[1915-9 台灣教會報 文類-散文 作者--/-]
澎湖的消息 [ Phêⁿ-ô͘ ê Siau-sit ]
澎湖的消息。 (李福慶記)。 1915.9，no.366，pp.9 佇7月19號，愚人去Peh-tàu傳道理。近日佇花宅hiuⁿ有加添一戶6人來信主，經過5禮拜久，對信了後就將偶像一概掃除去，真通感謝上帝。二五號佇Peh-tàu禮拜無偌濟人，是因為濟濟人過去台灣。 二十六號坐帆船去東結，佇遐有一個兄弟名林宗，舊年愛請我去傳道理；若是到水灣船隻不便。這pang到位真歡喜，親像雲跋落月，以禮相待。伊信主的原因是前年chhoā伊的叔去新樓醫目睭，紲得著道理，轉來就執守道理，就苦勸家內著拜上帝，除偶像，十三人代先有聽伊苦勸，就將佛除去，用十條誡召teh；若是湊tú崁伊的叔目睭疼講...

[1915-9 台灣教會報 文類-散文 作者--/-]
後山的消息 [ āu-soaⁿ ê Siau-sit ]
後山的消息。 1915.9，no.366，pp.9-10 現時傳道師張有明，為著身體較lám才停工，徙去佇後山的石牌。Chím-má接著伊的批講：- 阮四初一對埔里社起身，有去真濟所在行遊幾若月日，到八月初五日到石牌。阮停工的時去四界行遊，iáu-kú得著真大好機會，通報揚主的名；較小庄社有四五十人，七八十人，百外人；若是較大庄社，有一兩百，兩百外人teh聽。有時日時講，有時暝時講；有時做兩位講，就是cha-po͘人另外cha-po͘人講予in聽，婦人人另外講予婦人人聽。看in不止致意teh聽，亦講遮毋捌人來講予阮聽，就請阮著踮in遐較久，講予in聽，現時報揚主的道理是真好機會。 佇這...

[1915-9 台灣教會報 文類-散文 作者--/-]
安樂家 [ An-lo̍k-ke ]
安樂家。 1915.9，no.366，pp.12 幾十年前在英國有人著一本冊名安樂家，所記載就是一个囡仔名Lī-sū-tē 的來歷。 雖然這本屬佇小說的冊，iáu-kú毋是kan-ta趣味好聽，所論的真正通利益眾人，予in較知明救人贖罪的道理。 頂年有翻譯白話字，頭pang出--ê攏賣了；taⁿ有閣印一遍，比頂pang較大本，也較大字。 每本的價錢角半。...

[1915-10 台灣教會報 文類-散文 作者--/-]
法蘭西 [ Hoat-lân-se ]
法蘭西。 1915.10，no.367，pp.3 法蘭西(就是法國) in 的祖對別位來蹛佇法國大概佇主前五六百年。彼時猶未有開化，百姓種作較少，攏是拍獵較濟。 主前一百年羅馬國有拍贏法國。對彼霎起百姓就漸漸得著開化。羅馬國有佇逐所在創大路，開學堂，設判斷的官來照公義辦百姓相告的事，閣有用濟濟的方法來予百姓會進步。對彼霎法國的百姓就ná開化，政治ná堅固。 法國人得著道理是佇主後較無一百年。彼霎有做生理人佮宣教師來傳道理設教佇幾若个海口大城。起頭予羅馬的官大窘逐，毋kú信徒猶原ná傳。後來到主後300外年羅馬有奉基督教做國家的宗教。對彼霎就無閣再親像按呢的窘逐。 第十六世紀改...

[1915-11 台灣教會報 文類-散文 作者--/-]
福氣 [ Hok-khì ]
福氣 (何希仁記)。 (接10月2面)。 1915.11，no.368，pp.3-4 又閣有人teh講，「有金銀著有福氣。」設使有風聲離遮無偌遠有金礦，遐去掘就有金通取，拍算人真大陣走到phín-phóng哮欲去掘。這是為著人錯誤想，若會得著金銀就毋免煩惱到一世人。袂曉想第一煩惱就是好額人。好額人煩惱家內不和，囝不孝，生理失敗，粟落價，家己破病攏袂醫得，又閣定定煩惱伊的錢無夠額，親像心不足。雖然極好額，嘛是時常煩惱無錢。已經趁一千，欲鬥一萬。親像按呢不知足到一世人。愈好額的人愈著無，愈向望趁閣較濟。家己的錢也是oh得the̍h，因為伊毋甘開，毋甘用，親像銀櫃內面囤到滿，嘛是oh得開。 ...

[1915-11 台灣教會報 文類-散文 作者--/-]
青盲人的信 [ Chhiⁿ-mî-lâng ê Sìn ]
青盲人的信。 1915.11，no.368，pp。5-6 較早有一個十八歲的印度ta-po͘囡仔，伊的頭路是teh共人揪風扇，予厝內的人較秋凊。論到伊的面是無好看，niau-niau亦青盲，因為出珠才按呢。對細漢青盲就攏毋知日的光啥物款，袂看半項物，連家內的人生做怎樣也毋知。一日有一個姑娘佮這个青盲囡仔講話，紲問伊，「你捌耶穌無？」伊應，「佇我的家內捌聽見講起耶穌的名，總是我無啥物明白耶穌的代誌，請你講較濟予我聽。」姑娘就講予伊聽。青盲--的聽見救主的代誌，滿心歡喜到袂顧得，隨時接納伊做伊的救主。伊常常得著姑娘的教示，ná久ná捌聖經內的來歷，路尾就愛欲領洗禮，紲愛號做大衛。逐日伊去姑娘的...

[1915-11 台灣教會報 文類-散文 作者--/-]
無神主義的誤謬 [ Bô Sîn Chú-gī ê Gō͘-biū ]
無神主義的誤謬。 1915.11，no.368，pp.6-7 咱人踮佇這世間佮世間的動物相佮徛起，總是佮動物有大各樣，就是造物的主有賜咱人一點的靈魂。所以人是ku佇動物的頂面，來做動物的首領，才講，「人為萬物之靈」。按呢通知真信上帝創造咱人，比動物較顯出比動物較有智識，才無見笑做人的資格。 可惜現今佇世間有彼款毋知有神，毋信有神，亦毋愛研究神的事；用無神做主義，實在真誤謬。這款的人m̄-nā是無學問的人nā-tiāⁿ，就學問博學的人亦有這款的。德國有一個進化論的學者，伊的名是Haeckel，伊著進化論的冊，到路尾kú是講無神。現今佇台灣有少年難得著新的教育，濟濟無愛信有神。 Taⁿ...

[1915-11 台灣教會報 文類-散文 作者--/-]
假好迷惑信者 [ Ké-hó Bê-he̍k Sìn-chiá ]
假好迷惑信者。 1915.11，no.368，pp.7 近來守拜六做禮拜日的人有閣再來台灣賣月報攪擾咱的教會。In 的月報是號做「時調月報」。論這个月報卻有幾若項好的道理佇teh，毋kú共伊閣詳細看就知所要緊是愛迷惑教會。照in講，咱守禮拜日是毋著，著趁猶太人的舊款，來守拜六。論這个代誌這陣毋免議論。已經有人議論明白，來應佇彼本「安息日論」。大概來講，咱毋是猶太教，咱是基督教，將主閣活的日來做禮拜日，毋免佮猶太人守拜六。 這个守拜六的教派有真少人。或是佇美國，加拿大抑是歐羅巴洲，屬這个教派無偌濟个。閣in罕得去招呼猶未信道理的人，攏是愛引誘別的教派的人來趁in 的道理。Taⁿ請列位兄弟姊...

[1915-11 台灣教會報 文類-散文 作者--/-]
祝五十年的禧年 [ Chiok Gō͘-cha̍p-nî ê Hi-liân ]
祝五十年的禧年。 1915.11，no.368，pp.11-12 台南長老教會設立到taⁿ五十年，這pang欲祝賀禧年的時，愛我代表日本基督教會講淡薄祝辭，是予我得著大榮光。 耶穌講天國親像芥菜子，人the̍h去掖佇園裡。這是百項種子的極細--ê，到大叢，儼然成樹，飛鳥到，歇佇伊的枝。這是主佇一千到百外年前講起基督教會生長，發達的順序，以及教會的勢力，微妙的譬喻。 台南長老教會五十禧年，kiám毋是顯明本島的基督教對世世的芥菜子，taⁿ成做會堪得予鳥歇的大樹mah？對馬醫生度過灌沃教會內外的做工--ê，穩當ta̍uh-ta̍uh拄著世間的風湧，試著酸辣的苦情，有時也敢捌拄著生育的危險。...

[1915-12 台灣教會報 文類-散文 作者--/-]
細囝過往 [ Sè-kiáⁿ Koè-óng ]
細囝過往。 (洪金江記)。 1915.12，no.369，pp.10 南投廳頂蓋仔庄詹Iam 的查某囝Gio̍k-choáⁿ 4歲，佇舊年新曆10月24日，拄拄拜六早起佮伊的阿兄金泉去菜園挽菜，忽然間Gio̍k-choáⁿ就跋倒，就家己peh起來。連鞭共伊的阿兄講，「阿兄ah！上帝欲叫我去。」伊的阿兄就講，「無影。」Gio̍k-choáⁿ就連鞭閣講，「有影。」按呢菜挽了就閣倒來厝裡，囡仔也無啥物代誌。天光拄拄禮拜，伊的阿兄就閣問講，「Gio̍k-choáⁿ，你欲去禮拜無？」伊就講，「欲，我欲去佮上帝講話。」到禮拜暝囡仔就起熱，就是腦膜炎。伊的老母就問伊，講，「Gio̍k-choáⁿ，...

[1916-1 台灣教會報 文類-散文 作者--/-]
謹賀新年 [ Kín-hō Sin-nî ]
謹賀新年 1916.1 no.370 pp.1-2 Taⁿ閣到新年，愛共恁大家恭喜：願恁佇今年的中間大家得著平安福氣。 到過年的時陣人永咧想兩項，一項是舊年所經過的事，一項是看今年通比舊年較好款。咱想教會的事也通按呢。 舊年的中間咱的教會有得著平安，無甚物事；也有略略仔進步。年頭守晚餐的人有4169个，年尾有4302个，實在加添有133个。新接納的卻有248个，毋過有的死，有的受禁，致到實在加添只有133个；就是四千外人有加添百外的，照算每百个加添3个nā-tiāⁿ。這算較小可；做生理人一百箍的本錢一年久趁3箍nā-tiāⁿ，伊無甚物歡喜。Taⁿ今年的中間通向望得著較濟仔毋通？...

[1916-1 台灣教會報 文類-散文 作者--/-]
台南福音書院 [ Tâi-lâm Hok-im Chu-īⁿ ]
台南福音書院。 1916.1 no.370 pp.4 本校原本因為欲開闊基督教來設立--的。 對設到taⁿ已經經過三十外年。現時本島歸帝國管轄；各社會大細的學校平平有制服，制帽，記章，做憑據。敝校也得著排列佇學校的位；應該著學逐間學校的制度才合宜。 Taⁿ擬定制帽，帽頂蜷一逝的紅痕，帽邊蜷三逝白巡；額頂的記章用本圖做為記。 制服，鈕仔佮手ńg扣的鈕是用本圖做號。予列位諸君看見就知是福音書院的學生。...

[1916-1 台灣教會報 文類-散文 作者--/-]
北部事務：論義大利 [ Pak-pō͘ sū-bū：Lūn Í-tāi-lī ]
論義大利1916.01 370 卷 p.5-6義大利國較早是號做羅馬。主耶穌出世ê時羅馬國算是天腳下第一大第一強ê國。Hit-tia̍p羅馬國所管ê地真闊，tuì西爿ê西班牙到東爿ê波斯國。地中海海岸ê地，或是東西南北，hit-tia̍p攏屬羅馬國管。án-ni thang 知羅馬國ê力hit-tia̍p真大。 照羅馬ê歷史家有記設羅馬國是tuì真早。主前6、700年已經有設國。起頭是君主國，後--來tī 主前500外年有革命變換來設民主國。án-ni thang知tuì真早羅馬國有民權ê政治。 照使徒行傳所記，保羅有傳教tī 羅馬ê京城。幾若百年ê久教會常常hō͘羅馬ê官窘逐。照in講，基督...

[1916-1 台灣教會報 文類-散文 作者--/-]
內地狀況 [ Loē-tē Chōng-hóng ]
內地狀況 (黃仁榮記--的。) 1916.1 no.370 pp.11-12 我佇舊年九月間，佮台中盧An-kun做伙去內地，有經過濟濟出名的所在，其中目睭所有看見，心內袂免得有感動。所以寫幾字來印上報。向望看了通做參考的路用，也予列位淡薄知彼爿的狀況。 內地近來的進步，算是真發達；比並支那是天差佇淵。因為十年前我有去中國，到前--年閣去，看逐所在攏差不多，甚至有埠頭反轉變那衰微。論到內地卻毋是按呢，逐項加真興旺。我十二年前去，到這幫攏袂認得，因為市區改正，大厝懸樓，加起真濟，生理也加真鬧熱，是對交通的利便。火車，電車，自動車，攏加真濟，電報，電話滿四界都有，小可的埠頭，也變真鬧熱。教...

[1916-2 台灣教會報 文類-散文 作者--/-]
羅馬8章14節 [ Lô-má 8 chiuⁿ 14 chat ]
羅馬8章14節 1916.2 no.371 pp.1-2 「凡若予上帝的神chhoā--的是做上帝的囝。」(羅. 8：14)。 「做上帝的囝」這句甚物意思？俗語講，天生地養。上帝創造天，地，海，萬項物；也創造人。伊也庇佑萬項的活物，予in食夠額。「你展開你的手，見有活的物你予in食到飽。」「天爸用日照好佮毋好的人，用雨沃義佮不義的人的田園。」按呢知上帝創造萬人，也有看顧in，通講上帝是眾人的爸，也眾人是上帝的囝兒。這算是較闊的意思。 毋過人佮上帝嶄然有較親密的干涉。人有一條袂死的靈魂，身軀雖然死，靈魂佇咧。因為按呢人佮其餘的活物真正有大各樣。譬論豬，狗，貓死就煞：人死就猶佇...

[1916-2 台灣教會報 文類-散文 作者--/-]
馬醫生的批 [ Má I-seng ê phoe ]
馬醫生的批。 1916.2 no.371 pp.4 阮接著老馬醫生的批，有翻譯紲印佇下底：- 屬台南教會的好朋友啊！ 佇11月21號算是台南教會歷史中有名聲的日。馬醫生娘佮我本身也大記念彼日。列位佇台灣有好機會通數念上帝50年久所賞賜的憐憫仁愛，也遮的無才調的差用佇英國猶原咧感謝上主佇遮濟年的中間有大施恩予阮。阮知恁有替阮祈禱，也阮真歡喜求上帝將這个禧年做台灣閣較大福氣的源頭，就是向望毋免偌久懸山的生番會得著福音。 上帝召我來傳福音佇這个媠的海島，這是做我第一大的榮光。起頭設教彼霎卻有拄著真濟苦難，總是主贊我醫好濟濟病人，對按呢伊有開大的門路，予福音通入人的心，代先傳道理佇打狗，...

[1916-2 台灣教會報 文類-散文 作者--/-]
論德國 [ Lūn Tek-kok ]
論德國1916.02 371卷 p.6-7德國人 ê 祖tuì 真早有toà tī 歐羅巴洲ê 北爿。2 千外年前，in iáu-bē有得著開化，常常kap羅馬國相thâi。後--來有宣教師去播揚道理 tī in 中間，in 就漸漸那信，到後--來較濟有奉基督教做 in ê 宗教。得著道理了後 in 就漸漸那開化。Tī 德國耶穌教 （Protestants），比羅馬教ê 人有較濟。路德馬丁（Martin Luther）改正宗教是 tī 德國，所以 tuì hit-tia̍p 落--來，德國 ê 教會較無降服tī 羅馬 ê 教王。 德國合做1國是無偌久，幾若10年前 nā-tiāⁿ。較早有分做幾...

[1916-2 台灣教會報 文類-散文 作者--/-]
焦吧年ê消息 [ Ta-pa-nî ê Siau-sit ]
焦吧哖的消息。 1916.02，no. 371，pp.10-11 佇9月的報有講焦吧哖的消息；彼時會友攏平安，是干焦厝宅貨物受火燒nā-tiāⁿ。無拍算教會報出了的時，才拄著連累的罪。會友受掠總共22人，有3个豁免，7个死刑，12个無期徒。無期徒中間有一个執事，姓潘名丁旺；是熱心佇教會。有2个入教者，其餘--的是信道者。今焦吧哖的教會大半失落氣力。現時遐的避難會友的家，佇這近日政府有准in轉去隨人的所在，搭草寮請暫蹛，猶未有著落的所在。今論彼內中的淒慘是講袂盡。 又閣其餘的會友紲無機會通聚集禮拜；咱的禮拜堂有予政府的警察官借蹛月外日久，又閣予壯丁借蹛也是月外日。今到這時代誌有辦較清楚，阮...

[1916-2 台灣教會報 文類-散文 作者--/-]
捨生取義 [ Siá-seng Chhú-gī ]
捨身取義。 1916.2 no.371 pp.12 當陽長阪坡趙子龍救阿斗，彼時劉備佮曹操交戰，劉備划輸，伊的將佮家眷攏四散了了。伊有一个大將名叫趙子龍，佇百萬軍中欲揣in的主母佮小主人，逐到長阪坡的南爿，才看見夫人抱阿斗佇一个破牆仔下井欄頂咧坐，目屎四淋垂。子龍想去劉備獨獨一个囝nā-tiāⁿ，若無救伊就漢朝紲絕嗣，就趕緊請糜夫人上馬，通相佮逃命。夫人講，我死是無要緊，總是in老爸只有一个囝nā-tiāⁿ，專專倚靠將軍保護伊，毋通因為我來連累你。講了就將阿斗縛蹛身軀--裡phoe性命拍出萬重圍，將阿斗來還劉備。後來佇西蜀接位做皇帝。這實在是專靠子龍的勇猛。 咱讀一款的故典，想起...

[1916-3 台灣教會報 文類-散文 作者--/-]
講究歷史 [ Káng-kiù Le̍k-sú ]
講究歷史 1916. 3，no. 372，pp. 1-2 看較濟學校的課程，就知in有致意咧教歷史。講究歷史的功效是真闊，毋但予人捌各國心適的代誌，閣通用古早的典故做咱現時的路用，檢采看in早時的錯，咱就知通警戒，抑是用in的好所行來感動咱予咱通去學。 今咱信者有教會的甚物歷史通講究？卻有。佇新約有使徒行傳就是主起頭設的教會的歷史。因為咱台灣的教會上早設的只有五十年，有的設猶未五年久，所以這本行傳著予咱會友佮當職的出力究勘。 主耶穌佮學生相離的時所對重的只有交代in一項：就是著去為著伊來做干證。所以in不時有傳耶穌的名佮伊的閣活。有時醫好病人，有時予人審問，不論甚物代誌in有咧呵咾...