[1928-5 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu Sú ]
台灣基督教史 吳昌盛 (續接前號) 1928.05.01 518卷(芥菜子第27號) p.11-13 第一章： 第2節：有史以後到荷蘭領台止。 台灣最第一代先記上歷史的記錄是隋朝的時代，比隋朝較以前卻無啥物確實的記錄；雖然漢書有寫「大灣國」有人teh推想講是台灣，總是漢朝的地理誌無綴通看，大灣國這三字。所以袂通決斷來講的確有影。 第一代先來台灣探險的年號就是隋朝，煬帝，大業三年。若看彼時的記錄有寫講，「煬帝令羽騎尉，朱寬入海訪異族。何蠻言之。遂與蠻俱往。因至流求國(就是台灣)。言不相通，掠一人而返。」Siāng年號的 7年才派遠征軍。彼个記事有寫講，「帝遣陳棱卒兵，自義安浮...

[1928-5 台灣教會報/芥菜子 文類-散文 作者-陳清忠/Tân Chheng-tiong ]
兒童中心的基督教 [ Jî-tông tiong-sim ê Ki-tok-kàu ]
兒童中心的基督教 續接26號第15面 第六章 1928.05.01 518卷(芥菜子第27號) p.19-20 永遠é負債 前身紐約大學的總長Hin-lé博士，有著一本冊叫做「永遠的負債。」佇這本冊內面。伊對教育學的立場，為著兒童吐出大的氣焰。我看著這本冊第一感激我--ê，是彼句 「永遠的負債。」「永遠的負債！」Kiám毋是真豐富佇暗示(暗靜的教示) 的文字mah？咱對人所借金錢上的負債，無論怎樣，有還的義務。 英國有名的小說家O-ta Su-kok，為著出版事業來大負債，伊用怎樣來還，咱若讀伊的傳記，無一人毋感心佇伊的熱心。保羅講，「我有欠希臘人，異邦人，智識的人，愚戇的人...

[1928-6 台灣教會報/芥菜子 文類-散文 作者-偕叡廉/Kai Jōe-liâm]
講方言 [ Kóng Hong-giân ]
講方言 偕叡廉 1928.06.01 519卷(芥菜子第28號) p.12-13 前pang美國出名的神學博士，彭牧師有寫一篇落佇教會報，teh論起講方言的事，博士不止有研究這个代誌。伊所寫的逐項真詳細，若是真長，所以佇遮簡單拾淡薄來寫佇下底：－ 信聖經是著，總是有一等號的人有信聖經，也有相參信別項。In有信聖經也有相參信in 的眠夢，信in 的思想是著，信in 的想像；結局來講就是將in所信的的確毋通減少聖經內所記載--ê；若是按呢就成做一款的批評者，毋願承受聖冊內所記載的。咱所信的也毋通比聖經內所講的較濟。若是按呢加添就成做異端。毋通將聖經共伊減少，也的確毋通共伊加添。 可...

[1928-6 台灣教會報/芥菜子 文類-散文 作者-陳清義/Tân Chheng-gī]
讀冊桌 [ Tha̍k-chheh toh ]
讀冊桌 陳清義 1928.06.01 519卷(芥菜子第28號) p.14-15 教會存在的 要素 凡若有思想的，無毋了解教會的真意義。教會毋是禮拜堂。教會就是對眾信徒集合來組織的團體，可見信徒就是教會，教會的信仰心冷熱來移轉。總講，教會的存在，除起心以外，無別款的氣力。這个信心就是靈界生活的表象。信心就是教會用啥物法度來測量，試用幾若款，排列佇下底： 1. 致意祈禱。不論啥物教派中的信者，抑是求道者，著致意祈禱；不但佇公眾的所在祈禱，佇家己的厝內，睏房的中間，若會家己佮上帝交通，就基督已經佇伊的中間；亦教會也建設佇伊的內面。若毋是按呢，雖罔有會友的名，無會友的名，無會...

[1928-6 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu sú ]
台灣基督教史 (續接前號) 吳昌盛 1928.06.01 519卷(芥菜子第28號) p.11-12 第一章：佇台灣頭一擺的基督教。 第1節：荷蘭人的領台。 Taⁿ咱暫時來看西洋的大勢。佇十三世紀的中站有發明指南針，毋但按呢對學術的進步會通證明地球是圓--ê。對按呢應用這个指南針行船的人敢好膽駛出去外洋。所以行船術加不止進步。 佇1486年Bartholomew Dias有發見駛對亞非利加的南端去印度的船路。閣佇1492年Christopher Columbus有發見A-bí-lī-ka新大陸。閣對1519年到1522年Magellan有發見對太西洋出去太平洋的船路，毋...

[1928-6 台灣教會報/芥菜子 文類-散文 作者-陳清忠/Tân Chheng-tiong ]
兒童中心的基督教 [ Jî-tông Tiong-sim ê Ki-tok-kàu ]
兒童中心的基督教 陳清忠 1928.06.01 519卷(芥菜子第28號) p.15-16 第7章 (接前月第20面) 年年出世來世間。四百萬的囡仔欲怎樣？ 逐年佇這个世間有四百萬的囡仔出世，這个事實，真面目來想的人毋知有幾个？閣再chiah 的四百萬的囡仔，對佇爸母的不注意，以及社會不是的因端，致到貴重的身體來歸佇烏有，這款可憐的事，毋知有幾个teh想，這是社會的大問題？ 今仔日的社會，無管佇這世間欲有幾个囡仔來出世，閣in 的運命欲怎樣，深慮這款的事的人是真少。佇這个社會中無有比囡仔較軟弱--ê；無有比囡仔較著受幫贊--ê；閣再無有比囡仔較有將來--ê。實在囡仔...

[1928-6 台灣教會報/芥菜子 文類-散文 作者-陳能通/Tân Lêng-thong]
對禁食到死的研究 [ Tuì Kìm-chia̍h kàu Sí ê gián-kiù ]
對禁食到死的研究 陳能通 1928.06.01 519卷(芥菜子第28號) p.17-19 [這篇是日本Ko-pí-liông醫學博士所研究的論文。我讀了不止有趣味，所以對彼內中揀通俗tek較快了解的譯術佇遮；向望會做列位的參考]。 「性命是在佇食」，這句是對古早以來人常常teh liū 的話。因為若無食，無久袂免得著死；這是明明的事實。總是到底人若無食會活teh幾日久leh？論動物方面的試驗卻相當有不止濟；總是關係人這方面，用學術的來議論--ê，猶罕得聽見。 無食會活的期間照動物的種類攏無相同。Lam-á內的細隻鳥彼款，若一兩日袂記得共伊飼就死；田蛙仔，龜佮蛇彼等號，若到冬...

[1928-7 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu Sú ]
台灣基督教史 吳昌盛 （續接前號） 1928.07.01 520卷 (芥菜子第29號) p.11-13 佇1622年，荷蘭的將軍Kai-che-lu-lin chhoā 17隻的戰船來澎湖對Ang-bo̍k-têng上陸。彼時有真濟的中國討海人來踮佇遮。予荷蘭人搶去的討魚船有六百外隻；毋但按呢將中國人揪去做築城的苦力。受著in 的虐待不止大，致到城起袂好的代先就死kah欲了去。 Taⁿ將Ba̍k-sì所寫的抄錄淡薄，「因為欲起城座有掠中國人1500人。強制叫in著做工。工事袂落成的以前就已經餓死1300人。因為一日才半斤米予 in食nā-tiāⁿ。」 閣Lu-lo-u...

[1928-7 台灣教會報/芥菜子 文類-散文 作者-偕叡廉/Kai Jōe-liâm]
東西南北 [ Tang Sai Lâm Pak ]
東西南北 偕叡廉 1928.07.01 520卷(芥菜子第29號) p.16-17 1. 基督教佇印度國teh進步比佇內地抑是Chi-ná iáu-kú有較緊。 2. 佇這50年的中間印度國的基督信徒有加添三百萬人。佇內地有加添二十五萬，佇Chi-ná有加添五十萬。 3. 佇美國庄裡的所在有十萬間禮拜堂，牧師有四萬个，通知一个牧師有兼幾若間拜堂。 4. 今年佇印度有掠著一尾大蛇長二丈七，也有掠著一尾飯匙chhèng長十三尺。 5. 腓力牧師做工濟濟年久佇印度。舊年伊有共1059人行洗禮。 6. 前pang佇新加坡有開傳教師的...

[1928-7 台灣教會報/芥菜子 文類-散文 作者-蕭樂善/Siau Lo̍k-siān]
禮拜的感想 [ Lé-pài ê Kám-sióng ]
禮拜的感想 蕭樂善 1928.07.01 520卷(芥菜子第29號) p.19-20 做禮拜，有所在進步，頭到尾真莊嚴，親像天頂的集會；總是有所在較凊彩，無啥物敬虔，無啥物同心的款，致到失落伊的本色。這是真要緊的問題。現時佇德國的教會不止掛慮做禮拜的事，看按怎通換新，抑是較深沈，較豐富。佇咱本島的教會袂免得有像款的掛慮。 佇教會中常看見較愛外皮的事，致到有人講，咱新教若來chham淡薄舊教的禮式較好；總是這不止有通想。咱若加添外皮的事，毋但驚了袂進步，驚了會退步。Rudolf Otto講，「若凊彩掛慮愛予禮拜較心適，會予有實在宗教的要求的人失志。」咱新教的禮拜是較oh，比對重外皮...

[1928-8 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu Sú ]
台灣基督教史 吳昌盛 1928.08.01 521卷(芥菜子第30號) p.11-13 吳昌盛先生佇6月28號受主揀召。台灣教會有大損失一位有為的人物。阮大大共伊傷心。伊對佇阮的報紙不止出力。阮愛共伊感謝，紲寫幾字來表阮的弔意。 編輯部。 (續接前號) 第二章：－ 第2節：荷蘭人的佈教。 A. 宣教師簡單的異動。佇1624年，荷蘭來佔台灣，in本國的當局者就連鞭有希望欲派傳道師來指導踮佇台灣的荷蘭人。這个希望後來有實現派兩個來，頭一個就是Michel Theodori，第二個就是Lawrengoon。頭一個來台灣無偌久就連鞭閣叫倒去Ba-ta-bia。第二--...

[1928-8 台灣教會報/芥菜子 文類-散文 作者-陳溪圳/Tân Khe-chùn]
Thái-ko 的得著清氣 [ Thái-ko ê tit-tio̍h chheng-khì ]
「Thái-ko 的得著清氣」 陳溪圳 1928.08.01 521卷(芥菜子第30號) p.17 馬偕病院治療平常的患者以外，每拜六兩日，另外有teh治療thái-ko 的患者，已經幾若年久。戴博士佮同勞者有體基督的心，特別用疼情，友情，用熱心佮小心teh共in治療，所以成績真好，患者那加添，現時每禮拜有百外人來就伊。閣再呂阿家傳道師亦真歡喜做in 的朋友，慇勤佮in研究基督的福音，紲教in白話字。對今年頭戴博士佮呂傳道有設法每禮拜日佮熱心欣慕主的 thái-ko患者七八--个聚集守禮拜；對in 的同情佮疼痛，予人所厭賤thái-ko 的兄弟揣著逃閃得著安心佮活動。紲chho...

[1928-8 台灣教會報/芥菜子 文類-散文 作者-蕭安居/Siau An-ku]
東西南北 [ Tang Sai Lâm Pak ]
東西南北 蕭安居 1928.08.01 521卷(芥菜子第30號) p.17-18 我佮明牧師佇7月1日有起身去後山聚集傳教師修養會佮試驗。彼下晡6點10 分到蘇澳，買船單欲搭郵便船去上大船的時，風湧不止透閣落大雨，我的雨傘有jia四个人；上船的時我佮蕭春(神學生)尻脊攏澹。彼暗10點外開船，隔日5點外到花蓮港，佇遐海面真平，真好上山。李傳道徛佇海墘等阮，chhoā阮到拜堂。無偌久就起身去平林；因為聽見對文山近新店有兩家會友徙來佇遐，所以去探in，大家相見面真歡喜，予in好款待。後來就閣坐車去鳳林，蘇A-kun傳道師有chhoā阮去拜堂，有幾若个熟似的會友來相見面。張Chhit-l...

[1928-8 台灣教會報/芥菜子 文類-詩 作者-陳清忠/Tân Chheng-tiong ]
佈道的詩 [ Pò͘-tō ê Si ]
佈道的詩 陳清忠 1928.08.01 521卷(芥菜子第30號) p.20 這擺的修養會吳牧師娘有備辦幾若首詩，佮傳道相佮鍛鍊；目的是愛做佈道的路用；不止好聽，閣再不止快學，阮下佇報紙，向望列位濟濟來採用。(本號代先下一首)。 No.1. 求主賜氣力 【樂譜】 求主這時賜氣力，求主這時賜氣力， 求主這時賜氣力，來充滿佇眾人。...

[1928-9 台灣教會報/芥菜子 文類-散文 作者-吳昌盛/Gô͘ Chhiong-sēng]
台灣基督教史 [ Tâi-oân Ki-tok-kàu Sú ]
台灣基督教史 吳昌盛 1928.09.01 522卷(芥菜子第31號) p.11-14 (續接前號) 第二章： 第2節：荷蘭人的布教。 B.布教的事蹟佮計畫。 照以前所講若欲調查chiah 的事蹟，除起對冊以外通講是無較好的法度。因為差不多倚200年久，受著異教的管轄致到所有的古蹟遺物大概攏無去lah。所以事實通講全部是佇報告書，個人的批信佮旅行記nā-tiāⁿ。對按呢精密的研究通講是不可能。所以干焦將聚集報告書，批信佮旅行記chiah 的菜料來做滿足。Taⁿ將所聚集--ê來寫佇下跤。 上第一代先的宣教師就是Georgius Candidius。伊的來台灣是162...

[1928-9 台灣教會報/芥菜子 文類-散文 作者-陳清義/Tân Chheng-gī]
讀冊桌 [ Tha̍k-chheh-toh ]
讀冊桌 陳清義 1928.09.01 522卷(芥菜子第31號) p.14-15 獨一真神的研究 世間人濟濟毋信萬國所公認的獨一真神上帝，攏是對區守習慣，毋愛研究，趁祖先的流傳，所以致到毋捌上帝。若甘願查考研究，穩當會佮伊相識，來信靠服事伊。Taⁿ這个獨一真神毋是干焦基督教的聖經所記載nā-tiāⁿ，古代的文明國也有講起，也有明明公認伊；試引幾若國排列佇下底來講。 1.埃及國古早的時也有敬奉上帝。查考in古早石碑的文佮in古早的書籍，攏是講上帝獨一無二，無起頭無煞尾，自然而有，天地萬物攏是對上帝創造來成。這佮基督教聖經所講相同。 2.巴比倫國的詩集也濟濟記載敬天的事，...

[1928-9 台灣教會報/芥菜子 文類-傳記 作者-陳瓊琚/Tân Khêng-ku]
故吳昌盛君的略歷 [ Kò͘ Gô͘ Chhiong-sēng kun ê Lio̍k-le̍k ]
故吳昌盛君的略歷 陳瓊琚 1928.09.01 522卷(芥菜子第31號) p.15-18 吳君誕生佇1897年11月27日。升天佇1928年6月28日。出世佇屏東，長成佮受初等教育亦是佇屏東。臨終亦是佇屏東；7月12日下午有舉行伊的葬式猶原是佇屏東禮拜堂。彼日的會葬者有內地人屏東的 Kūn-siù以及信者佮本島人，合共有幾若百人。 論伊佇細漢做囡仔就佮別人有較各樣。因為無論是啥物，真聽伊的序大人的話，老母若叫伊的序大人的話，老母若叫伊恬恬坐，伊就恬恬坐毋敢凊彩徙位。孔子的教示有講，「百善孝為先。」吳君有行孝道做伊人生的基礎。對伊卒業公學校了後就接續有綴伊的兄哥去京都留學，就...

[1928-10 台灣教會報/芥菜子 文類-散文 作者-周天來/Chiu Thian-lâi]
所著欣慕的 [ Só͘ tio̍h him-bō͘ ê ]
所著欣慕的 周天來 1928.10.01 523卷(芥菜子第32號) p.13-14 現代的人真無閒，致到in 的靈魂攏因為無祈禱紲真喙焦；求叫上帝紲那親像真困難的款。這的確是因為人猶未確實知所應該著欣慕--ê是啥物，才會致到按呢。人有盡心，盡意，拚性命來欣慕所應該著欣慕--ê抑無，這佇伊的生活上後來有真重大的結果佇teh。咱現在到底是teh欣慕啥貨？彼个應答若明，就猶原會知彼个結局；通分別人生的幸不幸；抑是浮，抑是沉；有元氣抑是衰弱，攏通知影。 設使咱若會通予咱的靈魂干焦欣慕一項，無欣慕別物；就其餘一切的物，有也好，無也是若準無相干。 咱若讀詩篇42篇就知，「親像鹿hā-hā...

[1928-10 台灣教會報/芥菜子 文類-散文 作者-陳添旺/Tân Thiam-ōng]
舊慣的盡力 [ Kū-koàn ê Chīn-la̍t ]
舊慣的盡力 陳添旺 1928.10.01 523卷(芥菜子第32號) p.17-18 (無意中的參觀) 義民廟是佇新竹州新埔街附近的山腳所在。照枋寮的人所知teh講，早年戴萬生反，有真濟人為著國家盡力來死；後來到劉欽差時代，皇帝有出詔封in做「義民爺。」對按呢真濟來奉敬，紲定例佇舊曆7月20日設普sì祭無主的孤魂。 這个廟有2000外租的財產，總是官府有共in制限，每年400租做雜費用，iáu--ê 寄附教育佮社會公共的事業。 這个普sì分做15區，逐區是15年著一擺；今年輪著中壢管下，大崙附近的 庄社。所開的錢真正濟，敢有10萬箍以上(毋是公錢，各人自擔)。 彼日祭典的光...

[1928-10 台灣教會報/芥菜子 文類-散文 作者--/-]
教囝的法度 [ Kà Kiáⁿ ê Hoat-tō͘ ]
教囝的法度 1928.10.01 523卷(芥菜子第32號) p.18-19 第七章 撙節 撙節這項，第一有利益人的身體，就是逐項袂予伊過頭去。囡仔食平常的食物第一有利益。早英國的女王I-to-lī-a細漢的時，干焦食牛奶麵包，佮平常的百姓無各樣。東爿chiah 的國的人愛食糖，抑是餅仔。所以攏軟chiáⁿ無力，閣有一款尿磷病的症，對按呢死--ê真濟。Gâu疼痛閣毋捌的老母，常常用糖仔餅仔予囝兒，致到後日成做一个貧憚貪食的人。所以囡仔予伊平常的食物，就通得著精神勇健的福氣。 食熏第一會害著少年人，會礙著伊的大，紲予伊的精神氣力衰弱。歐美逐國攏有禁令。凡若賣熏的店，攏毋准袂16歲...