[1934-11 台灣教會公報 文類-散文 作者-賴仁聲/Loā Jîn-seng]
毋通相排斥 [ M̄-thang saⁿ pâi-thek ]
毋通相排斥 總是著抾來做鑑戒 (接10月第3面) (賴仁聲) 1934. 11，no. 596，pp. 5-6 (3)對聖潔教會。論聖潔教會佮咱，是比天主教，佮真耶穌教較有相通的點。總是有2，3項，咱大家較無愛--的。(1)傳予未信者是好。伊不論到佗位，毋若台灣，別位也是按呢。有傳予已經信的人，來拍亂人的信。(2)對已經受洗禮的人閣共人行洗禮。(3)排列神癒做得救的一要件。這3點，我佇聖潔會做工的時，也是真共in反對。有人講我去聖潔會有閣領洗禮，彼是絕對無影的事實。因為我掠人閣領洗禮，是忽略上帝三位一體的聖恩，家己藐視以前對主所受贖回的功勞；閣也是家己證明前的反悔是白賊。以上這3...

[1934-11 台灣教會公報 文類-散文 作者-陳金然/Tân Kim-jiân]
舊約書序說 [ Kū-iok-su Sū-soat ]
舊約書序說 (陳金然) (接前號第5面) IV. 舊約書的背景 1934. 11，no. 596，pp. 6-8 3. 受希利尼人的影響 佇B. C. 第4世紀，亞力山大對馬其頓的一角興起，紲收入當時世界的大帝國波斯的大版圖 (B. C. 332)。伊對佇伊所佔領的地，有用巧妙的政策；對按呢希利尼的文化普及佇逐所在；深入佇逐方面。 猶太人對受掠以後，四散徛起佇埃及的各地方。這霎散散踮佇地中海的沿岸；其中亞歷山大，倚有25萬人佇遐徛起。In在來有漸漸棄拺家己國語，總是對希臘文化的進入，紲漸漸用希利尼的俗語，風俗也受不止大的影響。 Taⁿ這擺的影響實在無較輸第1所講「...

[1934-11 台灣教會公報 文類-散文 作者--/-]
刣贏亞瑪力 [ Thâi-iâⁿ A-má-le̍k ]
刣贏亞瑪力 (出17：11-13) (I. S. I. ) 1934。11，no。596，pp。11-12 以色列百姓對出埃及了後，有拄著幾若款的艱苦。有時喙焦，無水通啉；腹肚枵，無物通食。遮的艱苦，上帝攏有設法幫贊in。總是做第一予in驚惶--的，就是對敵。起頭佇後面有法老的軍兵咧追，到後來佇前面有迦南的本地人咧阻擋。遮的對敵的中間，予in真艱苦--的，就是亞瑪力人。 摩西chhoā百姓佇Lí-hui-thêng佮亞瑪力族交戰。彼時約書亞咧督戰。摩西上山，手若攑懸，以色列人就贏；手若放低，百姓就輸。因為摩西，手若酸，就放低，所以亞倫戶珥徙石予伊坐，紲扶伊的手。對按呢百姓大刣贏亞...

[1934-11 台灣教會公報 文類-散文 作者-陳鳩水/Tân Khiu-suí]
結核病 [ Kiat-hu̍t-pēⁿ ]
結核病 (陳鳩水) 1934. 11，no. 596，pp . 12-13 第三章：肺結核佮胸膜炎 甲. 肺結核 (1)症狀 肺結核的症狀，有的是對肺組織的改變，有的是對結核菌的毒素入佇血內。前的症狀，叫做局部--的；後--的，叫做全身--的。 局部症狀 結核菌入體後，所生成的結核，起頭是微細，袂會致病，局部全身攏無症狀。然後結核漸漸大，症狀發現。彼个發病，大概真慢；毋過有急性--的，這是佮慢性--的，有無相同的所在。 結核病的初起佮症狀的發現；彼个款式無相同，有的干焦局部--的，有的全身--的。毋過大多數，局部佮全身的症狀siāng時發出。 咳嗽 ...

[1934-11 台灣教會公報 文類-散文 作者-康佳音/Khng Ka-im]
和尚 [ Hoê-siūⁿ ]
和尚 (康佳音) 1934. 11，no. 596，pp. 13-14 1. 我捌一擺佮一个和尚談論道理，我有問伊「和尚」的意思。伊講，「這个是阮出家人的理想，其實無一个人會堪得稱做和尚，只有釋迦摩尼若定。」「Hê」是和合。「Siūⁿ」是至尊至上的神明(至尊至尚)。意思是「和合至大的神明的人，」這是佛家無上的理想。」 基督徒應該著有「和尚」的理想，總是咱理想的解釋，著進一步，就是毋若佮上帝和，純全親像天爸的純全若定；也著報傳救世的真道，來予民生高尚，道德高尚(進而尚化天下)。因為基督教是入世tek宗教，欲拯救萬民。耶穌講，「我毋是求你予in出世間，就是保守in脫離歹--的......

[1934-11 台灣教會公報 文類-小說 作者-王守勇/Ông Siú-ióng]
教話 [ Kàu-oā ]
教話 (王守勇) 1934. 11，no. 596，pp. 14 (2) Phoe命守約束 人為著朋友獻性命，疼無比這个較大(約翰 15：13)。 佇史記有記載講，尾生捌佮一个女子約束，佇彼暗欲橋跤相揣。無拍算，彼暗有落大雨；彼个女子紲無來，總是伊踮佇橋跤直直等，攏毋敢走。閣霎仔久水直直漲懸，起頭淹著跤，後來到跤頭肤，到下腰，也到胸坎；為著毋敢失約，致到攬牢佇橋柱予水浸死；對按呢通知，伊疼彼个女子到怎樣？ 聖冊有表明主耶穌是信徒的新囝婿，伊有約束欲救咱，佇十字架跤欲佮咱相揣，咱攏失約，主為著咱的罪來死佇十字架頂，疼敢猶有比這个較大--的mah？...

[1934-11 台灣教會公報 文類-散文 作者-許水露/Khó͘ Chuí-lō͘]
孤兒院的開祖梅叡廉 [ Ko͘-jî-īⁿ ê khai-chó͘ Muî Joē-liâm ]
孤兒院的開祖梅叡廉 (ジョージ、ミユーラー) (許水露) (接前號第12面) 1934. 11，no. 596，pp. 14-15 In的集會特別注重聖神的感動。In聚會的形式，較親像祈禱會的款，毋限定司會者家己講若定；就是不論甚物人若受聖神的感動，攏通自由徛起來講，抑是欲chhoā人祈禱，也是好。 伊決心無欲提一定的薪金。因為伊決意萬事欲倚靠上帝，無欲倚靠人。伊不論欲做甚物事，攏代先問上帝的意志，然後才問人的意見來做參考。上帝若指示伊著做的事，雖然頭前有真濟的難關，伊也無忍neh，專靠上帝的大權能，好膽直向前。雖是按呢，伊沓沓拄著魔鬼的刺。捌一擺伊的心內咧想，「雖然佇18...

[1934-11 台灣教會公報 文類-散文 作者-林清廉/Lîm Chheng-liâm]
助成宣道婦的必要 [ Chō͘-sêng Soan-tō-hū ê Pit-iàu ]
助成宣道婦的必要 (林清廉) 1934. 11，no. 596，pp. 25-26 現時咱北部的教會漸漸teh進步，總是慢慢仔行，無甚物大步。咱毋通掠按呢做滿足，著向望閣較大進步興起。照我teh看，若欲予咱的教會較大進步，著養成較濟的宣道婦來鬥做工。若是論牧會，著傳教師；若是欲招人來信道理，猶著宣道婦較有力。 今照我所經驗--的，寫淡薄佇下底：- 我踮玉里4年久，所加添的信者真少，也以前所有的會友攏是別位搬來--的。後來我看鳳林教會有得著一宣道婦 (就是劉--氏幼)來鬥做工，也伊佇鳳林6月日久，就引chhoā幾若家來聽道理。後來伊轉去台東教會做工，也佇台東6月日久，照台東...

[1934-12 台灣教會公報 文類-散文 作者-主筆/Chú-pit]
基督聖誕節 [ Ki-tokSèng-tàncheh ]
基督聖誕節 (主筆) 1934.12，no.597，pp.1-2 天使的傳報 水蒸氣真少的猶太國曠野的暝時，空中清靜，星辰燁燁熾。彼ê昏，加添一層的神祕。遐的咧顧羊的牧者，忽然看著天頂毫光燦爛，就驚到神佛附體。咧驚惶的中間，有天使叫in免ngông-ngia̍h，紲共in講，今仔日基督出世佇大衛的城啦。閣霎仔久就有真濟天軍來佮遐的天使唱歌講：「佇極懸的位，榮光歸佇上帝；地上和平佇伊所歡喜的人的中間。」 無平和的世界 對彼霎了後，經過兩千外年久。雖然科學大發達，會通發見所毋捌的世界，以及透徹濟濟的奧妙；實在彼个文化的精華，是做20世紀大的誇耀。猶久天使所吟「地上和平」有臨...

[1934-12 台灣教會公報 文類-散文 作者--/-]
斗六教會略史 [ Táu-la̍k Kàu-hoē lio̍k-sú ]
斗六教會略史 1934.12 597卷 p. 18 (劉Iú-tēng) (接10月18面) 佇1902年，林育奇先生的時代，得著梅監務牧師，劉萬劍長老，吳鹿長老娘in 3人的錢，劉長老對in內姪女張--氏英，佮in姪仔張添丁買一塊厝地佇斗六堡番社裡。彼塊地叫做溪仔墘，彼塊地大約有3分。佇1903年，登記做「斗六耶穌教會的禮拜堂地。」經過4年久，官廳有欠用一部分，所以斗六衛生會，將舊市場(現時的拜堂地)，1分9釐 5毛5絲，佇1907年2月4日，登記交換。總是賰的額有賣予盧嬰。 佇1911年，黃獻章先生的時代，長執有議定欲起禮拜堂。到隔年，張Tiāu-siông先生的時，...

[1934-12 台灣教會公報 文類-散文 作者--/-]
論教會功業的由來 [ Lūn kàu-hoē kong-gia̍p ê iû-lâi ]
論教會功業的由來 1934.12，no.597，pp.18-19 舊嘉義廳打貓南堡，有姓劉的功業，彼个業主是劉玉公，有土地佇大崙洋。佇大崙庄有劉玉公的派下劉Chhàu-hiàn，劉Lâu-pa̍k佇teh。帝國領台了後，有勘丈到大崙，有查出劉玉公的派下無納大崙洋，崙仔崗的地租，致到官廳有共伊賣。彼時有叫劉萬清著買，總是萬清無愛。若是官廳有再三叫伊買，後來無ta何有共伊買。買了後，有有力者出來假做彼塊土地的相續者，愛欲奪彼塊地。看這个勢面彼款，就佮伊的小弟萬劍參詳。伊的小弟共伊講，若是按呢，將這塊地來獻予斗六教會。萬清有歡喜，就隨時去拜堂揣林育奇先生；in兩人設法彼塊地，佮討予人收--去...

[1934-12 台灣教會公報 文類-散文 作者-林茂生/Lîm Bō͘-seng]
新台灣話的陳列館 [ Sin Tâi-oân-oē ê Tîn-lia̍t-koán ]
新台灣話的陳列館 (林茂生) 1934.12，no.597，pp.9 To̍k-oá-su (毒瓦斯)：有毒的氣，用做交戰的武器，來予對敵中毒。對國語的dokugasu來，就是英語的poison-gas。民國有用。 To̍k-sin (獨身)：未做客，抑是未娶。對國語的dokushin，就是英語的celibasy。複合名詞，獨身者 ( = dokushin-sha an unmarried person)。民國有用。 Tōng-sán (動產)：Dōsan；movable property。屬佇法律上咧用的話：會得徙所在的財產，親像現金，株券，厝內的傢俬，物件彼款。佮不動...

[1934-12 台灣教會公報 文類-散文 作者-王守勇/Ông Siú-ióng]
聖冊佮巴博士 [ Sèng-chheh kap Pa Phok-sū ]
聖冊佮巴博士 (王守勇) 1934.12，no.597，pp.6-7 今仔日咱若讀聖冊的時，就想著巴博士。咱會通得著遮呢利便閣好的聖冊，是對巴博士苦心翻譯，這个恩，咱毋敢袂記得。 巴博士佇明治8年(1874)，來台灣的時；有看見對百外年的漢文的聖冊。當時對原文欲翻譯漢文的時，有真濟錯誤的所在；閣對漢文來翻譯的聖冊，彼个錯誤的所在，袂免得閣較濟。 明治17年(1884)，法蘭西來拍台灣，彼時佇台灣的宣教師攏閃避去廈門，親像按呢，宣教師會通踮一所在，是罕得拄著的機會；所以有開宣教師會議，佇彼時有決議著改譯聖冊，總是無人敢擔當這个責成。後來就決定分擔改譯。 翻轉年，拄好佇...

[1934-12 台灣教會公報 文類-散文 作者-陳金然/Tân Kim-jiân]
舊約書序說 [ Kū-iok-suSū-soat ]
舊約書序說 陳金然 (接前號第8面) 1934.12，no.597，pp.7-8 V. 舊約書的分類佮順序 咱今仔日咧讀的舊約，是對濟濟種的冊來成立，攏總是39卷。人大概共伊分做3類：- 1)歷史(17卷)創世記-以斯帖。 2)文學(5卷)約伯-雅歌。 3)預言(17卷)以賽亞-瑪拉基。 咱知彼中間有的分前後，抑是上下，- 撒母耳，列王，歷代。-總是希伯來原文無按呢分；閣以斯拉，尼希米是合做一本，也12小先知也是做一本。對按呢自然譯本佮本文有無相同的所在。這款的各樣，是對LXX (70士譯) 起，這大概是趁當時亞力山大智識社會的風俗。這个城最初的圖書館...

[1934-12 台灣教會公報 文類-散文 作者--/-]
英台俗語 [ Eng Tâi Sio̍k-gú ]
英台俗語 1934.12，no.597，pp.9-10 Where there is will，there is way：(意思是，若有志氣就有路)。有志--者事竟成。有心拍石，石成穿。 Pride is the bane of happiness：(意思是，膨風是幸福的毒)。滿招損。 Necessity is the mother of invention：(意思是，欠缺是發明的老母)。窮則變，變則通。 Employment is the salt of life：(意思是，有工課通做是活命的鹽)。有恆產，有恆心。 A goody apple is often...

[1934-12 台灣教會公報 文類-散文 作者-陳思聰/Tân Su-chhong]
三種的葡萄 [ Saⁿ-chéng ê Phû-tô ]
三種的葡萄 (翰 15：2節) (陳思聰) 1934。12，no。597，pp。11-12 所記載葡萄的譬喻，是主耶穌設--的，譬喻伊佮咱的關係，親像葡萄佮枝。枝對葡萄來得著水佮活命；咱信耶穌基督，就會得著活命佮氣力，紲會通結出好的果子。今佇約翰15章2節所記載，有3種的葡萄。就是無結子--的。第一，因為無結子，作園的人受氣，愛刪--起來。第二，有結淡薄仔，作園的人袂滿足，愛受予伊清氣，予伊結子閣較濟。第三，是結滿滿--的，作園的人真歡喜，因為果子結真濟。 今來想這3種：- 1. 無結子的葡萄 這是譬喻信耶穌的人，無有一點仔的好所行；這款的基督徒，聖經講著刜--起...

[1934-12 台灣教會公報 文類-散文 作者-陳鳩水/Tân Khiu-suí]
結核病 [ Kiat-hut2-pēⁿ ]
結核病 (接11月第12面)。 (陳鳩水) 1934.12，no.597，pp.12-13 乙. 胸膜炎 雙爿的肺的外面攏有胸膜蓋teh。這个胸膜佇胸的內面，有兩重相倚，一重連佇脇骨內的骨肉佮橫膈膜；也一重包肺臟。遮的膜，叫做胸膜。佇這兩重的中間，有淡薄親像水的款，名叫做胸膜液，來幫贊肺呼吸較容易來振動。胸坎佮腹肚的中央，有一重膜隔teh，號做橫隔膜；心佮肺踮佇伊的頂面。橫隔膜的中央是親像韌帶的款式；邊頭是扁扁的根，會伸勼，圍佇脇下裡。彼个筋肉若伸，橫隔膜對頂面膨起來，胸坎就較細，伊的筋肉若勼，就橫隔膜落低，胸坎較大。 咱人呼吸有兩項：一項是空氣吸入；閣一項是呼出。若欲吸入...

[1934-12 台灣教會公報 文類-散文 作者--/-]
傳教師娘重大職務 [ Thoân-kàu-su-niû Tiōng-tāi Chit-bū ]
傳教師娘重大職務 (一記者) (接10月第10面) 1934.12，no.597，pp.13-15 2. 傳教家夫婦著怎樣做和好的事？ 論傳教師娘重大職務。按怎來講起，夫婦和好是婦人人的責任？按呢講是無公道。因為丈夫是家內的頭，頭你若四正，遮的跤手就綴你四正；按怎你做頭的人毋講家己，干焦咧嫌別人，先講先贏hò͘？按呢講都著，做頭若做會起，卻會順序，毋過做袂起。做袂起，你抑敢講，彼是你的無道德，無能。著，你按呢講，我感服，是我的無能，無德行。毋過設使有So͘-kek-tí的道德，都也是袂會感化伊的某Chàn-thiap-poê，閣是親像猶大彼款的壞性，雖是有主耶穌神格，也未受感...

[1934-12 台灣教會公報 文類-小說 作者-王守勇/Ông Siú-ióng]
教話 [ Kàu-oā ]
雜錄 教話 (王守勇) 1934.12，no.597，pp.15 (3) 風佮海攏順伊 古早佇英國有一个王叫做Canute。跟隨伊的人佮伊的部下，不時真gâu呵咾這个王。一个按呢講，「通世界毋捌看見有人興起，親像像你遮偉大！」閣一个講，「王啊！也毋捌看見有人會親像你遮有權柄。」也閣一个講，「大王！這世界無一項敢違逆你的命令。」遮的攏是好聽gâu呵咾的話，總是王聽了真siān。 有一日，遐的跟隨伊的人佮伊相佮去佇海邊。In猶原閣直直咧呵咾伊。王就想一个法度愛教示遐的人；就命令囥伊的椅仔佇海墘，倚海水的所在。彼時王就問講，「我是世界第一偉大的人抑毋是？」In一齊應講，「王啊...

[1934-12 台灣教會公報 文類-散文 作者--/-]
感謝佮拜託 [ Kám-siā kap Pài-thok ]
感謝佮拜託 1934.12，no.597，pp.5-6 感謝上帝的鴻恩，佮諸位牧師，先生，長執，兄姊的援助。敝會佇6, 7, 8，共3個月間，有派許水露牧師，到佇南部4中會的各教會捐題敝會的建築金。伊到逐中會，得著逐中會慈善會的理事，牧師，長老的案內，到逐所在的教會，得著各位牧師，先生，長執，兄姊的大歡迎，用物質的厚待，佮金錢的援助，真感謝。有人現交，有人先寫申入書，真多謝。真可惜，為著時間真短，佮工程真迫，袂得通到逐間的教會拜候，真遺憾。總是真好佳哉，有特別拜託高篤行牧師去捐題Pak-iá-teng佮萬丹兩位堂會。趙天慈先生佮吳珍長老去捐題台南市內，前拜候無著--的。為著in 3位的...