[1916-1 台灣教會報 文類-傳記 作者--/-]
吳雞母ê小傳 [ Gô͘ Ke-bó ê Sió-toān ]
吳雞母ê小傳1916.01 370卷 p.8-9在11月 27號，tī埤頭拜堂ê房間，上帝有召咱ê好朋友吳雞母（jū名，文賓）去kap主永遠toà。咱自然著煩惱bē會thang tī chia koh再kap伊相見；總--是心亦著平安大感恩，因為吳--先生36年久做教會盡忠ê差用。伊bat tī幾若所在當傳道ê職，親像tī Ka-poà-soá、Giâm-chêng、茄苳仔、後山、柑仔林、澎湖、阿里港、牛擔灣、萬丹kap埤頭。會友tī逐位尊敬伊、gâu疼伊，因為傳道理ê時陣，伊所講不止有應效，會堪tit勉勵、安慰眾人ê 心。Toà tī埤頭ê時，上帝大賞賜伊ê奴僕。教會tī hia 較久真冷淡...

[1916-1 台灣教會報 文類-傳記 作者-廖得/Liāu Tit]
李老王的小傳 [ Lí Lāu-ông ê Sió-toān ]
李老王的小傳。 (廖得記)。 1916.1 no.370 pp.9-10 李老王佇1848年佇大字崙田洋出世。長成的時搬去屬西螺的水尾莊徛起；彼時佇遐有一兩戶咧徛nā-tiāⁿ。後來那濟人搬去。到伊39歲的時，埔心莊阿連長老的小妹一家3人移去遐蹛；雖然是毋捌聖冊，也無伴通聚集；猶過暗時好膽吟詩祈禱佮主交陪。對按呢老王叔彼時猶未捌聽見人禮拜，所以就去覕咧偷聽，看in念甚物。忽然聽見in咧替彼莊的眾人祈禱求福氣；伊的心受感激就信主。 得著道理了，熱心致意守禮拜；雖是禮拜日早起無衫仔褲通換，無飯通食，無米通紮，因為彼時伊的婦人人猶未信主，又閣到茄苳仔拜堂倚欲2舖，路也真歹行；總是伊攏無驚...

[1916-1 台灣教會報 文類-詩 作者--/-]
慶賀禧年ê詩 [ Khèng-hō Hi-liân ê Si ]
慶賀禧年ê詩1916.01 370卷 p.10-11[中會議定舊年11月21號逐所在ê教會著做慶賀禧年會，也有託重巴牧師備辦1張順序單，hō͘逐所在讀ê聖冊kap吟詩攏著相同。就請吳文彬先生寫一首ê詩，做hit 日ê路用。寫了寄來府城，m̄-kú 牧師已經去日本，就無接著。今將hit 首ê詩印tī 下底hō͘ 逐家看，也thang 數念吳文彬先生；雖然伊今無tī-teh，咱iáu-kú若親像teh 聽伊ê 話。]1.台灣真理ê起頭，源tuì英國長老教：長老教會眾信徒，甘願克己疼耶穌。 2.準心想beh救靈魂，備辦福音救靈船；募集緣金千萬圓，就請牧師過台灣。 3. M̄-nā救人脫罪過，亦ài醫...

[1916-1 台灣教會報 文類-散文 作者--/-]
內地狀況 [ Loē-tē Chōng-hóng ]
內地狀況 (黃仁榮記--的。) 1916.1 no.370 pp.11-12 我佇舊年九月間，佮台中盧An-kun做伙去內地，有經過濟濟出名的所在，其中目睭所有看見，心內袂免得有感動。所以寫幾字來印上報。向望看了通做參考的路用，也予列位淡薄知彼爿的狀況。 內地近來的進步，算是真發達；比並支那是天差佇淵。因為十年前我有去中國，到前--年閣去，看逐所在攏差不多，甚至有埠頭反轉變那衰微。論到內地卻毋是按呢，逐項加真興旺。我十二年前去，到這幫攏袂認得，因為市區改正，大厝懸樓，加起真濟，生理也加真鬧熱，是對交通的利便。火車，電車，自動車，攏加真濟，電報，電話滿四界都有，小可的埠頭，也變真鬧熱。教...

[1916-2 台灣教會報 文類-散文 作者--/-]
羅馬8章14節 [ Lô-má 8 chiuⁿ 14 chat ]
羅馬8章14節 1916.2 no.371 pp.1-2 「凡若予上帝的神chhoā--的是做上帝的囝。」(羅. 8：14)。 「做上帝的囝」這句甚物意思？俗語講，天生地養。上帝創造天，地，海，萬項物；也創造人。伊也庇佑萬項的活物，予in食夠額。「你展開你的手，見有活的物你予in食到飽。」「天爸用日照好佮毋好的人，用雨沃義佮不義的人的田園。」按呢知上帝創造萬人，也有看顧in，通講上帝是眾人的爸，也眾人是上帝的囝兒。這算是較闊的意思。 毋過人佮上帝嶄然有較親密的干涉。人有一條袂死的靈魂，身軀雖然死，靈魂佇咧。因為按呢人佮其餘的活物真正有大各樣。譬論豬，狗，貓死就煞：人死就猶佇...

[1916-2 台灣教會報 文類-散文 作者--/-]
馬醫生的批 [ Má I-seng ê phoe ]
馬醫生的批。 1916.2 no.371 pp.4 阮接著老馬醫生的批，有翻譯紲印佇下底：- 屬台南教會的好朋友啊！ 佇11月21號算是台南教會歷史中有名聲的日。馬醫生娘佮我本身也大記念彼日。列位佇台灣有好機會通數念上帝50年久所賞賜的憐憫仁愛，也遮的無才調的差用佇英國猶原咧感謝上主佇遮濟年的中間有大施恩予阮。阮知恁有替阮祈禱，也阮真歡喜求上帝將這个禧年做台灣閣較大福氣的源頭，就是向望毋免偌久懸山的生番會得著福音。 上帝召我來傳福音佇這个媠的海島，這是做我第一大的榮光。起頭設教彼霎卻有拄著真濟苦難，總是主贊我醫好濟濟病人，對按呢伊有開大的門路，予福音通入人的心，代先傳道理佇打狗，...

[1916-2 台灣教會報 文類-散文 作者--/-]
論德國 [ Lūn Tek-kok ]
論德國1916.02 371卷 p.6-7德國人 ê 祖tuì 真早有toà tī 歐羅巴洲ê 北爿。2 千外年前，in iáu-bē有得著開化，常常kap羅馬國相thâi。後--來有宣教師去播揚道理 tī in 中間，in 就漸漸那信，到後--來較濟有奉基督教做 in ê 宗教。得著道理了後 in 就漸漸那開化。Tī 德國耶穌教 （Protestants），比羅馬教ê 人有較濟。路德馬丁（Martin Luther）改正宗教是 tī 德國，所以 tuì hit-tia̍p 落--來，德國 ê 教會較無降服tī 羅馬 ê 教王。 德國合做1國是無偌久，幾若10年前 nā-tiāⁿ。較早有分做幾...

[1916-2 台灣教會報 文類-傳記 作者--/-]
劉Ak的小傳 [ Lâu Ak ê Sió-toān ]
劉Ak的小傳。 (劉碧玉記)。 1916.2 no.371 pp.9 Ak叔本是南部人，佮伊的某蹛佇番仔厝。佇遐抾濟濟囡仔，從中有的雨伊拍損，致到翁某真煩惱操心擘腹紲餒志。拄好彼時伊拄著東港一个會友名叫Liāng兄。伊有擔磁仔去遐賣，有講道理予伊聽，紲招伊來禮拜。彼霎伊幾若擺去東港禮拜，總是路真遠，又閣是伊一人nā-tiāⁿ，按呢免偌久就放捒去。 到後來in全家攏搬轉來劉厝莊蹛。差不多佇主後1874年伊正得著道理。代先去坎頂莊，後來去Lâm-gān莊守禮拜。聽道理年外久就入教領洗禮，以後不止出力鼓舞招呼濟濟人來聽道理。伊的厝逐暝昏有幾若人來佇遐聚集禮拜，伊將伊所捌的歡喜講予人聽，出力招...

[1916-2 台灣教會報 文類-散文 作者--/-]
焦吧年ê消息 [ Ta-pa-nî ê Siau-sit ]
焦吧哖的消息。 1916.02，no. 371，pp.10-11 佇9月的報有講焦吧哖的消息；彼時會友攏平安，是干焦厝宅貨物受火燒nā-tiāⁿ。無拍算教會報出了的時，才拄著連累的罪。會友受掠總共22人，有3个豁免，7个死刑，12个無期徒。無期徒中間有一个執事，姓潘名丁旺；是熱心佇教會。有2个入教者，其餘--的是信道者。今焦吧哖的教會大半失落氣力。現時遐的避難會友的家，佇這近日政府有准in轉去隨人的所在，搭草寮請暫蹛，猶未有著落的所在。今論彼內中的淒慘是講袂盡。 又閣其餘的會友紲無機會通聚集禮拜；咱的禮拜堂有予政府的警察官借蹛月外日久，又閣予壯丁借蹛也是月外日。今到這時代誌有辦較清楚，阮...

[1916-2 台灣教會報 文類-散文 作者--/-]
捨生取義 [ Siá-seng Chhú-gī ]
捨身取義。 1916.2 no.371 pp.12 當陽長阪坡趙子龍救阿斗，彼時劉備佮曹操交戰，劉備划輸，伊的將佮家眷攏四散了了。伊有一个大將名叫趙子龍，佇百萬軍中欲揣in的主母佮小主人，逐到長阪坡的南爿，才看見夫人抱阿斗佇一个破牆仔下井欄頂咧坐，目屎四淋垂。子龍想去劉備獨獨一个囝nā-tiāⁿ，若無救伊就漢朝紲絕嗣，就趕緊請糜夫人上馬，通相佮逃命。夫人講，我死是無要緊，總是in老爸只有一个囝nā-tiāⁿ，專專倚靠將軍保護伊，毋通因為我來連累你。講了就將阿斗縛蹛身軀--裡phoe性命拍出萬重圍，將阿斗來還劉備。後來佇西蜀接位做皇帝。這實在是專靠子龍的勇猛。 咱讀一款的故典，想起...

[1916-3 台灣教會報 文類-散文 作者--/-]
講究歷史 [ Káng-kiù Le̍k-sú ]
講究歷史 1916. 3，no. 372，pp. 1-2 看較濟學校的課程，就知in有致意咧教歷史。講究歷史的功效是真闊，毋但予人捌各國心適的代誌，閣通用古早的典故做咱現時的路用，檢采看in早時的錯，咱就知通警戒，抑是用in的好所行來感動咱予咱通去學。 今咱信者有教會的甚物歷史通講究？卻有。佇新約有使徒行傳就是主起頭設的教會的歷史。因為咱台灣的教會上早設的只有五十年，有的設猶未五年久，所以這本行傳著予咱會友佮當職的出力究勘。 主耶穌佮學生相離的時所對重的只有交代in一項：就是著去為著伊來做干證。所以in不時有傳耶穌的名佮伊的閣活。有時醫好病人，有時予人審問，不論甚物代誌in有咧呵咾...

[1916-3 台灣教會報 文類-散文 作者--/-]
歐洲戰事 [ Au-chiu Chiàn-sū ]
歐洲戰事。 1916.3，no. 372，pp.4 佇正月尾德國的飛船幾若才去到英國內地，抌200外粒的爆裂彈，紲拍死54人，著傷67个，較濟攏是查某人佮囡仔。猶原彼日飛船也到法國的京城，Pa-lí。In咧杯大概有1,4000尺懸，有抌爆裂彈，一粒差不多450斤重，也拍死成十人。 正月15號德國的海賊佇亞非利加西北爿掠著一隻英國商船，號做「Appam」紲駛到米國，原本的水手佮人客有300人佇咧，到美國干焦賰138个nā-tiāⁿ。德國海賊到美國就講，彼隻是德國的戰船就應該予美國關咧，到交戰煞就還in。倚佇彼搭德國船另外拍沉七隻商船。 佇2月2號倚英國的北海有英國討魚的火船看著德國的...

[1916-3 台灣教會報 文類-散文 作者--/-]
內地女學校 [ Lāi-toē Lú Ha̍k-hāu ]
內地女學校。 1916. 3，no. 372，pp. 5-6 內地的女學校有分做幾若款。 1. 頭一款是幼稚園。幼稚園就是予細漢囡仔讀，是對四歲起到夠額大漢通入小學校。佇幼稚園囡仔學吟詩，thit迌，手藝，彼號。有國家所設立-的500外間的幼稚園，亦有教會所設立的128間。佇這號的學堂查埔佮查某囡仔相佮讀。 論這款的學校捌有一个牧師娘寫講真濟毋信道理的人予in的囡仔來幼稚園學；後來遐的爸母較無怨恨基督教，較甘願來拜堂聽道理。按呢通知亦是利益in的序大人。 2. 第二款。較懸的學校就是小學校。佇彼款查埔佮查某猶原相佮讀。予囡仔去幼稚園讀，是出在人，若是小學校毋是按呢；攏總的囡仔...

[1916-4 台灣教會報 文類-散文 作者-柯維思/Koa Î-su]
天然瓦斯 [ Thian-jiân oá-su ]
天然瓦斯。 1916. 4，no. 373，pp. 6 新曆正月27日佇台北廳芝蘭一堡溪州底庄665番地離三角埔拜堂里外路，楊厝倩人開天井。開到28丈外有拄著石iân，所以鐵枝有khong-khong吼的聲；以後閣開，鐵枝予瓦斯歕上空中，聽見講鐵枝lak落來有拍曲。彼个氣歕出的力嶄然大，hū-hū吼，予彼所在的人驚到欲死，所以緊用土來坉，總是無夠額的力通予伊密密，因為附近的所在猶原咧出瓦斯的氣，是因為彼所在是沙地的緣故。 彼霎厝邊所有的gâu人出所有的gâu話就講；講是鑿著龍穴；有的講是鑿著龍目。離彼空約有丈五遠有一个舊鼓井，內面亦紲有出煙。In就講是舊井的神受氣，所以緊緊備辦牲禮金紙佇...

[1916-4 台灣教會報 文類-散文 作者-陳清義/Tân Chheng-gī]
共進會 [ Kiōng-chìn-hoē ]
共進會。 1916. 4，no. 373，pp. 5 台灣對屬日本帝國的版圖以來，有二二年久，猶未捌有這擺大鬧熱，予全台佮對岸佮內地的人來看。這幫總督府有擬定設台灣勸業共進會佇台北城內。有分做兩?會場。第一个會場就是新總督府的衙門，這間厝有五層懸，正面的塔有180尺懸，算是真大間。第二个會場就是佇苗圃的內面，現時咧備辦起濟濟款的厝，佮生理店。開會的日就是4月10日起。到時的確會真鬧熱，就是對有台灣以來，所未捌有的。聽見講有50萬人會來看。有這款的好機會未免得予咱的心大意愛報揚主的道理，予遮的人聽見。今北部的中會已經有議決著設佈道場佇共進會第二會場的正面。現時所在已經定著，厝亦貿人咧起，向望...

[1916-4 台灣教會報 文類-傳記 作者-葉金木/Ia̍p Kim-bo̍k]
葉俊ê小傳 [ Ia̍p tsùn ê Sió-toān ]
葉俊ê小傳1916.04 373卷 p.6葉俊出世tī主後1867年，tī細漢ê時父母sàn-hiong人，有讀淡薄漢學nā-tiāⁿ，就hō͘人chhiàⁿ做辛勞。伊ê第四兄代先得著道理，伊就盡力阻擋，總是無久伊ê第四兄有去淡水入神學校，後來in 老母有破病去淡水chhoē醫生，葉俊就去照顧，對án-ni就得著道理。對十六歲起，就去跟隨麗牧師，十七歲年尾就入神學，二十一歲就出來水轉腳做傳道，hit時伊有盡力鼓舞教會合鼓舞起新拜堂，對án-ni教會就漸漸興起。對帝國領台ê時，伊有備辦搬去淡水拜堂，後來有beh kā 伊轉任，因為有幾nā項ê阻擋，就辭職歇工，猶原koh tiàm 水轉腳做生理合...

[1916-4 台灣教會報 文類-散文 作者--/-]
棄邪歸道 [ Khì-siâ Kui-tō ]
棄邪歸道。 1916. 4，no. 373，pp. 7 佇枋橋有一个聽道者舊年3月來聽道理，聽5月日久就會曉祈禱，祈禱的話贏過眾會友。伊是卜卦看命的先生。今實在反悔。舊曆正月初3日有提龜卦佮籤筒，籤仔來送我。我講，「甚物人叫你提來？」伊講無人叫伊，是伊家己提來。伊有講對這霎了後攏毋閣創這款的邪。我講，「今你無頭路欲怎樣？」伊講伊的頭路欲予上帝推排。現在無頭路不止艱苦。南湖的教會呂興良先生聽見伊的款，心不止受感激；伊有每月欲幫贊伊一箍銀，幫贊伊到有頭路。反悔的人是四五十歲的人，伊的名是詹Sióng-kî。現時不止熱心四界咧講道理予人聽。請看報的兄弟替伊祈禱。閣若有人欲倩伊，才寫批來枋橋。這个...

[1916-4 台灣教會報 文類-散文 作者--/-]
交戰的消息 [ Kau-chiàn ê Siau-sit ]
交戰的消息。 1916. 4，no. 373，pp. 7 現時土耳其國已經召50歲內的人來當兵。原本是干焦到39歲為止。俄羅咧拍in有直直贏，土耳其兵大倒退。佇土耳其京城，君士但丁，食物真貴，親像糖一磅 ( =台灣12兩)的價是倚兩箍半，咖啡一磅是Y3.00，一lok火漆是角二，雞卵一粒8 chiam；臭油佮牛肉無通買。 德國也大欠食物，致到百姓佇濟濟所在咧反叛。紲嫌官府講，阮丈夫今死啦，阮無通食。In那久那明知實在予政府大連累。 德國有對一个小國，葡萄牙宣戰。電報講，德國的戰船遐爾久攏走去覕佇in的港內，今有備辦較大的銃，也咧欲出來佮英國戰船交戰。 英國宰相發表遐的英國非戰鬥員受害...

[1916-4 台灣教會報 文類-散文 作者-巴克禮/Pa-khek-lé]
新約頭序 [ Sin-iok Thâu-su ]
新約頭序。 (巴克禮記)。 1916. 4，no. 373，pp. 8-9 四十外年前有將新約翻譯白話字。彼霎到今有賣幾若千本，予真濟人讀，來得著大利益；是因為逐人通家己講究上帝的聖冊。 二三十年以來有偌濟人咧拍算前所翻譯的著閣再斟酌，予伊較準，通拄拄照本文的意思。因為本所翻譯的卻是聖經大概的意思攏齊佇咧：總是彼本的白話，以及彼擺所用來解說的漢文，無通予讀的人常常知著冊的人的意思到準準。 所以近來有請四个先生對希利尼的本文重再翻譯，閣有將新翻譯的漢文六七本來相參看。到翻譯了，就分予幾若位的先生參校；才閣再斟酌巡一兩遍。頭到尾用工兩年較加。今發行做教會的路用。 紲排列幾若項佇...

[1916-4 台灣教會報 文類-散文 作者--/-]
冊房的告白 [ Chheh-pâng ê Kò-pe̍h ]
冊房的告白。 1916. 4，no. 373，pp. 12 今有閣辦養心神詩，白話字細本-的，2000本來；若有人愛，著寄批來冊房買。總是這陣有人欠冊房的數；請恁若有欠5箍以上的數著代先寄銀來還，阮才欲將新的詩冊寄去予恁。因為阮也有欠廈門的冊房三四百箍，無錢通予伊，實在真毋好。設使列位若將所欠的寄來予阮，卻有夠額通還in。另外也有欠上海的聖冊會，合額著緊緊寄去予in。這毋是勸人著好心來題，不過是勸人著盡本份來還債。 閣一項。有兩款的報，就是商務局所出的東方雜誌，佮進步雜誌，出報的人有通知阮講欲買攏著前金。總是欲予阮逐擺替恁寄，實在真費氣；請恁欲買的人本身設法，對郵便寄銀去買。其餘的報...