[1915-11 台灣教會報 文類-散文 作者--/-]
祝五十年的禧年 [ Chiok Gō͘-cha̍p-nî ê Hi-liân ]
祝五十年的禧年。 1915.11，no.368，pp.11-12 台南長老教會設立到taⁿ五十年，這pang欲祝賀禧年的時，愛我代表日本基督教會講淡薄祝辭，是予我得著大榮光。 耶穌講天國親像芥菜子，人the̍h去掖佇園裡。這是百項種子的極細--ê，到大叢，儼然成樹，飛鳥到，歇佇伊的枝。這是主佇一千到百外年前講起基督教會生長，發達的順序，以及教會的勢力，微妙的譬喻。 台南長老教會五十禧年，kiám毋是顯明本島的基督教對世世的芥菜子，taⁿ成做會堪得予鳥歇的大樹mah？對馬醫生度過灌沃教會內外的做工--ê，穩當ta̍uh-ta̍uh拄著世間的風湧，試著酸辣的苦情，有時也敢捌拄著生育的危險。...

[1915-12 台灣教會報 文類-散文 作者-陳清義/Tân Chheng-gī]
大典紀念的博覽會 [ Tāi-tián Kì-liām ê Phok-lám-hoē ]
大典紀念的博覽會。 (陳清義。) 1915.12，no.369，pp.5-6 這pang為著大典佇京都，京都府有設一个博覽會做紀念，所以號名做大典紀念的博覽會。這个博覽會有分做3場，所在無相同。第一佮第二的會堂佇動物園佮大極殿的身邊，第三會場佇帝國博物館的內面。阮有攏去看。Taⁿ欲將所看見的狀況大略來寫佇下底：- 第一會場。 佇這个會場內，有份做幾若館。 1.工業館。內面有排絲，綢，布，所織的類。閣有種種的磁器，漆器，藝的雕刻物，以及雜物等等。 2.器械館。內面有排織布，舂米，做分支的器具，亦紲用電氣予伊振動，佇遐現實驗。閣有醫學的器械佮電氣的器具真濟。 3.食料館...

[1915-12 台灣教會報 文類-散文 作者-巴克禮/Pa-khek-lé]
戰爭的器械 [ Chiàn-cheng ê Khì-hâi ]
戰爭的器械。 (偕叡廉記)。 1915.12，no.369，pp.6-7 現今歐洲戰爭的器械真大厲害。有一款的大砲，伊的槍子一粒1800斤。不論啥物予伊拍著就變做碎碎。設使鐵壁四尺厚拍著也透過，石壁兩丈厚也連鞭邊損害。拍得七舖路的遠，現今猶未有砲台夠額堅固通擋伊的雄力。 開花砲。這款的銃較細門，砲子只有幾斤重。總是每粒砲只有包200外細粒會彈到一四界，親像天落雨，來傷對敵的兵丁。 又閣有機關砲，一分久會放600粒的槍子。這款的小銃輕輕；一个人giâ有法得。設使有五，六門這號的銃隱密佇土溝內，對敵幾若chheng欲進也真大兩難。有一擺一个英國兵將這款的器械拍退幾若百的德國王的輕兵。...

[1915-12 台灣教會報 文類-散文 作者--/-]
細囝過往 [ Sè-kiáⁿ Koè-óng ]
細囝過往。 (洪金江記)。 1915.12，no.369，pp.10 南投廳頂蓋仔庄詹Iam 的查某囝Gio̍k-choáⁿ 4歲，佇舊年新曆10月24日，拄拄拜六早起佮伊的阿兄金泉去菜園挽菜，忽然間Gio̍k-choáⁿ就跋倒，就家己peh起來。連鞭共伊的阿兄講，「阿兄ah！上帝欲叫我去。」伊的阿兄就講，「無影。」Gio̍k-choáⁿ就連鞭閣講，「有影。」按呢菜挽了就閣倒來厝裡，囡仔也無啥物代誌。天光拄拄禮拜，伊的阿兄就閣問講，「Gio̍k-choáⁿ，你欲去禮拜無？」伊就講，「欲，我欲去佮上帝講話。」到禮拜暝囡仔就起熱，就是腦膜炎。伊的老母就問伊，講，「Gio̍k-choáⁿ，...

[1916-1 台灣教會報 文類-散文 作者--/-]
謹賀新年 [ Kín-hō Sin-nî ]
謹賀新年 1916.1 no.370 pp.1-2 Taⁿ閣到新年，愛共恁大家恭喜：願恁佇今年的中間大家得著平安福氣。 到過年的時陣人永咧想兩項，一項是舊年所經過的事，一項是看今年通比舊年較好款。咱想教會的事也通按呢。 舊年的中間咱的教會有得著平安，無甚物事；也有略略仔進步。年頭守晚餐的人有4169个，年尾有4302个，實在加添有133个。新接納的卻有248个，毋過有的死，有的受禁，致到實在加添只有133个；就是四千外人有加添百外的，照算每百个加添3个nā-tiāⁿ。這算較小可；做生理人一百箍的本錢一年久趁3箍nā-tiāⁿ，伊無甚物歡喜。Taⁿ今年的中間通向望得著較濟仔毋通？...

[1916-1 台灣教會報 文類-散文 作者--/-]
台南福音書院 [ Tâi-lâm Hok-im Chu-īⁿ ]
台南福音書院。 1916.1 no.370 pp.4 本校原本因為欲開闊基督教來設立--的。 對設到taⁿ已經經過三十外年。現時本島歸帝國管轄；各社會大細的學校平平有制服，制帽，記章，做憑據。敝校也得著排列佇學校的位；應該著學逐間學校的制度才合宜。 Taⁿ擬定制帽，帽頂蜷一逝的紅痕，帽邊蜷三逝白巡；額頂的記章用本圖做為記。 制服，鈕仔佮手ńg扣的鈕是用本圖做號。予列位諸君看見就知是福音書院的學生。...

[1916-1 台灣教會報 文類-散文 作者--/-]
北部事務：論義大利 [ Pak-pō͘ sū-bū：Lūn Í-tāi-lī ]
論義大利1916.01 370 卷 p.5-6義大利國較早是號做羅馬。主耶穌出世ê時羅馬國算是天腳下第一大第一強ê國。Hit-tia̍p羅馬國所管ê地真闊，tuì西爿ê西班牙到東爿ê波斯國。地中海海岸ê地，或是東西南北，hit-tia̍p攏屬羅馬國管。án-ni thang 知羅馬國ê力hit-tia̍p真大。 照羅馬ê歷史家有記設羅馬國是tuì真早。主前6、700年已經有設國。起頭是君主國，後--來tī 主前500外年有革命變換來設民主國。án-ni thang知tuì真早羅馬國有民權ê政治。 照使徒行傳所記，保羅有傳教tī 羅馬ê京城。幾若百年ê久教會常常hō͘羅馬ê官窘逐。照in講，基督...

[1916-2 台灣教會報 文類-散文 作者-陳添旺/Tân Thiam-ōng]
假的先生 [ Ké ê Sian-siⁿ ]
假的先生。 1916.2 no.371 pp.5-6 舊年8月有2人來附近做醫生。一人講是蘭醫生的學生，一人講是蘭醫生的學生，一人講是馬偕醫院的先生，歇熱出來賣藥施濟佈道，實在騙人錢真濟。後來有警官去調查就去別位。到12月就去近大甲水尾莊賣藥，就換款；一个講是蘭醫生的學生，一个講是墎仔跤的傳道做紹介人。按呢實在有損害的所在。近來這款藉名的人真濟，所以愛寫幾字上報，予大家知通張持，毋通予人騙去，也免奇怪醫生傳道咧騙人。若有世俗嫌，就通共in說明，這是真要緊。 (陳添旺記)。...

[1916-1 台灣教會報 文類-散文 作者-陳清義/Tân Chheng-gī]
京都大典ê狀況 [ Kiaⁿ-to͘ Tāi-tián ê Chōng-hóng ]
京都大典ê狀況1916.01 370卷 p.7(陳清義)這pang我有kap我ê 婦人人去京都，tī hia月外日久，順機會有看大典ê鬧熱。Tī 11月7號天皇陛下有到京都。京都市有準備真濟來歡迎。有創大歡迎門tī 停車場。街路ê雙爿有結花環，萬歲旗kap電燈，也拚掃真清氣。Tuì停車場去到皇宮，hit條街路雙爿有坐25, 0000人，亦有創位所tī 店內hō͘ 人坐teh賣--人，一位2箍， 亦有一箍半。Hit日真正是鬧熱。有ê tuì真遠來。京都府有出命令講：「天皇陛下iáu-bē到位ê以前6點鐘久，街路ê通行beh禁止。Tuì án-ni天未光就去街路邊坐。天皇陛下2點到停車場，hit-...

[1916-1 台灣教會報 文類-散文 作者--/-]
內地狀況 [ Loē-tē Chōng-hóng ]
內地狀況 (黃仁榮記--的。) 1916.1 no.370 pp.11-12 我佇舊年九月間，佮台中盧An-kun做伙去內地，有經過濟濟出名的所在，其中目睭所有看見，心內袂免得有感動。所以寫幾字來印上報。向望看了通做參考的路用，也予列位淡薄知彼爿的狀況。 內地近來的進步，算是真發達；比並支那是天差佇淵。因為十年前我有去中國，到前--年閣去，看逐所在攏差不多，甚至有埠頭反轉變那衰微。論到內地卻毋是按呢，逐項加真興旺。我十二年前去，到這幫攏袂認得，因為市區改正，大厝懸樓，加起真濟，生理也加真鬧熱，是對交通的利便。火車，電車，自動車，攏加真濟，電報，電話滿四界都有，小可的埠頭，也變真鬧熱。教...

[1916-2 台灣教會報 文類-散文 作者--/-]
羅馬8章14節 [ Lô-má 8 chiuⁿ 14 chat ]
羅馬8章14節 1916.2 no.371 pp.1-2 「凡若予上帝的神chhoā--的是做上帝的囝。」(羅. 8：14)。 「做上帝的囝」這句甚物意思？俗語講，天生地養。上帝創造天，地，海，萬項物；也創造人。伊也庇佑萬項的活物，予in食夠額。「你展開你的手，見有活的物你予in食到飽。」「天爸用日照好佮毋好的人，用雨沃義佮不義的人的田園。」按呢知上帝創造萬人，也有看顧in，通講上帝是眾人的爸，也眾人是上帝的囝兒。這算是較闊的意思。 毋過人佮上帝嶄然有較親密的干涉。人有一條袂死的靈魂，身軀雖然死，靈魂佇咧。因為按呢人佮其餘的活物真正有大各樣。譬論豬，狗，貓死就煞：人死就猶佇...

[1916-2 台灣教會報 文類-散文 作者--/-]
馬醫生的批 [ Má I-seng ê phoe ]
馬醫生的批。 1916.2 no.371 pp.4 阮接著老馬醫生的批，有翻譯紲印佇下底：- 屬台南教會的好朋友啊！ 佇11月21號算是台南教會歷史中有名聲的日。馬醫生娘佮我本身也大記念彼日。列位佇台灣有好機會通數念上帝50年久所賞賜的憐憫仁愛，也遮的無才調的差用佇英國猶原咧感謝上主佇遮濟年的中間有大施恩予阮。阮知恁有替阮祈禱，也阮真歡喜求上帝將這个禧年做台灣閣較大福氣的源頭，就是向望毋免偌久懸山的生番會得著福音。 上帝召我來傳福音佇這个媠的海島，這是做我第一大的榮光。起頭設教彼霎卻有拄著真濟苦難，總是主贊我醫好濟濟病人，對按呢伊有開大的門路，予福音通入人的心，代先傳道理佇打狗，...

[1916-2 台灣教會報 文類-散文 作者--/-]
論德國 [ Lūn Tek-kok ]
論德國1916.02 371卷 p.6-7德國人 ê 祖tuì 真早有toà tī 歐羅巴洲ê 北爿。2 千外年前，in iáu-bē有得著開化，常常kap羅馬國相thâi。後--來有宣教師去播揚道理 tī in 中間，in 就漸漸那信，到後--來較濟有奉基督教做 in ê 宗教。得著道理了後 in 就漸漸那開化。Tī 德國耶穌教 （Protestants），比羅馬教ê 人有較濟。路德馬丁（Martin Luther）改正宗教是 tī 德國，所以 tuì hit-tia̍p 落--來，德國 ê 教會較無降服tī 羅馬 ê 教王。 德國合做1國是無偌久，幾若10年前 nā-tiāⁿ。較早有分做幾...

[1916-2 台灣教會報 文類-散文 作者--/-]
焦吧年ê消息 [ Ta-pa-nî ê Siau-sit ]
焦吧哖的消息。 1916.02，no. 371，pp.10-11 佇9月的報有講焦吧哖的消息；彼時會友攏平安，是干焦厝宅貨物受火燒nā-tiāⁿ。無拍算教會報出了的時，才拄著連累的罪。會友受掠總共22人，有3个豁免，7个死刑，12个無期徒。無期徒中間有一个執事，姓潘名丁旺；是熱心佇教會。有2个入教者，其餘--的是信道者。今焦吧哖的教會大半失落氣力。現時遐的避難會友的家，佇這近日政府有准in轉去隨人的所在，搭草寮請暫蹛，猶未有著落的所在。今論彼內中的淒慘是講袂盡。 又閣其餘的會友紲無機會通聚集禮拜；咱的禮拜堂有予政府的警察官借蹛月外日久，又閣予壯丁借蹛也是月外日。今到這時代誌有辦較清楚，阮...

[1916-2 台灣教會報 文類-散文 作者--/-]
捨生取義 [ Siá-seng Chhú-gī ]
捨身取義。 1916.2 no.371 pp.12 當陽長阪坡趙子龍救阿斗，彼時劉備佮曹操交戰，劉備划輸，伊的將佮家眷攏四散了了。伊有一个大將名叫趙子龍，佇百萬軍中欲揣in的主母佮小主人，逐到長阪坡的南爿，才看見夫人抱阿斗佇一个破牆仔下井欄頂咧坐，目屎四淋垂。子龍想去劉備獨獨一个囝nā-tiāⁿ，若無救伊就漢朝紲絕嗣，就趕緊請糜夫人上馬，通相佮逃命。夫人講，我死是無要緊，總是in老爸只有一个囝nā-tiāⁿ，專專倚靠將軍保護伊，毋通因為我來連累你。講了就將阿斗縛蹛身軀--裡phoe性命拍出萬重圍，將阿斗來還劉備。後來佇西蜀接位做皇帝。這實在是專靠子龍的勇猛。 咱讀一款的故典，想起...

[1916-3 台灣教會報 文類-散文 作者--/-]
講究歷史 [ Káng-kiù Le̍k-sú ]
講究歷史 1916. 3，no. 372，pp. 1-2 看較濟學校的課程，就知in有致意咧教歷史。講究歷史的功效是真闊，毋但予人捌各國心適的代誌，閣通用古早的典故做咱現時的路用，檢采看in早時的錯，咱就知通警戒，抑是用in的好所行來感動咱予咱通去學。 今咱信者有教會的甚物歷史通講究？卻有。佇新約有使徒行傳就是主起頭設的教會的歷史。因為咱台灣的教會上早設的只有五十年，有的設猶未五年久，所以這本行傳著予咱會友佮當職的出力究勘。 主耶穌佮學生相離的時所對重的只有交代in一項：就是著去為著伊來做干證。所以in不時有傳耶穌的名佮伊的閣活。有時醫好病人，有時予人審問，不論甚物代誌in有咧呵咾...

[1916-3 台灣教會報 文類-散文 作者--/-]
歐洲戰事 [ Au-chiu Chiàn-sū ]
歐洲戰事。 1916.3，no. 372，pp.4 佇正月尾德國的飛船幾若才去到英國內地，抌200外粒的爆裂彈，紲拍死54人，著傷67个，較濟攏是查某人佮囡仔。猶原彼日飛船也到法國的京城，Pa-lí。In咧杯大概有1,4000尺懸，有抌爆裂彈，一粒差不多450斤重，也拍死成十人。 正月15號德國的海賊佇亞非利加西北爿掠著一隻英國商船，號做「Appam」紲駛到米國，原本的水手佮人客有300人佇咧，到美國干焦賰138个nā-tiāⁿ。德國海賊到美國就講，彼隻是德國的戰船就應該予美國關咧，到交戰煞就還in。倚佇彼搭德國船另外拍沉七隻商船。 佇2月2號倚英國的北海有英國討魚的火船看著德國的...

[1916-3 台灣教會報 文類-散文 作者--/-]
內地女學校 [ Lāi-toē Lú Ha̍k-hāu ]
內地女學校。 1916. 3，no. 372，pp. 5-6 內地的女學校有分做幾若款。 1. 頭一款是幼稚園。幼稚園就是予細漢囡仔讀，是對四歲起到夠額大漢通入小學校。佇幼稚園囡仔學吟詩，thit迌，手藝，彼號。有國家所設立-的500外間的幼稚園，亦有教會所設立的128間。佇這號的學堂查埔佮查某囡仔相佮讀。 論這款的學校捌有一个牧師娘寫講真濟毋信道理的人予in的囡仔來幼稚園學；後來遐的爸母較無怨恨基督教，較甘願來拜堂聽道理。按呢通知亦是利益in的序大人。 2. 第二款。較懸的學校就是小學校。佇彼款查埔佮查某猶原相佮讀。予囡仔去幼稚園讀，是出在人，若是小學校毋是按呢；攏總的囡仔...

[1916-4 台灣教會報 文類-散文 作者-柯維思/Koa Î-su]
天然瓦斯 [ Thian-jiân oá-su ]
天然瓦斯。 1916. 4，no. 373，pp. 6 新曆正月27日佇台北廳芝蘭一堡溪州底庄665番地離三角埔拜堂里外路，楊厝倩人開天井。開到28丈外有拄著石iân，所以鐵枝有khong-khong吼的聲；以後閣開，鐵枝予瓦斯歕上空中，聽見講鐵枝lak落來有拍曲。彼个氣歕出的力嶄然大，hū-hū吼，予彼所在的人驚到欲死，所以緊用土來坉，總是無夠額的力通予伊密密，因為附近的所在猶原咧出瓦斯的氣，是因為彼所在是沙地的緣故。 彼霎厝邊所有的gâu人出所有的gâu話就講；講是鑿著龍穴；有的講是鑿著龍目。離彼空約有丈五遠有一个舊鼓井，內面亦紲有出煙。In就講是舊井的神受氣，所以緊緊備辦牲禮金紙佇...

[1916-4 台灣教會報 文類-散文 作者-陳清義/Tân Chheng-gī]
共進會 [ Kiōng-chìn-hoē ]
共進會。 1916. 4，no. 373，pp. 5 台灣對屬日本帝國的版圖以來，有二二年久，猶未捌有這擺大鬧熱，予全台佮對岸佮內地的人來看。這幫總督府有擬定設台灣勸業共進會佇台北城內。有分做兩?會場。第一个會場就是新總督府的衙門，這間厝有五層懸，正面的塔有180尺懸，算是真大間。第二个會場就是佇苗圃的內面，現時咧備辦起濟濟款的厝，佮生理店。開會的日就是4月10日起。到時的確會真鬧熱，就是對有台灣以來，所未捌有的。聽見講有50萬人會來看。有這款的好機會未免得予咱的心大意愛報揚主的道理，予遮的人聽見。今北部的中會已經有議決著設佈道場佇共進會第二會場的正面。現時所在已經定著，厝亦貿人咧起，向望...