的人不止有通吟味的價值佇咧。 先知讖語講，「看啊！有在室女欲懷孕生囝，共伊號名叫以馬...

[1937-12 台灣教會公報 文類-散文 作者--/-]
特告 [ Te̍k-kò ]
特告 1937年12月633期 4 I. 公報佮課本。 舊年度得著列位的愛顧，深深感謝。Taⁿ愛拜託一項，看恁貴會明年度愛注文偌濟份台灣教會的公報佮主日學教員的課本。請至急通知公報社知。致意致意拜託。 II. 1938年，年頭的祈禱會。 每年頭一禮拜，是世界同心的祈禱會。明年是對正月2─8號。正月的公報才欲印詳細。因為1月2號是禮拜日，驚了袂赴通準備說教。所以將禮拜日的說教題以及每日的祈禱題先印佇遮：─ 正月初2 (禮拜日)：主理通自由揀以下的題目說教： 1) 「In攏聚集佇一所在」(行傳2：1)。 2) 「替恁祈禱，決斷無煞，致到得罪耶和華」...