[1939-1 台灣教會公報 文類-散文 作者-郭朝成/Koeh Tiâu-sêng]
中中通訊 [ Tiong Tiong Thong-sìn ]
中中通訊 擊之成之 (郭朝成記) 1939.01 646期 19-20頁 樹木經過霜雪，伊的質，正會堅定。人著經過苦難，伊的心志正會奮發。教會著經過打擊，會友的信仰正會堅固。海底的螺仔，沙石走入肉內，受非常的痛苦，伊就生一款的汁來抵抗，後來沙石紲變做貴氣的珍珠。 約瑟受一切的危險苦難，後來做埃及的宰相。韓信予人壓迫，nǹg人的跤縫下，後來做兵馬大元帥。 佇遮記中中幾間教會，對苦難來結果。 1. 和美教會：十外年前，有會友去支那提真耶穌教的種子來掖，會友約三分二去信真耶穌教。拜堂也予in買去，害啦無拜堂，也無會友。照人看，這間教會會滅。無拍算咱媠媠的拜堂落成；會友禮拜比前也無啥減。...

[1939-2 台灣教會公報 文類-散文 作者--/-]
教會的權柄 [ Kàu-hoē ê Koân-pèng ]
教會的權柄 1939.02 647期 01-02頁 本月，各中會攏欲開會來辦理教務。也佇3月，南部大會愛招集來議決通南部所著進行--的。記者猶未寫，本社說的代先，致意愛敬請屬主的列位兄姊，逐日撥時間，迫切替大中會來祈禱。古早人講，國家的興衰，匹夫有責。換話來講，教會的進步佮倒退；眾信徒攏著擔當彼个責任。 試想，初代耶路撒冷的教會，敢毋是真理想的教會嗎？(1)有好的牧師：親像主的兄弟雅各，是一个內外有名望的人格者，做真好的大會議長，gâu辦代誌。(2)閣有好的傳道師：就是遐的12使徒(馬提亞補猶大的缺)好膽熱心傳教。雖然較濟，是干焦記彼得的事，猶久咱通對伊來推測其他的使徒，in定著有得著非...

[1939-2 台灣教會公報 文類-散文 作者-王守勇/Ông Siú-ióng]
宗教教育講座 [ Chong-kàuKàu-io̍k Káng-chō ]
宗教教育講座 (中中：王守勇) 1939.02 647期 06-09頁 第7 講：路邊教授 1. 路邊教授的要緊 主耶穌行路的時，佇路邊，佇同行的人的中間，逐擺揣機會來教示。因為這款的機會無較輸佇室內的教示。親像佇敘加的古井邊，抑是佇樹跤看見撒該佇桑材樹頂，抑是拄著法利賽人的西門，佇彼時有掠著真好的時間來開喙教示。總講，耶穌對這个傳道佇欲去別个所在，佇路中，抑是佇無按算的機會，佇路邊伊就開喙教示。 親像這款的方法，不止有通做咱的模樣。咱做到教師的責任毋是干焦佇教室內nā-tiāⁿ；其實佇路裡，佇街裡佮生徒接觸的時，教師的感化，抑是教示佮佇教室內的教示，平價值。咱不時著存這款的心，...

[1939-2 台灣教會公報 文類-散文 作者-賴仁聲/Loā Jîn-seng]
宣道會通訊 [ Soan-tō-hoē Thong-sìn ]
宣道會通訊 澎湖教區政治管見 (接1月21面) 1939.02 647期 13-15頁 2. 宣道新方面活動。我看澎湖的傳道，男傳道方面不及女傳道方面的活動。試講幾句。因為遮的迷信真重。毋但遮，不論佗位，若講場海邊的迷信攏較重。開講場，佮島嶼的酒，女的消費也較大。這款事，媽宮佮Chū-lī島也僫出這个例。迷信，酒，女色這3項。廟媠，坐宮；差不多逐鄉里有。遮的信仰，「天公」佮台灣同；其他為海面生活就特別崇奉觀音，媽祖。總是以外猶大對重灶文公，城隍爺。不知不覺對島嶼來，遮的婦女自卑講in女性是驚人，污穢。拍算這是對遮的儒學發達的所致；所以濟濟女性有傾向佇食菜。佇3，6，9；1，4，7；閣...

[1939-2 台灣教會公報 文類-小說 作者-賴仁聲/Loā Jîn-seng]
逐人毋免絕望，的確有向望 [ Ta̍k lâng m̄-bián choa̍t-bāng, tek-khak ū ǹg-bāng ]
逐人毋免絕望，的確有向望 (對天國新聞，賴仁聲試譯) 1939.02　647期　16-20頁 300年頭擺生後生 佇內地東海道的靜岡市，有一个百萬的員外，就是有300年歷史的大門風，武藤漆器店。 這个武藤家的第14代孫，掌家伙的單生囝武藤孫右衛門氏佇49年前的明治23年出世。 足奇怪--的，就是這个家連連300年毋捌生後生，代代都是生查某囝。代代都是分後生來接。這擺會得生查埔--的，毋但爸母就歸宗族，佮近附的人都攏掠做神跡來歡喜。 ài oh！金--的，玉--的，寶貝ni-ni。受爸母的福蔭，疼惜來培養，彼都免講--的。可惜一項，就是出世就軟弱。到佇欲入小學校的時，就著骨膜炎，脊...

[1939-2 台灣教會公報 文類-散文 作者--/-]
用母心的教育 [ ēng Bó-sim ê Kàu-io̍k ]
用母心的教育 (接舊年12月12面) 1939.02 647期 　21-21頁 3. 赦免的老母，才是好的老母 1. 對囡仔的期待。 老母對囡仔的期待有真濟款，其中第一下等的期待，就是為著伊本身的名譽，叫囡仔著比別人較gâu，通予別人呵咾，講伊真gâu教育囡仔。對按呢，囡仔就姑不將，不得已著提比別人較好的成績，才會用得。 設使若提比別人較bái的成績，伊就真失望，為著失落伊的名譽，所以真毋願，致到大大責備囡仔。 也閣若老爸有比別人佇較好的地位的時，伊就想講，也著為著老爸的名譽......所以就閣那加添囡仔的負擔。親像按呢，囡仔著為著爸母的名譽來犧牲，受艱苦。 這个是用囡仔...

[1940-1 台灣教會公報 文類-散文 作者-梁秀德/Niû Siù-tek]
以弗所的批 [ Í-hut-só͘ ê Phoe ]
以弗所的批 梁秀德 1940.01 658號 p.3-5 今講到遮，就著想猶閣一面的主張，就是講，保羅佇以弗所的獄中寫的，就是腓立門，歌羅西佮以弗所這3張的批。主張這面的先生，in是講啥物理由？ 1)這3張的批，攏有相關連，有種種密接的關係佇咧，若設使彼中間的一張，是佇以弗所寫的，就自然其餘的，也通共承認是按呢。 2)佇腓立門的批中，保羅有共腓立門講，「著備辦所在予我蹛」(22節)。這句話，聽著真自然，若親像明明知佇明仔日à是閣2，3日，我欲受敨放，欲去見。你的面，佮你講濟濟話，又閣我是老人，閣欠用安靜的場所，所以著備辦所在予我蹛。親像這款的情形來攏，就若欲想是佇彼個1...

[1940-1 台灣教會公報 文類-傳記 作者--/-]
信仰美談 [ Sìn-gióng Bí-tâm ]
信仰美談 赤馬叔 (An-pîn-seng 記) 194001 658號 p.5-6 (接11月號8面) 7. 入神學校。救主1887年，赤馬叔拄30歲，吳文彬傳道師，看見一熱心敬上帝，迫切祈禱，關心佇教會，一切的工作，咧想伊將來是非常人。就極力推薦伊，入台南神學校。伊佇神學校，歷任的校長就是巴克禮，甘為霖，涂為霖；漢文的教師，就是林湘雲，許廷芳。 彼時神學校的生活，每月領金3箍，伙食外猶過賰3角銀。禮拜日就出外佈道，抑是輪流去鄉村教會主理禮拜，到拜2就報告消息。 8. 販賣聖冊。讀到3年生的時，教士會議論，著派一名學生去販賣聖書。結局赤馬叔中選，每月薪金4箍。赤馬叔就出發...

[1940-1 台灣教會公報 文類-散文 作者-顏春和/Gân Chhun-hô]
宗教團體法解釋 [ Chong-kàu thoân-thé-hoat kái-sek ]
宗教團體法解釋 (接11月號第6面) (台南：顏春和) 194001 658號p.7-8 (7)監督規定。 A. 教義上的違背。宗教團體，仔是教司所宣佈的教義，儀式，行事若有妨害安寧秩序，或是違背做神明的義務的時，主務大臣會得共伊制限，禁止，教師的業務停止，仔是宗教團體的認可取消(第16條)。一條是宗教上的活動有患著憲法第28條，就是信仰自由的原則的制限條件，的制裁規定。對這個取分若有不服的，通出訴佮訴願。 B. 命令，規則的違反。宗教團體，抑是佇彼個機關的人若有患著法令，教規，教會規則，仔是害著公益的時，主務大臣的得共伊取消，禁止；命令伊解任，或是停止伊的業務(第17條)。對這個...

[1940-1 台灣教會公報 文類-散文 作者--/-]
母性愛的教育 [ Bó-sèng-ài ê Kàu-io̍k ]
母性愛的教育 著拍死家己予囝兒活 (Liû-n̂g Seng譯) 194001 658號 p.8-9 我有一日對水道橋坐電車欲到指谷町。車內兩爿的長椅人客攏坐到實實，總是佇頂面咧予人釣手的(釣革)攏無人釣，所以中央的路攏是空位。拄拄彼時有一個7，8歲的查埔囡仔對中門入來，也同時對後面的門有一個媠媠的婦人人入來。 彼個查埔囡仔入來坐車的時，隨時去後面，彼個夫人人的邊仔，用比手佮出奇怪的聲咧佮婦人人講話，所以連鞭知影伊是啞口。 總是真奇怪這個啞口的查埔囡仔咧佮伊講話，猶過這個婦人人干焦小可看伊一下若定，就閣看窗仔外，佯毋知攏無欲chhap伊。 伊遐冷淡的態度，這個查埔囡仔...

[1940-1 台灣教會公報 文類-散文 作者-黃永昌/N̂g Eńg-chhiong]
新樓病院通訊 [ Sin-lâu Pēⁿ-īⁿ Thong-sìn ]
新樓病院通訊 論肺炎的常識 (黃永昌) 194001 658號 p.17-18 這幾日北風忽然到，大家都感覺真冷，予咱驚著。佇這款氣候快變換的時，濟濟人真快寒著，也對入冬起，肺炎的病人會那濟。所以鄙人愛寫淡薄肺炎的代誌，向望有欠用的時通做參考是我的歡喜佮榮光。 肺炎是濟濟人所驚，真危險的大症頭，一旦家內若有一人著這款的病，就通家內著急，驚惶，煩惱，逐日都咧聽候熱退。熱袂退的時，濟濟人愛換醫生，愛趕緊好，因為真驚這個病，這攏是人情所致。肺炎有真懸的熱，差不多39度至40度，有嗽，也胸坎會疼，有時疼到親像肺內有針咧鑿，也喘氣喘攏袂離，胸坎親像大條索綑ân咧，所以掃著真艱苦，佳哉若ph...

[1940-1 台灣教會公報 文類-詩 作者--/-]
祝聖輝長老榮任助役 [ Chiok Sèng-hui Tiúⁿ-ló êng-jīm Chō͘-ia̍h ]
III. 祝聖輝長老榮任助役 (詹--氏親) (潘文德) 1940.01 658號 p.16-16 1. 聖輝長老升助役，上帝恩賜真夠額，檢采有人欲目赤，若是阮攏真感 謝。 2. 同族聽著心歡喜，對心底講真恭喜，干焦欠欲喝Bān-jāi，穩當長老 你也知。 3. 聖輝長老的做人，言行舉動心相同，會內會外好名聲，榮光上帝聖尊 名。 4. 阮taⁿ一齊來祝賀，呵咾長老的升高，懇求聖神大幫贊，予你益發gâu做人。 5. 此去益發堅固信，聖道真理做準繩，世間誘惑若吼獅，望你擒牢主徛在。 6. 所做事事真興通...

[1940-1 台灣教會公報 文類-散文 作者--/-]
咱的神學校 [ Lán ê Sîn-ha̍k-hāu ]
咱的神學校 1940.01 658號 p.16-17 這霎若來回想舊年(1939)所經過的事，實在著感謝上帝。伊有賞賜保護佮指導的恩典，所以濟濟人猶原通佇遮準備，通奉事咱的教會。佇3月有4个學生卒業：教育課的同局有好意來赴式；閣有濟濟人客。向望in 4个只有倚靠上帝做工，猶原會接續in佇學校所趁好的習慣。阮替in祈禱，向望in欲盡跑走的路站，來守所信的道理；因為咱知了後有義的冕旒共in備辦hē-teh。就是主欲予in，毋但予in，也欲予見若欣慕主顯現的人。 卒業式了後，校長佮滿牧師娘有倒轉去英國歇睏。滿牧師佇teh 的時，學校有漸漸進步，大家teh向望伊無偌久會閣來。四月有4个學生入學：...

[1940-1 台灣教會公報 文類-散文 作者-施鯤鵬/Si Khun-phêng]
內地見聞記 [ Loē-tē Kiàn-bûn-kì ]
內地見聞記 施鯤鵬 1940.01 658號 p.20-20 這幫佮盧文福牧師，做南部大會的會使出席日本基督教會第53回的大會。得著上帝的引chhoā，佇9月21日搭高砂丸對基隆出帆。受基隆葉金木牧師，聖公會Hō͘-tîn牧師，船醫趙Tok-seng先生佮真濟的兄姊的遠送。 二四日神戶上陸。同船有20外名的兄姊，所以感覺是親像一個家族不止心適。二四日拄是禮拜日，阮佇早起10點鐘的時，就佇船中的娛樂室做禮拜，眾人真稀奇；圍倚來看；知是基督徒的團體。 二五日早起到東京。 十月5日，有去出席日本基督教會教職者的修養會，是佇明治神宮外援的日本青年館。有聽著Chó-pho牧師用「十字...

[1940-1 台灣教會公報 文類-小說 作者-賴仁聲/Loā Jîn-seng]
用尻脊向上帝 [ ēng ka-chiah ǹg Siōng-tè ]
宗教小說 用尻脊向上帝 接11月第12面 賴仁聲 194001 658號 p.18-20 5. 大團圓 (大團圓) 對彼日夫婦佇病院相認錯了後，大家幾分有較好感。若是Teng-hû嫂已經得著主的感化，所以盡所會欲用主的疼來疼伊的丈夫。所以對彼日以後逐日去看伊，也逐日買果子好餅去共丈夫覓(māi)病。佳哉病勢一日，一日有漸漸較好。閣siāng要緊的，就是Teng-hû嫂倒來若讀這句聖經較好意思的，就寫踮一張紙，共伊偷下踮眠床頭。恬恬做伊去。起頭Teng-hû兄無掠做意思攏無共伊讀。過幾若日啦。伊就共伊提起來讀。 愛啊！這是甚物？汰有這號紙，寫這號話佇眠床頭。總是Teng-h...

[1940-2 台灣教會公報 文類-散文 作者--/-]
基督徒的生活 [ Ki-tok-tô͘ ê Seng-oa̍h ]
基督徒的生活 194002 659號p.1-2 基督徒是甚物？亦基督徒的生活是甚物？佇新約聖冊的中間有濟濟款的講法。就中彼得前書的批所講的不止有特色佇咧。照彼得先生所講，基督徒是「四散徛起的出外人」，是「寄跤佇世間的」，是「做寄跤出外佇外邦中的人」。原來咱咧講人踮世間是親像做出外。「我若出外人客。」-彼个意思咧指明日子的緊過，人生的無常，宛然親像箭，親像梭走真緊，連鞭過去。所坐的椅，所徛的厝，抑是講台，以及所做的事業著讓別人。總是彼得先生所講做出外的意思較毋是為著按呢。伊講咱做基督徒是「寄跤出外的人」，彼个意思是講咱做基督徒，雖然徛起佇眾人的中間，猶過咱著親像出外的人家己分別毋通佮周圍的人...

[1940-2 台灣教會公報 文類-散文 作者-陳金然/Tân Kim-jiân]
那鴻的冊 [ Ná-hông ê chheh ]
那鴻的冊 陳金然 194002 659號 p.3-6 1. 那鴻意思是安慰的人，伊的冊是小先知的第7本，關係伊的事，聖冊攏無記載，佇舊約別位也無記這个名，外典II I-su-la̍h 1：40佮約瑟-hut的冊有記載。後來的歷史家有講起偌濟人有這个名，親像耶穌的養爸約瑟的祖先也有這个名(路3：25)。(新約是照舊翻譯的讀做Ná-ong(hông))伊是伊勒歌斯人，這个所在是佇佗位僫得知，有幾若說。 1)十六世紀以後有傳說，講亞述的境內有基督徒咧蹛的庄社叫做アルクス(Arukus)，講佇遐有那鴻的墓。2)對伊守賞用的地方名-黎巴嫩，迦密，巴珊1：4-來看是佇巴勒斯坦(Pa-le̍k-su-...

[1940-2 台灣教會公報 文類-傳記 作者--/-]
信仰美談 [ Sìn-gióng Bí-tâm ]
信仰美談 赤馬叔 (An-pîn-seng記) 194002 659號 p.6-7 (接正月第5面) 9.卒業傳道。救主1892年，春季對台南神學校卒業，受教士會派來蹛岩前的教會。這是伊前捌蹛遮教小學，大家熟似，兼管關仔嶺，白河的教會，按呢是一人管3个教會。佇彼年就佮吳--氏Boé結婚，來成圓滿的家庭。佇遮在勤4年久。 教士會就命令伊，著轉勤去澎湖馬公的教會。 彼時日清戰爭，清朝大敗，將台灣割讓予日本。皇軍已經佔領澎湖馬公，清朝的司令官劉永福，將台灣改做民主國，也發行紙票，欲佮皇抗戰。台灣的港口攏有劉永福的兵把守。 赤馬叔欲對東石港坐船過澎湖。到位日欲落海啦！劉永福的兵問...

[1940-2 台灣教會公報 文類-散文 作者--/-]
母性愛的教育 [ Bó-sèng-ài ê Kàu-io̍k ]
母性愛的教育 來學動物 (Liû-n̂g-seng譯) 194002 659號 p.7-8 對我的幼稚園保育室的塗跤下聽見狗仔囝咧吼的聲已經過一禮拜去啦。共掀起來看覓，才知真正有狗母(散--的)生四隻囝佇遐。遐的狗仔囝卻是袂通講佮普通的平(pêⁿ)肥，總是毛色也是媠媠古錐古錐。總是這隻狗母是這近附的人所厭賤的，目睭狠kài-kài，真狠惡的面相，所以老實講，伊做岫蹛遮，我也是真gê。 又閣一項，狗母的特性，若咧飼囝的時，伊的性真烈，是真愛咬人，所以我想講有幼稚園的囡仔佇遮，真危險，毋知著怎樣處置伊。拄好閣無偌久，當局者有欲thāu散狗，就想講共伊活掠來去交當局。 我想講...

[1940-2 台灣教會公報 文類-散文 作者-許乃宣/Khó͘ Nái-soan]
聖句的例解 [ Sèng-kù ê Lē-kái ]
聖句的例解 許乃宣 194002 659號 p.9-9 [佇遮所欲寫下，是對彼本「Polished stones and sharpened arrows 的冊來翻譯的：毋是我的著作，亦毋是彼本冊的全部。是干焦我所受感激的若定。彼本冊有24章。頭一章是論基督徒的生活。有將I約翰2：6節「人若家己講踮佇伊，就著照伊所行的去行」做總標語。今以下照所提出的聖句來例解。若會得通小可做大家的參考，是做萬幸。] 基督徒的生活(1) 「著注神看耶穌」(希12：2)。 佇一个落雪的日，有兩个囡仔咧thit迌；這个對彼个講，「咱來踮雪頂行看啥人的跤步較直。」彼个同意，就大家試行。一个注神看伊頭前的仔...