[1928-4 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu Sú ]
台灣基督教史 吳昌盛 (續接前號第13面) 1928.04.01 517卷(芥菜子第26號) p.11-13 2. 傳說，「In 的祖公予漢民族共伊趕去山內táu-toé，所以為著欲說這點恨才有刣人。對按呢in代代有趁in祖公的教示，凡若男子有分別的智識，in老父著chhoā in囝去山頂，才指彼个山腳的平野，來講起in祖公所留的怨恨。亦共in講著安慰in祖公的人來刣人。」這个傳說實在會信得抑袂，全然是疑問。 實在這个刣人的風俗是對漢民族袂徙來台灣的以前就有。若閣將in 的根據地，南洋遐的人的習慣來調查，亦會通發見親像這款的風俗。閣再以前我有講受著漢民族的壓迫的毋是生番...

[1928-4 台灣教會報/芥菜子 文類-散文 作者-陳清義/Tân Chheng-gī]
讀冊桌 [ Tha̍k-chheh-toh ]
讀冊桌 陳清義 1928.04.01 517卷(芥菜子第26號) p.13-14 約拿事蹟的研究 舊約中的事蹟，最第一大的，就是約拿予大魚吞落去這條。主耶穌捌2擺明明講，taⁿ約拿會拄著這个遭難，是對佗位來？就是無順趁耶和華上帝的命令，去尼尼微的城，反轉閃避搭船去Tāi-sit (大約西班牙)。到路中拄著風湧災害的危險，上帝受氣伊無趁命令，刁持用這个來責備伊，船中的人攏毋知，後來抽籤得著約拿的時，眾人問伊的緣故，伊明明講無隱囥，閣再甘心予人hiat落海，來煞這風湧，救船中的眾人。雖然按呢，主猶原管顧伊，備辦一尾大魚來吞約拿，經過3暝日，後來予大魚吐出佇岸裡來活，就趁命令赴尼尼微大...

[1928-4 台灣教會報 文類-散文 作者-陳金然/Tân Kim-jiân]
束縛才是自由 [ Sok-pa̍k chiah sī chū-iû ]
束縛才是自由 陳金然 1928.04.01 517卷p.4-5 自由人人愛，若是無逐个得著，有的親像自由，其實是無。普通人teh講自由，敢是講跤手無掛鎖鏈號做自由，較少人teh想意志有夯枷抑無？近來有自稱新思想家teh主將自由是衝動的滿足，致到濟濟人掠放縱做自由，因為按呢紲掠濟濟號的事來做犧牲，親像戀愛抑是結婚chiah 的重要的代誌，人倫的大事in亦the̍h彼兩字自由來加tì-leh，紲將自由戀愛做自由亂愛，抑是做自由亂來，亦用自由結婚做自由亂婚，抑是做自由亂倫，實在真可惜，將神聖的人倫予伊成做野獸的衝動滿足的機關。 總是有較深想的人in就無掠彼號做自由，是掠靈性的發動，抑是...

[1928-4 台灣教會報 文類-散文 作者--/-]
祈禱的感化力 [ Kî-tó ê kám-hoà-la̍t ]
祈禱的感化力 譯載 1928.04.01 517卷p.4-5 祈禱若熱誠，感化力是真大。親像某國有一個公爵，伊服事上帝真敬虔，疼百姓ná囝一樣，眾人攏呵咾。 有一日公爵穿私服出來thit-thô。路裡拄著一个農夫佮伊相佮行，沿路行沿路講話，行有里外路，兩人欲離別的時，彼个農夫用真恭敬的禮數，深深致意共公爵講，「阮一家受你的大恩，實在感謝講袂盡。」公爵聽見按呢，想袂曉得，就問講，「我thài有啥物恩惠款待恁一家leh？」農夫才應講，你毋知mah？我有一個囝，前真不孝，lām-sám做，放蕩愛chhit-thô，食酒醉來惹事端，予阮一家攏失望；拄好有一日看見你入禮拜堂，伊也綴你入去，...

[1928-4 台灣教會報/芥菜子 文類-散文 作者-陳清忠/Tân Chheng-tiong ]
兒童中心的基督教 [ Jî-tông Tiong-sim ê Ki-tok-kàu ]
兒童中心的基督教 (續接第22號) 第五章 1928.04.01 517卷(芥菜子第26號) p.14-15 基督教，是消極的抑是積極的？ 補摃破的物是基督教的使命mah？基督教的本質是干焦做修繕tek工程而已mah？若是按呢基督教不過時一个消極的的宗教nā-tiāⁿ。總是基督教，毋但消極的事業，也是有帶積極的大的使命佇teh 的宗教。今仔日的基督教會，將保羅的神學加圇吞，將伊的神學彼句：「這世間無一人義人」做基礎來獨立社會觀，所以基督教自然陷落做消極的的宗教。 修理摃破的物是較貴氣的工程，抑是預防毋通予伊摃破彼款的工程較有價值？今仔日的社會通講，差不多灌注所有的力佇修繕...

[1928-4 台灣教會報 文類-小說 作者-周天來/Chiu Thian-lâi]
故事 [ Kò͘-sū ]
故事 心心，念念 周天來 1928.04.01 517卷p.8-10 (這篇無論大人，囡仔來看攏會明)。 捌有一擺佇某所在，有一個女學學生佮伊一个小弟，兩个相chhoā出門；坐火車去到屏東的所在揣伊的窗友thit-thô。彼日in到屏東拄拄3點半，也彼个學生的窗友有來到車頭等接in；大家見面真歡喜，相佮講話；就chhoā in到伊的厝。彼暗就辦腥臊請in。食飽了停霎仔久，in就出去門口埕歇睏；有時坐--teh，有時起來；行來行去，講東講西講真久，是因為太久罕得相拄；又閣歇熱的時間已經欲過，大家相揣坐；險險就無通相探的機會，所以大家談話真濟；到真暗才無閣hoē；大家歡喜到極，...

[1928-4 台灣教會報 文類-散文 作者--/-]
世界第一大間的 Ho-the-lu (旅館) [ Sè-kài Tē-it Toā-keng ê Ho-the-lu (Lú-koán) ]
世界第一大間的 Ho-the-lu (旅館) 1928.04.01 517卷(芥菜子第26號) p.18-19 最近佇美國Si-ka-ko (Chicago)市有起一間旅館叫做Su-thê-bûn。地上有二十五層，地下有四層，房間的數有三千間，起這間的建築費，有開兩千七百萬hut：(就是咱的五千四百萬銀)，現時算是第一大間的旅館。設使若有一人逐暗踮一間房間，欲蹛到chiah 的房間了，著愛八年久。閣再擦玻璃的做工人，逐日做八點鐘久的工，擦遐的玻璃到一遍清楚，也著五月日久。 旅館內椅仔的總數有七千綴；專屬的自動車，五十隻；桌巾，十三萬八千條；食巾，有三十萬條；杯，有八萬四千綴；面...

[1928-5 台灣教會報/芥菜子 文類-小說 作者-陳清忠/Tân Chheng-tiong ]
一條線 [ Chi̍t tiâu soàⁿ ]
一條線 陳清忠 1928.05.01 518卷(芥菜子第27號) p.15-17 下面所譯這篇是法蘭西的文學者Guy de Maupassant (1850－1893)所寫--ê，不止有通做咱的教示，請大家毋通看做是心適的故事，因為伊寫這篇的確毋是欲予人讀心適；伊的目的是愛讀者目睭著金，毋通予這个烏暗的世間的影jia--去，致到來趁這个世間的款式。 一擺佇Kho-lia̍p-bí 的所在有做生理的鬧熱。農夫佮in 的婦人人對四方聚集來佇一个城市。做生理的所在chhiâng-chhiâng滾。－人叫來叫去，生理人大聲招呼人來買in 的物件，牛teh hán，狗teh吠。O͘-sū-...

[1928-5 台灣教會報 文類-散文 作者-許有才/Khó͘ Iú-châi]
捌聖冊的必要 [ Bat Sèng-keng ê Pit-iàu ]
捌聖經的必要 許有才 1928.05.01 518卷p.2-3 聖經ah！毋捌有一本冊親像你遐爾普遍佇天下；親像你予世界的人ná久ná濟人愛讀，因為你有真大的 吸力，你有予袂算得的人成做偉人。你有予濟濟極歹的人越倒轉；你有報人捌唯一的真神，佮獨一的救主。你是世界幸福的 母胎，好思想的水源，因為你有保存全能--ê 的話佇你內面。宇宙的起源，佮終局，攏啟示佇你的腹肚內。眾項學說teh變換，若是你就徛在。你是上帝講的話，宇宙是上帝寫的文章，chiah 的種種的學術，是teh研究上帝的文章；所以到in所研究的終點teh欲佮你一致，in 的變換是teh促就佇你，若是你靜靜徛teh聽候in，到...

[1928-5 台灣教會報/芥菜子 文類-散文 作者-陳清義/Tân Chheng-gī]
讀冊桌 [ Tha̍k-chheh-toh ]
讀冊桌 陳清義 1928.05.01 518卷(芥菜子第27號) p.13-15 基督徒信仰的派別 基督教佇世間，日日teh進步，佇國家社會的中心，活氣生起，已經佔了大部分的勢力，所向望是愛欲予地面上的國，變成做天國。這个是真要緊的事，可惜現代基督徒的中間無一盡十分透徹基督的真意，表示合一的做工，同踮佇基督十字架的 大旗下，盡力去做，來收效果，he是怎樣，照人teh查察，是因為今仔日的基督教中的信徒in 的信仰有掛派別的色彩，來予伊按呢。Taⁿ彼个派別是啥物款，排列佇下底：－ 1. 權勢派。權勢2字，是世間人第一意向的目的，也是世間人所誇口的榮光，因為有權勢的人，做...

[1928-5 台灣教會報/芥菜子 文類-散文 作者-陳瓊琚/Tân Khêng-ku]
對祖先的墓地掘出銀兩甕 [ Tuì chó͘-sian ê bōng-toē ku̍t-chhut Gûn nn̄g-àng ]
對祖先的墓地掘出銀兩甕 陳瓊琚 1928.05.01 518卷(芥菜子第27號) p.17 有看見內地的新聞紙，講起佇岡山縣，Sēng-tiân郡，Pak-hô-khì庄，Tāi-jī Kiong-san。有一個人名叫做山下文傑，今年拄七十五歲。伊常常佇大阪地方趁食，拄佇年尾就是12月18日有轉tǹg-去厝裡，亦看見大囝慶太郎佇舊曆過年teh 哮chhau無錢，伊的老爸就問伊的理由；伊才講，因為伊teh耕作彼塊地的主人欲賣彼塊地，問看伊欲買無，若無欲將彼塊地去賣別人。總是伊無錢通買，所以真艱苦。 彼時的老爸聽了拄佇舊曆12月30日，共伊的囝慶太郎講，毋免煩惱，伊欲chhoā伊去一...

[1928-5 台灣教會報/芥菜子 文類-散文 作者-偕叡廉/Kai Jōe-liâm]
趁十萬起拜堂 [ Thàn cha̍p-bān khí Pài-tn̂g ]
趁十萬起拜堂 偕叡廉翻譯 1928.05.01 518卷(芥菜子第27號) p.17-18 人講Pa-tîn牧師無好口才，若是伊真熱心，謙卑閣gâu料理教會。伊平素徛起佇美國南爿，草地的所在；所踮的鄉庄人數約略有800人。去做牧師了後濟濟會友搬徙去別位，中間也有少年人無愛去禮拜。，禮拜日若到，規陣相-chhoā駛自動車四界thit-thô。拜堂又舊閣歹，應該著，修理，毋kú經費不足。雖是按呢，Pa-tîn牧師也無一時仔失志，伊反轉對Tok-hoē講著起新的拜堂。聽見這个代誌列位的長老不止gông-ngia̍h，因為知若無錢通修理舊--ê，thái有錢通起新--ê？總是Pa-tîn牧...

[1928-5 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu Sú ]
台灣基督教史 吳昌盛 (續接前號) 1928.05.01 518卷(芥菜子第27號) p.11-13 第一章： 第2節：有史以後到荷蘭領台止。 台灣最第一代先記上歷史的記錄是隋朝的時代，比隋朝較以前卻無啥物確實的記錄；雖然漢書有寫「大灣國」有人teh推想講是台灣，總是漢朝的地理誌無綴通看，大灣國這三字。所以袂通決斷來講的確有影。 第一代先來台灣探險的年號就是隋朝，煬帝，大業三年。若看彼時的記錄有寫講，「煬帝令羽騎尉，朱寬入海訪異族。何蠻言之。遂與蠻俱往。因至流求國(就是台灣)。言不相通，掠一人而返。」Siāng年號的 7年才派遠征軍。彼个記事有寫講，「帝遣陳棱卒兵，自義安浮...

[1928-5 台灣教會報 文類-散文 作者--/-]
對佇教派問題的管見 [ Tuì tī Kàu-phài Būn-tê ê Koán-kiàn ]
對佇教派問題的管見 楊Io̍k-kî 1928.05.01 518卷p.9-10 我所講的教派是指基督教派。 照1907年的調查，美國有42个派別。其中有派閣分做真濟小派，親像路得派有閣做23小派。按呢彼42派別有閣分做150左右小派。是因為無siāng意見，無siāng主張才會分到按呢。若論咱台灣是3，5派nā-tiāⁿ。Taⁿ今仔日咱看教派才濟，咱kiám通看in中間淡薄的各樣主張講是teh爭鬥，也無看in活動mah？ 教派愈濟共講號做基督教愈teh興，kiám會傷過頭。你看改革前的羅馬公教會的 Kim-an Bû-khoat，只有伊一派。 毋kú宛然是ná準徙一叢古松，媠...

[1928-5 台灣教會報/芥菜子 文類-散文 作者-陳清忠/Tân Chheng-tiong ]
兒童中心的基督教 [ Jî-tông tiong-sim ê Ki-tok-kàu ]
兒童中心的基督教 續接26號第15面 第六章 1928.05.01 518卷(芥菜子第27號) p.19-20 永遠é負債 前身紐約大學的總長Hin-lé博士，有著一本冊叫做「永遠的負債。」佇這本冊內面。伊對教育學的立場，為著兒童吐出大的氣焰。我看著這本冊第一感激我--ê，是彼句 「永遠的負債。」「永遠的負債！」Kiám毋是真豐富佇暗示(暗靜的教示) 的文字mah？咱對人所借金錢上的負債，無論怎樣，有還的義務。 英國有名的小說家O-ta Su-kok，為著出版事業來大負債，伊用怎樣來還，咱若讀伊的傳記，無一人毋感心佇伊的熱心。保羅講，「我有欠希臘人，異邦人，智識的人，愚戇的人...

[1928-6 台灣教會報 文類-散文 作者-高德章/Ko Tek-chiong]
大家平安 [ Tāi-ke pêng-an ]
大家平安！ 高德章 1928.06.01 519卷p.3-4 列位看報的兄姊平安。感謝主的疼咱大家得著受召的福氣，通脫離烏暗，魔鬼的束縛，入佇光明自由的世界，得著恩典無限。欣慕咱大家的信德一日一日那加添，那進步；親像樹枝結聯佇樹身一般，常常結聯佇主，得著結好的果子濟濟，通予佇天裡咱的父得著榮光。欣慕咱大家佇頭前的路站，或是拄著啥物境遇，是lap起抑是lap落，彎彎斡斡，常常相勸勉，相指導，相引chhoā，免得徛佇邊仔看咱的信仰的朋友teh失迷，無平安，欲跋倒，失志，艱苦。教會兄弟姊妹大家只有「欠債著還--ê」毋是相怨妒，相爭，相欺負，奸詐，詭譎，妒賢，擾亂，只有的確著明--ê。1，...

[1928-6 台灣教會報/芥菜子 文類-散文 作者-偕叡廉/Kai Jōe-liâm]
講方言 [ Kóng Hong-giân ]
講方言 偕叡廉 1928.06.01 519卷(芥菜子第28號) p.12-13 前pang美國出名的神學博士，彭牧師有寫一篇落佇教會報，teh論起講方言的事，博士不止有研究這个代誌。伊所寫的逐項真詳細，若是真長，所以佇遮簡單拾淡薄來寫佇下底：－ 信聖經是著，總是有一等號的人有信聖經，也有相參信別項。In有信聖經也有相參信in 的眠夢，信in 的思想是著，信in 的想像；結局來講就是將in所信的的確毋通減少聖經內所記載--ê；若是按呢就成做一款的批評者，毋願承受聖冊內所記載的。咱所信的也毋通比聖經內所講的較濟。若是按呢加添就成做異端。毋通將聖經共伊減少，也的確毋通共伊加添。 可...

[1928-6 台灣教會報 文類-散文 作者-許水露/Khó͘ Chuí-lō͘]
耶穌怎樣受洗禮 [ Iâ-so͘ cháiⁿ-iūⁿ siū Sé-lé ]
耶穌怎樣受洗禮 許水露 1928.06.01 519卷p.5-6 佇約旦河邊有一個先知人徛teh大聲喝喊講，「著反悔ah！天國近lah！！著受洗禮ah！！！」這个聲一下出，聽見到遠遠的加利利的地方；致到真濟，人來受洗禮。 中間有一人聽見這个聲，比眾人較有意思來受洗禮的，就是咱的主拿撒勒人耶穌，伊佇久久的中間就曉悟佇舊約聖經所記teh指伊的使命。Bû-kò͘是請暗靜teh等候時到。Taⁿ時到lah。耶穌著出頭。伊就離開伊30年久所蹛的家，放拺老母，兄弟，姊妹，親人，朋友，佮木工，來就近行洗禮約翰。 有一日佇約翰的面前有一個血氣風光的青年；年歲倚30，伊的心神，肉體，比別人較發達。...

[1928-6 台灣教會報/芥菜子 文類-散文 作者-陳清義/Tân Chheng-gī]
讀冊桌 [ Tha̍k-chheh toh ]
讀冊桌 陳清義 1928.06.01 519卷(芥菜子第28號) p.14-15 教會存在的 要素 凡若有思想的，無毋了解教會的真意義。教會毋是禮拜堂。教會就是對眾信徒集合來組織的團體，可見信徒就是教會，教會的信仰心冷熱來移轉。總講，教會的存在，除起心以外，無別款的氣力。這个信心就是靈界生活的表象。信心就是教會用啥物法度來測量，試用幾若款，排列佇下底： 1. 致意祈禱。不論啥物教派中的信者，抑是求道者，著致意祈禱；不但佇公眾的所在祈禱，佇家己的厝內，睏房的中間，若會家己佮上帝交通，就基督已經佇伊的中間；亦教會也建設佇伊的內面。若毋是按呢，雖罔有會友的名，無會友的名，無會...

[1928-6 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu sú ]
台灣基督教史 (續接前號) 吳昌盛 1928.06.01 519卷(芥菜子第28號) p.11-12 第一章：佇台灣頭一擺的基督教。 第1節：荷蘭人的領台。 Taⁿ咱暫時來看西洋的大勢。佇十三世紀的中站有發明指南針，毋但按呢對學術的進步會通證明地球是圓--ê。對按呢應用這个指南針行船的人敢好膽駛出去外洋。所以行船術加不止進步。 佇1486年Bartholomew Dias有發見駛對亞非利加的南端去印度的船路。閣佇1492年Christopher Columbus有發見A-bí-lī-ka新大陸。閣對1519年到1522年Magellan有發見對太西洋出去太平洋的船路，毋...